Read lumasaaba Tsinikha 26 Bible Online

Tsinikha 26 - lumasaaba bible

Tsinikha 26

¹Sishaakhila khuuwa umuundu umusilu shiriifwa shiikali ta, lwekhuuba shifwaana busa nga n'ubona kamararara kakaakwa khu mbuka iye kumuumu, namwe ifula khu mbuka iye shimiyu.

²Bitsubo bibikhali bibyoowo sibikhuwaambakho ta, ne bifwaana busa nga n'ubona namundyoole namwe khanywiinywi khakhapaamburukha nga khafulaafula busa nenga sikhakwa aasi ta.

³Uba ni kumukhomwa khuukhupa iŋwaaŋwa yaakyeenda buulayi, naluundi uba ni miimbo khuukhupa i sikilya, n'umuundu umusilu naye aryo akhaya khuukhupibwa.

⁴Siinga wiilamwo shireebo she buusilu sh'omuundu umusilu, nawe ufwaana busa nga umusilu mweene ushireebile.

⁵Ne siinga wilamwo shireebo sh'omuundu umusilu nga buusilu bweewe ni buli, uyo ushireebile kane ewulile ari s'ali umukyesi nga ni eyambaasa khuuba ta.

⁶Iwe niwiyikina umuundu umusilu, waamuwa buurume bwoowo khuukhuyilila ufwaana busa nga umuundu uwikhalilekho shikyele sheewe, namwe uyo unyweele buutwa.

⁷Lunikha lulurura khukhwaama mu khanwa kh'omuundu umusilu silulimo ni kamakhulu ta, lufwaana busa nga shikyele shishalemala.

⁸Uyo uruuya umuundu umusilu afwaana busa nga umuundu ubowa libaale mu kholoto.

⁹Lunikha lulurura khukhwaama mu khanwa kh'omuundu umusilu lufwaana busa nga umuundu umumeesi ni ekhala aasi khuurusa liiwa khukhwaama mu mukhono kweewe.

¹⁰Umuundu uwaandiikha uyo uuli umusilu khuumuraambila kimilimo kyeewe, namwe khuuwaandiikha umuundu ukyeendaana busa, afwaana busa nga umuundu umala kalasaka buufumo bwe buyiingo busa aryo.

¹¹Nga imbwa nikobolayo khuulya byeesi ilusakile, n'umuundu umusilu naye aryo elayo waakhola luundi bye buusilu byeewe.

¹²Waamanyakho umuundu uwilaanga umweene khuuba umukyesi? Umuundu umusilu aba ni kumwiyikino kumukali khuumufuura niye.

¹³Umuundu umutoro ekhala nga aloma ari, “Iliyo italanyi khu ntsila! Ilala ibulafu iyo mu mikhoosi kye shiriimba iliyo italanyi!”

¹⁴Nga n'ubona lulwiitsi lwe ntsu ni lushuukhila khu pata, umuundu umutoro naye akhola aryo nga ali khu shitaanda sheewe.

¹⁵Umuundu umutoro anyala waayila kumukhono kweewe mu sowaani, ne nga s'anyalisa ni khuusuta kumukhono kweewe kweene waakuniinisa imunwa ta.

¹⁶Umuundu umutoro ebona nga ali umukyesi naabi khuufuurisa baawi be kamakyesi musaafu.

¹⁷Umuundu uwitubila mu khulomana khukhuukhali khukhweewe ta, afwaana busa nga umuundu ukhweesa khukhuru khwe mbwa iili khuubira khu ntsila.

¹⁸Nga n'ubona umuundu umupeme namwe umutiimi ulasaka buyiingo busa aryo bwaakhoonya babaandu,

¹⁹niye umuundu utsya waawombesa umwesanwa weewe, lwanyuma waakyelawo waamulomela ari, “Imbeele iŋaaya busa.”

²⁰Nga n'ubona kumulilo ni kusima nga tsiikhu tsaaweelewo, ni khuulomana nakhwo khuryo khwaakama nga lukaambo lwaakamile.

²¹Kamaanda ke kumulilo kareera buukhafu, ni tsiikhu tsaaburusa kumulilo, naye aryo umuundu uwe buurafu buukali nga n'arakikha bisaayuumba.

²²Bilomo by'omuundu uwimoonyelesa ni lukaambo biŋaaha naabi, lwekhuuba umuundu ubirekeeresa abimila byeekha mu byambaaso mukari.

²³Biilomo biilayi bibikanikhibwa khu ngaaki busa ne nga mu mwoyo mukari mulimo buubi bwonyene, bifwaana nga inyuungu iye liloba iyawakhibwakho ni ifeetsa khu ngaaki.

²⁴Umuundu umubeeyi anyala waabisa bubiiyile aasi mu mwoyo kweewe, ne nga emiliisa busa khu ngaaki.

²⁵Umuundu ufwaana aryo akhakanikha buulayi arye, ukhamufukiilisa byeesi aloma ta, lwekhuuba mu mwoyo kweewe mwaayitsula buubi buukali naabi!

²⁶Umuundu uyo anyala waabisa buubi bweewe ubwo, ne imbuka yoola babaandu baabona bibiindu biibi byeesi akhola.

²⁷Umuundu urekela basheewe kumureko ari bakukwemo, umweene ashuukha waakukwamo, ni nooyo upiringisa libaale ari litsye likhupe babaandi, likhaashuukhe limuminiaangulake umweene.

²⁸Khuukanikha bye bubeeyi uri nio utsiinise babaandi shimanyisa shiri waababiyila, ni khuubawombesa uba ukana khuubahesa.