Read lumasaaba Tsinikha 21 Bible Online

Tsinikha 21 - lumasaaba bible

Tsinikha 21

¹Kumwoyo kw'omuyiinga kuli busa nga luluutsi lwe kameetsi mu mukhono kw'Omukasya, akalakilila kumukhoosi khweesi kali ni khuubirira nga niye umweene n'akana.

²Umuundu anyala khukhwibona umweene nga n'ali umukwalaafu, ne Umukasya niye uwimenieelesa kumwoyo.

³Khuukhola bibiindu bibiili bikwalaafu luundi bibiili biilayi shikhoyesa Umukasya khuufuurisa isaayilo.

⁴Tsimoni ts'omuundu uwiyiingayiinga ni kumwoyo kukwiniinisa, nibyo itaala iye bubwoonaki; byoosi bili shiibi.

⁵Tsiŋoonaŋoona tsindayi ni khuuraamba ni kamaani bireera khuutsowatsowana, ne buli muundu yeesi uwiyubakilisaka enyoola nga ali mu butaambi.

⁶Buyiindifu bweesi ufuna khuubirira mu bubeeyi butamuukha busa nga lukhaleesi, naluundi buli kumureko kwe khuhela.

⁷Bituluungu bye babaandu baabi bikhaabeeye bibamalewo babeene, lwekhuuba sibakana khuukhola byaŋali ta.

⁸Kumukhoosi khweesi babaandu baabi bakyeendela kwaaborokha, ne intsibirisa iye bakwalaafu yaapyeluukha.

⁹Manya shiba shiilayi khuukona khu shisuli khu ngaaki khwe ntsu khuufuurisa khuukona mu ntsu indweela n'umukhasi uwilomaloma.

¹⁰Babaandu baabi bakana khuukhola bibiindu biibi byonyene, sibawaambila ni babesanwa baabwe shiisa ta.

¹¹Uwa umuundu uwe shikili shiitaambiso, nio abo babaali be aasi beyikilakho, ne umuundu uwe kamakhula eyika khukhwaama mwiibyo byeesi bamuleekela.

¹²Wele ali umukwalaafu, niye waamanya bibikholekha mu tsintsu tse baboonaki; aryo waabareerera buukosi bwaabakwakho.

¹³Umuundu yeesi uwikala kamaru keewe nga s'akana khuuwuliilisa khuulila khwe bataambi ta, naye imbuka yeewe iye khuulila yoola waataambakho umuwuliilisa.

¹⁴Shiwaanwa she mu shimoonyo shimalawo lirima, ni iwoongo isi bamolamolisila aasi iwosawosa lirima liikali.

¹⁵Nga yabeelewo bwaŋali bubukholekhile, shireera kumwikhoyo isi bakwalaafu, ne shitaambisa naabi abo babaali baabi.

¹⁶Umuundu yeesi utiimatiima waarura khu mukhoosi kwe khuumanya, aba atsya khuweela mu lituuli lye baafu.

¹⁷Umuundu yeesi ukana naabi bye khusangaala byonyene ekyela umutaambi; abo babaakana naabi iviini ni biilyo bye buukusi bwe angaaki, sibanyala baaba bayiindifu ta.

¹⁸Babaandu baabi bafuna shitaambiso abe sheesi babaandu babaarya Wele banyala baafuna, ni be tsimbomelo bafuna shiitaambiso abe sheesi bakwalaafu batsya khufuna.

¹⁹Manya shiba shiilayi khuumenya wenyene iyo mu mubiimbi, khuufuurisa khuumenya atweela n'umukhasi uwilomaloma.

²⁰Babaandu be kamakhula baba ni buyiindifu buukali ni buulamu bwe beeyi, ne babaandu baasilu balyaka busa byoosi byeesi bali nabyo.

²¹Umuundu yeesi uloondelela buukwalaafu ni khuukholela babaandi bye shiisa, efunila umweene buukwalaafu atweela ni shiriifwa.

²²Umusaani uwe kamakhula anyala waafuuntsakilila shiriimba sheesi basaani be kamaani naabi baakhiinga, waafuniaakaka ni kamatikiiyi keesi beyikina.

²³Umuundu uwiliinda lulimi lweewe, waalekha khwinyusa kumunwa kweewe, aba weliindile khuulekha khukwa mu buukosi ta.

²⁴Umuundu uwe bunywaanywa eyiingayiinga luundi eniinisa angaaki, umuundu uyo ebirisaka busa ni bunywaanywa bwonyene.

²⁵Babaandu baatoro baaba ni byeesi bakana biikali, ate nga sibanyala khuuraamba ta, isho shinyala shabahesa.

²⁶Babaandu baabi bekhala bewotooma busa imbuka yoosi, ne bakwalaafu baba bahaana, nga mbaawo sheesi beramisila ta.

²⁷Isaayilo y'omwoonaki shili shishiindu she mbikho naabi, ni khufuurira ilala nga alikho akireera ni bitsilililwa biibi.

²⁸Umujulisi uwe bubeeyi akhaahele aweewo, ne umujulisi uwa ŋali balimufukiilisa khuukanikha.

²⁹Umuundu umwoonaki ekholisa busa mu buli sheesi akhola, ne uyo uuli umukwalaafu etsiliilisa mu byeesi akhola.

³⁰Mbaawo kamakhula ke babaandu koosi, mbaawo khuumanya khwoosi, namwe tsiŋoonaŋoona tsoosi, bibinyala byeemikha bikhaandisane n'Umukasya ta.

³¹Iŋwaaŋwa bakiŋoonaŋoona lwe shifukhu she khuutsya mu khuusoolana, ne khuufuura mu busoolo ubwo, shili sh'Omukasya.