Read lumasaaba Tsinikha 27 Bible Online

Tsinikha 27 - lumasaaba bible

Tsinikha 27

¹Ukheyiingayiinga nga uloma uri kane woole khu shifukhu she kumukaamba ta, lwekhuuba iwe s'umanya shifukhu sheene she kumukaamba shikhaareere shiina ta.

²Ulekhelatsaka babaandu babaandi khuukhubuyila iwe, abe yakhaba abo babaakhakhumanyilekho ta, ne ukhebuyilatsaka wamweene ta.

³Libaale lyaasitowa, ni kumuyekhe kulimo buusiro, ne buukosi bweesi umuundu umusilu areera, bwaasitowa khuubifuura nibyo byoombi.

⁴Lirima lyaarafuwa, ni buurafu bukhulekha waasaamiliile busa, ne libuba lili liibi naabi khuufuura byoosi.

⁵Shiba shiilayikho khuureewula umuundu nga mbaawo she khuutsisatsisa ta, khuufuriisa khuukana khukhwiitsisatsisa.

⁶Kamakuma keesi umuundu umusaale akhuupa, kafuurira aleeyi umuundu uuli umusiku woowo khukhwiitsa waakhuukwa mu shifuba.

⁷Umuundu uliile wekura buulayi, ni bubuukhi bwe ntsukhi sibumuŋaayila ta, ne uyo isi intsala ilya, shishiindu shishaluluwa shimubeela shitokota.

⁸Umuundu uraawukha waarura muungo mweewe, afwaana nga khanywiinywi khakharaawukha khaarura mu shiswi shakho.

⁹Kamafura ke khukhwiyaakha kakawunya buulayi kakhureerera kumwikhoyo, ni buulayi bw'omusaale bureera khuubeesabeesa khwe mukari.

¹⁰Ukhebilila umusaale woowo, namwe umusaale wa paapa woowo ta, nga buukosi bwaakhukwiilekho, unyala waalekha khutsya mu ntsu ya waandaayo lwe buyeeti ta. Umuundu umwesanwa ukhuli aambi, afuura waandaayo umenya aleeyi naabi.

¹¹Ingana ube ni kamakhula mwaana wase, untsikhoyese kumwoyo kwase, nio nase inyalise khukhwiilamo umuundu yeesi uwiitsa khukhuuntsekhelela.

¹²Umuundu uwe kamakhula nga waaboone buukosi bwiitsa, akhakakho khuubwiwoma weebisa, ne umusilu niye akyeendaka busa, waatsya waabukwamo.

¹³Uli ni khuuyila shikwaaro sh'omuundu nga she khukhwiyimilila siinga nga umuundu uyo aba nga weyimiliile umuundu ukhali umumanye, yaakha khuubawo sheesi akhulekhela n'aba nga weyimiliile babaandu banaambo.

¹⁴Umuundu yeesi uwuuna kumutikhinyi waakheesa umwesanwa weewe ni sangaalo ni liyoombo liikali, shinyala shaayilibwa khuuba shiitsubo.

¹⁵Umukhasi umulomani afwaana nga ifula iye lumunyakiliisi iroonyaka toki toki toki toki.

¹⁶Khuukhakakho uri umwaakamise khukhwiilomaloma, ufwaana busa nga uwaakamisa imbewo, namwe ufwaana busa nga uwaamba kamafura kakaarerera mukhono.

¹⁷Nga n'ubona shishuuma ni shiwakala shishuuma shashe, umuundu naye aryo awakala uwasheewe.

¹⁸Umuundu uloolelela kuusaala ku figi buulayi, alyakho kamatuunda kaakwo, n'umwakaanisi ukhiinga umukoosi weewe buulayi, bamuwa lukoosi.

¹⁹Nga niwibona mu moni mwoowo nga waalolile mu meetsi, ni bibyambaaso by'omuundu nabyo biryo byokesanisa umuundu nga n'afwaana.

²⁰Nga kamakoombe ni khuufwa ni bikhekura ta, ni tsimoni ts'omuundu natso tsiryo sitsikura ta.

²¹Kumulilo nikwo kweesi baraambisa khuupyeeluusa izaabu ni feetsa, ni lisuno ly'omuundu libonekhela mu biilayi byeesi babaandi bamukanikhakho.

²²Unyala waara umuundu umusilu mu shibwiili waamutsuungaka ni kumutsuungilo, ne s'unyala waamurusamwo buusilu bweewe ta.

²³Uli ni khuulolelela kamakheese koowo ni tsikhaafu tsoowo buulayi nga n'unyala uryo ureyo kumwoyo khuubiloolelela,

²⁴lwekhuuba buyiindifu sibubawo imbuka indeeyi ta. Ni kamanaambo nako sikamenyawo biilo ni biilo ta

²⁵Ukhala bunyaasi, lwanyuma waakhala bunyaasi bwe khu ngoongo, nga umanya uri bubuundi butsya khurura.

²⁶Unyala waakhola bikwaaro khukhwaama mu bwooya bwe kamakheese koowo, waakula ni liiswa khukhwaama mu mapeesa keesi ufunile mu khukulisa tsimbusi tsoowo.

²⁷Ni khukhwaama mu mbusi tsitsiramile, waafunamwo kamabeele, kakoowo wamweene ni be muungo mwoowo, ni babaakaanisi boowo bekhaana.