Read lumasaaba Tsinikha 24 Bible Online

Tsinikha 24 - lumasaaba bible

Tsinikha 24

¹Libuba likhakhuwaambila babaandu baabi ta, namwe wekoomba khuuba butweela ni nabo ta.

²Lwekhuuba kimyoyo kyaabwe kyambaasa bituluungu byonyene, ni biilomo bibirura khukhwaama mu khanwa mwaabwe bireera buusiku bwonyene.

³Tsiingo tsombekhebwa lwe kamakhula, tsiryo tsahangala buulayi lwe khuumanya.

⁴Khuubirira mu makyesi, biseenge bye mu ntsu biitsusibwa ni bibiindu bye buyiindifu, ni bibiindu bye lisuno bibikhali bitweela.

⁵Umuundu uuli ni kamakhula afuurira aleeyi uyo uuli ni kamaani konyene, ni naabo babaali ni kamakyesi bafuurira aleeyi abo babaali ni kamaani busa.

⁶Lwekhuuba nga ukana khuutsya mu busoolo, waakha khuuŋoonaŋoona buulayi ni kamakyesi, khuuwula mu busoolo shikanisa khuuba ni baawi be kamakyesi baakali.

⁷Isi umuundu umusilu, kamakhula kaba kali angaaki naabi, isi baaraangilisi be shiriimba babuusanila a shilibwa, s'anyala waabakho ni sheesi aloma ta.

⁸Umuundu yeesi uwimotsamotsa nga akana khuukhola buubi buli mbuka, kane bamulaangatsake bari umutaambisi.

⁹Umuundu yeesi uwikholakholanisa mu biindu biibi aba akhola shishoonako, n'umuundu yeesi uuli umunywaanywa babaandu baamubiyila.

¹⁰Iwe siinga ukhaasikhana khu mbuka iye buukosi, shookesanisa shiri uli umutoro ilala.

¹¹N'uwonese abo beesi bakhaliile kumusaango kwe khuufwa, wonesa abo abe babaatsya khukhwiiribwa.

¹²Iwe ukhelomisaka uri, “Ifwe abe shino khwaakhushimanyakho ta.” Lwekhuuba Wele umweene waamanya byoosi bibikholekha mu myoyo kyoosi. Umweene uliinda buulamu bwe mukari waashimanya ari iwe waashimanyakho. Nashiryo alisaasula buli muundu khuusiintsiila khu buraambi bweewe.

¹³Mwaana wase, lyakho bubuukhi bwe ntsukhi, lwekhuuba buli buulayi, bubuukhi ubwo bubururukukha khukhwaama mu masasari bukhutokotela.

¹⁴Ni musaambo niyo ndweela, kamakhula nako kaatokota isi buulamu bwoowo. Iwe nga waakafunile, kane ufune buulamu bwe buraangisi bubwikhoyesa, ni kumwiyikino kwoowo singene kufwe ta.

¹⁵Iwe ukheyalisa aasi khukhwibuulila umuundu umukwalaafu muungo mweewe ta, nga babaandu baabi ni bakhola ta, namwe ukhakhakakho khuunuula tsiingo tsaabwe ta.

¹⁶Lwekhuuba umuundu umukwalaafu anyala waakwa aasi kimiluundi musaafu, ne anyala khukhwinyukha luundi. Ne buukosi bwiitsa bwebwakala umuundu umwoonaki kumushiimba mutweela kwonyene bwaamumalilawo ilala.

¹⁷Ukhekhoya nga umusiku woowo waakwiile aasi ta, nga waaboone ataalataala atsya khukwa, ukhashisangaalila ta.

¹⁸Lwekhuuba shino shinyala shaalekha khwikhoyesa Umukasya ta, shaakila waarusa lirima lyeewe khu muundu uyo.

¹⁹Babaandu baabi bakhakila iwe weyembelela ta, namwe libuba lyaakhuwaamba lwe baboonaki ta.

²⁰Lwekhuuba umuundu umwoonaki s'alikho ni kumwiyikino kwe buulamu bubwiitsa ibweeni ta, buwaanga bwe baboonaki bukhaasimisibwe.

²¹Mwaana wase, ba ni khuurya isi Umukasya atweela n'umuyiinga, ukhetubaasa khuubo babaali banabumiinyi ta.

²²Lwekhuuba buukosi bulibakwiila kumuluundi mutweela kwonyene. Mbaawo umanyile shitaambiso shiina shishiliitsa khukhwaama isi Umukasya namwe isi umuyiinga ta.

²³Bino bili biilomo bibikanikhibwa ni babaandu be kamakhula: Sishili shiilayi umukayi khukhwiikhupila lubeka lutweela nga akhala kimisaango ta.

²⁴Umukayi ulekhuula umuundu umubi waatsya nga amulomela ari, “Iwe s'ulikho ni kumusaango ta,” babaandu bamubiyila luundi baamutsuba.

²⁵Ne umukayi ukhalila umwoonaki kumusaango kukumwaakhila, bibiindu bimutsiila buulayi, kane bamutsukhiilile tsikhabi tse kamaani.

²⁶Umuundu uuwa she khukhwiilamwo sha ŋali, shili nga kumwikhoyo kwe khuunuuna imunwa khwe buusaale.

²⁷N'ukhole tsiŋoonaŋoona tsoowo buulayi, ureekekhe buulayi buli shiindu she mu mukuunda kwoowo, lwanyuma wombekhe intsu yoowo.

²⁸Ukhakhakakho waawa bujulisi khu mwesanwa woowo nga mbaawo ilomo inyene ta, ilomo yoosi iye bubeeyi ikharurakho mu khanwa mwoowo ta.

²⁹Ukhelomela wamweene uri, “Ari intsya khumusasula lweesho sheesi akhola khusiise! Intsya khumusasula musaambo inyene isi aashikholamo” ta.

³⁰Nabirirakho aambi ni kumukuunda kw'omuundu umutoro, aambi ni nimilo iy'omuundu ukhamanya ta.

³¹Ne nabona nga kumukuunda kwoosi kwaasiimbamo kamawa, nga buli aandu oosi asiimba bunyaasi, nga ni luumako lwakhwo lwaakwa aasi.

³²Lwanyuma nga ni nabona shino, naakyelawo nashaambaasakho, naabakho ni sheesi niiyika shino:

³³Khukhwiiloosela khuukonakho liilo khakyeekhe, khukhwiiloosela khuwungukhila, weelayo waafuumba kamakhono koowo uri khaambolekho khakyeekhe,

³⁴lwanyuma lwayo butaambi bwiitsa bwaakhukulukhila nga n'ubona umunuuli nashikhola, kumweekho kukhwiibowakho.