Read lumasaaba Tsinikha 2 Bible Online

Tsinikha 2 - lumasaaba bible

Tsinikha 2

¹Mwaana wase, siinga iwe uwuliilisa biilomo byase byeesi ikhuboolela, wabiikha buulayi biilakilo byase byeesi ikhuwa,

²waareka khukhuru khwoowo buulayi isi kamakhula, naluundi waakhakakho naabi khuumanya,

³Ilala kane wikhuunge, uryo ulaangilile nga ukana khuumanya.

⁴Uweentselesele ilala ufwaane nga umuundu uweentselesa ifeetsa, namwe nga uweentselesa bye buyiindifu bibyebisa.

⁵Iwe siinga ukhola uryo, kane umanye shiina sheesi khuurya Umukasya khumanyisa, naluundi kane umanye kamakyesi ka Wele.

⁶Umukasya niye uwaana kamakhula; mu niye nimwo mumwaamamo kamakyesi ni khuumanya.

⁷Umweene niye uwaana kamakhula kakaayeeta isi abo babaali baalayi, naluundi niye ali ingabo yaabo babetsiliilisa.

⁸Niye umweene uliinda abo babaabirisa babaandi buulayi, waakhiinga abo boosi babaali babeyikinwa isi ali.

⁹Lwanyuma nga waarekeeresile buulayi, kane umanye bye buukwalaafu luundi bibyaakhila, khuukyeenda buulayi ni khuuba umulayi.

¹⁰Lwekhuuba kamakhula niko kakanakhuraangilila, ni nawe kane wikhoyesebwe nga uli ni kamakyesi.

¹¹Kamakhula koowo ke mukari kane kakhwaayilise buulayi, ni kamakhula kane kakhukhiinge iwe.

¹²Kamakhula kane kakhukhiinge iwe isi babaandu bamoyaani, kane kakhuwonese khukhwaama mu bilomo byaabwe bibyaborokha,

¹³nga nibo babaalekha tsintsila tse bukwalaafu, baakana khuukyeendela mu shiilima.

¹⁴Nibo bali babaandu babewulila buulayi nga bakhola biibi, luundi bewulila kumwikhoyo nga balikho bakhola buuraambi bwe bubwoonaki.

¹⁵Nibo tsintsila tsaabwe tsaaborokha, naluundi mu byeesi bakhola byoosi sibeyikinikha ta.

¹⁶Kamakhula kane kakhuwonese iwe khukhwaama isi umukhasi umuyeyani, niye ukhakakho khukhwimiliisa khu ngaaki ni biilomo bibikhoongelesa.

¹⁷Niye ali umukhasi ufuniaaka indakaano n'umuseetsa weewe iye mu busooleli, naluundi uwibilila bibiitsubo byeesi aakhola mu moni tsa Wele weewe.

¹⁸Iwe siinga ukyeenda waatsya mu ntsu yeewe, uba uli khuutsya khu mukhoosi kwe khuufwa! Khuutsyayo, uba uli khuutsya mu shibala she makoombe.

¹⁹Mbaawo umuundu utsyayo waakobola nga ali umulamu ta, namwe waakyeendela khu mukhoosi kwe baalamu luundi ta.

²⁰Nashiryo iwe waakha khukyeenda nga uloondelela she khuubonelakho she babaandu baalayi, umenye mu buulamu bukwalaafu.

²¹Babaandu babaali bakwalaafu bakhaabe baasikha be shibala, luundi abo babaali bakwalaafu nibo babaakhaamenye mu shibala shino.

²²Ne abo babaali baboonaki Wele akhaabatuume ibulafu we shibala, ni naabo babaakhali babeyikinwa ta, akhaabakhuulake abarusemo.