Read lumasaaba Tsinikha 25 Bible Online

Tsinikha 25 - lumasaaba bible

Tsinikha 25

¹Tsino nitso tsinikha tsa Solomoni. Baakhulu ba Hezekiya, umuyiinga wa Yuda nibo babaatsihanula.

²Wele afuna shiriifwa lwe bibiindu byeesi abisa khu baandu, ne bayiinga babaabiweentselesa baabifumbula, baafuna lukoosi.

³Mbaawo umuundu unyala waamanya buuleeyi bwe khuuniina mu ngaaki bwe likulu, namwe buuleeyi bwe khukhwiikha aasi bwe shibala ta, nashiryo khukhwaambaasa khwe bayiinga mbaawo unyala waakhumanya ta.

⁴Nga waarusilemo bukyaafu khukhwaama mu feetsa, ifeetsa inyene iba yaaramile n'umubasi wayo, anyala waakikholamo shiibya shishaakhila.

⁵Nashiryo nga waarusilewo bumoyaani bwoosi khukhwaama mu lubili lw'omuyiinga, buwuli bweewe burama bubwiilama naabi.

⁶Nga uli mu moni ts'omuyiinga ukhakhakakho khukhwiyokesanisa nga iwe ufuura ta, namwe weyokesanisa nga iwe uuli uwe angaaki ta.

⁷Lwekhuuba shiba shiilayi umuwuli umweene khuukhuwa shiifwo she angaaki, khufuurisa ni bakyelawo baakhuwa shiifwo she aasi, waswaala. Nga waaboone buboni shishiindu,

⁸ukhayubakilisa khuushiyila w'omukayi ta. Ari iwe unyala waakhola uryeena, siinga nga umwesanwa woowo awotsa waakhufuura lwanyuma waswaala?

⁹Siinga iwe n'umwesanwa woowo mubakho ni sheesi mukhafukiilisanile ta, nimwikhale atweela mushiŋoone, ukhatsya waasalanisa lukaambo ta.

¹⁰Lwekhuuba babaandu babaandi nga baashiwuliile baryo, shikhureerera tsisoni, ni lisiina lyoowo lyoonakisibwa.

¹¹Ilomo iya ŋali niiba nga yaakanikhibwiile khu mbuka yayo inyene, ifwaana busa nga izaabu iili mu shiipo shishakholebwa khukhwaama mu feetsa.

¹²Ilomo iye khuuboolelela iyiitsa isi umuundu uwuliilisa, ifwaana busa nga shishiindu she lisuno shishikholebwa khukhwaama mu zaabu.

¹³Umurume umwiyikinwa awosawosa nga n'ubona kameetsi kamanyire khu mbuka iye likyesa iye bukhafu. Umurume ufwaana aryo awosawosa kumwoyo kwe baakhulu beewe.

¹⁴Umuundu usuubisa shiwaanwa ne waalekha khukhwoolelesa ta, afwaana nga namufweeli ni mbewo bibikhareera ifula ta.

¹⁵Khuubirira mu khwikhaliilikha, umuwuli anyala waashuusamwo shishambaaso sheewe, ni lulimi luluwooyawooya lunyala lwashuusakho bibyambaaso bye babaandu babaakhaandiila.

¹⁶Nga waanyoolile bubuukhi bwe ntsukhi, lyakho ubwo bubukhumala, siinga ulya buukali, bunyala bwaakhusomboosa kumwoyo waalusaka.

¹⁷Ukhenjilaka buli mbuka mu ntsu y'omwesanwa woowo ta, lwekhuuba n'utsyakayo naabi, kane umusine luundi akhubiyile.

¹⁸Umuundu ukanikha bye bubeeyi khu basheewe, afwaana busa nga iluungu iye busoolo, namwe lurima, namwe khaafumo khe buyiingo khakhokiya.

¹⁹Khukhwiyikina umuundu ukhali umwiyikinwa ta mu biseela bye buukosi, shifwaana nga umuundu unyaanya biilyo ni lisiino lilifunikhile, namwe ufwaana nga ukyeendela khu shikyele shishalemala.

²⁰Khukhweembela umuundu uuli mu mutaambo kumukali kimyeenya kye kumwikhoyo shifwaana busa nga uwaabulamwo shikwaaro mu biseela bye bunyifu, namwe khuutsukhaka kumuunyu mu likoontsyo.

²¹Nga umusiku woowo intsala yaamuliile, muwekho she khuulya, nga buulesa bwaamuliile, muwekho she khuunywa.

²²Lwekhuuba nga waakholile uryo, kane ube nga uli khuumwaasila kumulilo khu murwe kweewe[2], n'Umukasya kane akhuwe shiwaanwa shoowo.

²³Nga imbewo iyaama kwe ngaaki n'ireera ifula, ni lulimi lwe lukaambo nalwo luryo lureera buukhalafu.

²⁴Manya shiba shiilayi khuukona wenyene musoonda mwe shisuli she ntsu khu ngaaki, khuufuurisa n'ukona mu ntsu ndweela n'umukhasi uwilomaloma.

²⁵Kamakhuuwa kamalayi kakaama i aleeyi, kafwaana nga kameetsi kamanyifu isi umuundu uwe bulesa buukali.

²⁶Umuundu umukwalaafu khukhwiiwaanayo isi babaandu baboonaki, shifwaana nga khuutumbuusa kameetsi abe kakaakwiile buulayi.

²⁷Sishiba shiilayi khuulya bubuukhi bwe ntsukhi buukali ta, naluundi sishili shiilayi khuukana uri buli mbuka babaandu bakhusiime ta.

²⁸Umuundu ukhali ni khukhwiiwula umweene ta, afwaana busa nga shiriimba sheesi bafuniaakilekho luumako lwasho.