Read lumasaaba Tsinikha 22 Bible Online

Tsinikha 22 - lumasaaba bible

Tsinikha 22

¹Khukhwikholela lisiina liilayi shifuura buyiindifu bwe kamaani, ni babaandu khuukhuwa shiriifwa shifuura ifeetsa namwe izaabu.

²Babaandu baayiindifu ni bataambi bali ni shishiindu shitweela sheesi bafwaanana: Umukasya niye uwababuumba boosi.

³Umuundu uwe kamakhula nga waaboone buukosi bwiitsa, akhakakho khuubwiwoma webisa, ne umusilu niye akyeendaka busa waatsya waabukwamo.

⁴Shiwaanwa she buuwolu ni khuurya Umukasya nisho buyiindifu, shiriifwa, ni buulamu.

⁵Babaandu bamoyaani bakyeendela khu mukhoosi kukwitsuule kamawa ni kimireko, umuundu yeesi uwinaanayo isi buulamu bweewe etsiliilisa walekha khuukutsyakho ta.

⁶Leekela umwaana kumukhoosi kweesi ali ni khuutsiilakho, nio nga weetsile khutsowa, alekhe khukururakho ta.

⁷Umuundu umuyiindifu niye aba nga umuwuli w'omutaambi, n'umuundu uwikhoopa aba umwakaanisi wooyo umwikhopesa.

⁸Abo babaamiitsa bumiitso bwe khuubirisaka babaandu babaandi buubi balikyesa kumutaambo, ni saambo isi beebirisakamwo baryo ilyakama.

⁹Umuundu ukabanana ni basheewe khu biindu byeesi ali nabyo alifuna tsikhabi, lwekhuuba akabilakho bataambi biilyo.

¹⁰Siinga utimisa umuundu umunywaanywa waamurusa ibulafu, khuusoolana khukhuubawo nakhwo khwakama, ni khuulomana atweela ni khuukhomana byoosi biwawo.

¹¹Umuundu ukana naabi bukhosefu bwe mu mwoyo, ni khuukanikha ni buwolu, akila umuyiinga waaba umusaale weewe.

¹²Imoni y'Omukasya iye buliindi ilolela abo babaali ni kamakyesi, ne amiinikhilisa tsiŋoonaŋoona tsaabo babaakhola tsimbomelo.

¹³Umuundu umutoro ekhala nga elomela mu mwoyo kweewe ari, “Ibulafu iyo iliyo italanyi! Nashiryo siinga indura naatsyayo, inyala yantsira.”

¹⁴Imunwa w'Omukhasi umuyeyani ili busa nga lilowo lileeyi naabi; abo boosi babaakhalasa Umukasya batsya baalikwamwo.

¹⁵Khuulekha khumanya khunyala khwaaba nga khwaayitsula mu mwoyo kw'omwaana umukyeekhe, ne khuulatsakakho khukila buusilu ubwo bwaawamwo.

¹⁶Umuundu ulyaakhana umutaambi bari nio abalaayise buyiindifu bweewe, namwe bari nio akabilekho bayiindifu biwaanwa, aba ereerera busa umweene buutaambi.

¹⁷Reekeresa buulayi uwuliilise byeesi babaandu be kamakhula bakanikha, ureke kumwoyo kwoowo mu bye kamakyesi byeesi ise ikhuleekela.

¹⁸Lwekhuuba kane shikhubeele shiilayi iwe khukhwiliinda biilomo bino mu mwoyo kwoowo, ni khuuba mwirekefu nga ushebulila khuubikanikhakho.

¹⁹Ingana iwe ure kumwiyikino kwoowo mu Mukasya, shisheene isho nisho shishikila ikhuleekela iwe biilomo bino, imbikhuleekela iwe shaleelo shino.

²⁰Iseese naakhuroneele iwe biilomo kamakhumi kataru, nga byaayitsulamwo khuuboolelela ni kamakyesi.

²¹Musaambo yino nio umanye ibyo bibiili byaŋali luundi bibiyikinikha, shikhunyalise khuubakho ni she khukhwiilamwo isi abo babaakhurumana.

²²Ukhanuula umuundu umutaambi kheesi ali nakho lwekhuuba ali umutaambi ta, namwe waamiinikhilisa abo babaakhenyala mwikayilo ta.

²³Lwekhuuba uli ni khuushimanya uri Umukasya umweene niye Umukayi waabwe, kane atsiinise abo babaabirisaka babaandi buubi.

²⁴Ukhakholakho buusaale n'umuundu uuli ni lirima liikali ta, namwe ukhatubaana ni babaandu babaatindiima ni lirima ta,

²⁵lwekhuuba nawe unyala weyika waaba nga nibo, shaakila waakwa mu mureko.

²⁶Ukhafukiilisa waaba mutweela khuubo babaasuubisa khukhwiyimilila babaandu babaandi mu makobi kaabwe ta.

²⁷Siinga ulekha khunyalisa khuusasula ta, banyala baakhukhweesakho buulili bwoowo.

²⁸Ukhakhuulatsaka kamasiintsi ke khu lwaakha, keesi baakuuka boowo baasimikha khaale ta.

²⁹Iwe waamanyakho umuundu yeesi uuli umuraambi umulayi? Umuundu ufwaana aryo atsya waaba umwakaanisi we baayiinga, s'anyala khuuba umwakaanisi we babaandu ba busheele busa ta.