Read lumasaaba Tsinikha 23 Bible Online

Tsinikha 23 - lumasaaba bible

Tsinikha 23

¹Iwe n'uba nga utsya khukhwikhala aasi khuulya biilyo n'umuwuli, nyoowa wimenieelese buulayi byeesi bareerire mu moni tsoowo.

²Iwe siinga uba nga uli umuundu ukana naabi khuulya, boombesakho kumuluungo kwoowo.

³Kumuluungo kukhakila wewotooma naabi biilyo biilayi ibyo ta, binyala byaaba nga bye khuukhuwombelesa busa.

⁴Ukharekana naabi lwe khuukana naabi khuuyindila ta, ne n'ubekho ni kamakhula ke khuumanya tsinyaanga tse khukhwaakamisilakho.

⁵Tsimoni tsoowo tsinyala tsaalola khu buyiindifu, ne imbuka ifwiiti iri bwaaba nga bwaaweelewo khaale; lwekhuuba bumelakho tsindaaha, bwaapamburukha nga waasu bwataamuukha bwaawawo.

⁶Ukhafukiilila khuulya biilyo by'omuundu uuli umurumaandu ta, ukhekoombakho biilayi byeewe ta.

⁷Lwekhuuba niye ali umuundu uwikhala waaba nga buli mbuka aambaasa tsinusu tseenga tseesi asalanisile. Anyala waakhulomela ari, “Yikhala ulye luundi unywe!” Ne nga mu mwoyo kweewe sishili nisho sheesi alikho ta.

⁸Unyala waalusaka ni khaafwiiti ikho kheesi uliile, ni biilomo byoowo byeesi uraambisile khuusiima mbaawo sheesi biyeeta ta.

⁹Ukhoonakisa busa biilomo bye kamakhula bari uboolelela umuundu uuli umusilu ta, lwekhuuba umweene uyo kane aleekelese busa kamakhula keesi uba waamuweele.

¹⁰Ukhasyeenda kamasiintsi khu lwaakha lweesi baamala khaale khuurawo; ukhenjilila liiswa lyaabo babaali baafuubi ta.

¹¹Lwekhuuba Umukasya umweene niye ubaliinda nibo ali uwe kamaani naabi, niye umweene ubeemikhila waawotsa ni nawe.

¹²Rekeeresa buulayi byeesi bakhuleekela, uwuliliise buulayi biilomo bye kamakyesi.

¹³Ukhesisibasa waalekha khuukolomosa umwaana woowo ta; khuumulatsakakho sishinyala shaamwiira ta.

¹⁴Khuumulatsakakho ni miimbo shinyala shaamuwonesa buulamu bweewe khukhwaama mu khufwa.

¹⁵Mwaana wase, iwe siinga uba ni kumwoyo kwe kamakhula, kane untsikhoyese ise buulamu bwase.

¹⁶Ise buulamu bwase kane busangaale naabi buli lweesi ikhuwulilila iwe nga ukanikha bibiili byaŋali.

¹⁷Libuba likhakhuwaambila babaandu babaali baboonaki ta, ne buli busheele yiloosela khuuryaatsaka Umukasya.

¹⁸Ilala iliyo kumwiyikino kwe shiwaanwa iburaangisi woowo, ni kumwiyikino kwoowo ukwo singene kuwewo ta.

¹⁹Mwaana wase, wuliilisa buulayi, ube ni kamakhula; ure kumwoyo kwoowo khu mukhoosi kwa ŋali.

²⁰Ukhaba mutweela khu bameesi be viini ta, namwe wetubaasa khu baandu be kumuluungo kwe biilyo ta.

²¹Lwekhuuba abo babaali bameesi ni babaakana naabi khuulya, batsya khukwa mu butaambi buukali, ni khuukona liilo liikali libabiimbakho nibo bitsina.

²²Wuliilisatsaka byeesi paapawo uwakhusaala akhuboolela, ukhalekha khuuwuliilisa maayi woowo ta, abe yakhaba nga ali umuloosi arye.

²³Tsya ufune bwa ŋali, ne ukheelayo waabukulisa ta; funa kamakhula, khukhwiiliinda atweela ni khuumanya.

²⁴Paapa uwe babaana bakwalaafu aba ni sangaalo iye kamaani; umusaali uuli ni babaana bakyesi bamwikhoyesa.

²⁵Reerera paapa woowo ni maayi woowo kumwikhoyo! Reerera maayi woowo uwakhusaala isangaalo!

²⁶Mwaana wase, n'umbe ise kumwoyo kwoowo. Lekha tsimoni tsoowo tsimenieelese kumukhoosi kwase.

²⁷Umukhasi malaaya ali lilowo lileeyi naabi, umukhasi umuyeyani akhufwaanisa nga umuundu ukwiile mu lilowo lye kameetsi linyelele liri.

²⁸Niye akwa aasi webisa waaliindilila nga umunuuli n'akhola, nga akana khuloosela khuumalamwo bubwiyikinwa mu basaani.

²⁹Naanu ilala uuli ni ngunyi? Naanu uuli ni kumutaambo? Naanu uuli ni buukosi? Naanu uwikhala nga elisalisa? Naanu uuli ni kumubili kukwanuubukhaka? Ne naanu uuli ni tsimoni tsitsarandaala?

³⁰Niye umuundu umalila inyaanga yeewe yoosi mu khunywa iviini, nga akhakakho buli shishinyweekha shaameesa shoosi.

³¹Ukhalolelela wewotooma iviini, nga yaarandaalile buulayi, nga ibonekha buulayi mu shikhopo, ni khuukimila nga yiikha amumilo buulayi!

³²Khu ntsakamo ya byoosi, ikhulumaka nga indemu, iluma nga indemu iye butsiba.

³³Tsimoni tsoowo tsirakikhe khuubona bifwaani biindi busa, urakikhe khukhwaambaasa ni khuukanikhaka bibiindu bye bumoyaani busa.

³⁴Uryo urakikhe khuutengaala busa ufwaane nga umuundu uuli khu nyaantsa iyiiyayiiya, utengaale ufwaane busa nga imeeri iyiyisibwa ni khukhwilyebula khwe kameetsi.

³⁵Awo nio urakikhe khukhwilomela wamweene uri, “Ifwaana baanguunyile, ne sibantsiinisile ta. Ifwaana baakhupile, ne sinashimanyile ta. Ne antsye busha liina indi intsye imeentse she khuunywa luundi?”