Read lumasaaba Tsinikha 20 Bible Online

Tsinikha 20 - lumasaaba bible

Tsinikha 20

¹Khuunywa iviini khuureera bunywaanywa, she khuunywa shishimeesa shireera khukhaandisana. Babaandu babaayilibwa ni she khuunywa shino sibali ni kamakyesi ta.

²Lirima ly'omuyiinga lili busa nga italanyi ibuutsa, umuundu yeesi uwiikyeleesa lirima ilyo lyenyukha aba waareere buulamu bweewe mu buwaangafu.

³Shili shishiindu she shiriifwa naabi khuutataya bituluungu; ne umuundu umusilu yenyene niye uwomaanila khu khulomana.

⁴Umuundu umutoro s'akhabala kumukuunda kweewe khu mbuka inyene ta; imbuka iye likyesa nga yoolile, atsya khuweentselesa ne mbaayo sheesi anyoolayo ta.

⁵Bibyambaaso by'omuundu biilayi byayisiikha aasi abweene nga n'ubona kameetsi kamaleeyi, ne umuundu uwe kamakhula akhakakho naabi waabikhweesayo.

⁶Babaandu baakali banyala bekanikhakho nga ni bali basaale babeyikinwa, ne umusaale umwiyikinwa umweene naanu unyala waamunyoola?

⁷Umuundu umukwalaafu akyeenda nga ali umwitsiliilisi; ni babaana beewe babaamwiila mu bikyele bafuna tsikhabi!

⁸Siinga umuyiinga ekhala khu shitsoloŋo she khuukhala kimisaango, alolelela bujulisi bubuuba bwareerebwile, waawulawo shiibi khukhwaama khu shilayi.

⁹Naanu umweene unyala welomela ari, “Ise naayimiliisa kumwoyo kwase, indi umupyeeluukhe siindikho ni shiibi shoosi ta.”

¹⁰Bibipima bibikhali bya ŋali, ni bipima bibikhalekhaanisa ta, bino byoosi Umukasya s'abikanilakho ilala ta.

¹¹Abe yakhaba umwaana umukyeekhe bamumanya lwe buuraambi bweewe, oba nga buuraambi ubwo buli buulayi namwe bukwalaafu.

¹²Kamaru kakaawulila atweela ni tsimoni tsitsiibona, byoombi Umukasya niye uwabibuumba.

¹³Iwe siinga ukana naabi liilo khuukona, utsya khukhebulila waakwiile mu butaambi; yiikula tsimoni tsoowo ulole, kane winyoole nga waafunile biikali bye khuulya.

¹⁴Umuundu ukulaana akhaandisana lwe buukusi bwe shishiindu nga aloma ari sishaakhila ta, sishaakhila ta, ne uri waamala khuururawo waatsya, webuyila.

¹⁵Izaabu inyala yaabawo, atweela ni kamabaale kakaandi ke buukusi bwe angaaki; ne biilomo bye kamakhula bili bye lisuno khuubifuurisakho.

¹⁶Uyila shikwaaro sh'omuundu nga she khukhwiyimilila siinga nga umuundu uyo aba nga weyimiliile umuundu ukhali umumanye ta, yaakha khuubawo sheesi akhulekhela n'aba nga weyimiliile babaandu banaambo.

¹⁷Biilyo byeesi wiiba busa waalya nga biŋaaha, ne lwanyuma bishuukha byafwaana nga kumuyeekhe mu khanwa.

¹⁸Tsiŋoonaŋoona tsitsiraamba buulayi tsikhola tsiryo lwe kamakyesi kakaweebwa, ukhatsya mu busoolo nga waakhunyoowa khufuna kamakhula buulayi ta.

¹⁹Umuundu ukyesaasa luukaambo, asalanisa bimoonyo; nashiryo ukhetubaasa n'umuundu ukanikhaka mu buusilu busa ta.

²⁰Uyo yeesi utsuba paapa weewe namwe maayi weewe, afwaana nga umuundu usimisila itaala yeewe mu shiilima she kamaani.

²¹Bye buyiindifu byeesi ufunaka khaangu naabi maakiboole, khu ntsakamo sibubamo ikhabi ta.

²²Ukhelomela mu mwoyo kwoowo uri kane wiliyaase buubi lwe buubi ta, n'uwiyikine Umukasya, niye kane akhuyeete.

²³Umukasya waabiiyila naabi bibipima bibikhalekhaanisa ta, s'ekhoyela bibipima bibikhali byaŋali ta.

²⁴Umukasya yenyene niye umanyile lukyeendo lwoosi lweesi umuundu akyeenda, ari iwe unyala uryeena khuumanya ibyo bibiili mu ntsila?

²⁵Ukhakwa mu mureko kwe khuukhola shishitsubo isi Wele nga uyubakilisa, nio waakyelawo wemenieelesa lwanyuma ta.

²⁶Umuyiinga uwe kamakyesi emenieelesa khuumanya naanu ukholile shiibi, lwanyuma waamuwa shitaambiso nga s'alikho ni shiisa shoosi ta.

²⁷Kumwoyo kw'omuundu kwe mukari nikwo kuli nga itaala y'Omukasya, khuuweentselesa buli shiindu shoosi shishebisa mukari.

²⁸Khuukana khukhuukhawawo ta ni bubwiyikinwa, nibyo bibikhiinga umuyiinga, ni shitsoloŋo sheewe shiimikhawo lwe bukwalaafu.

²⁹Shiriifwa she basooleli shili mu maani kaabwe, ne litsuune lye tsiifwi lye buumanyilifu nisho shiriifwa she buusakhulu.

³⁰Shitaambiso she khulatsakakho shiyeeta khuumalamwo buubi, khuulatsakakho ikhwo, khupyeluusa kumwoyo mukari.