Read lumasaaba Tsinikha 28 Bible Online

Tsinikha 28 - lumasaaba bible

Tsinikha 28

¹Umuundu umwoonaki anyala wekhuuna tsiindimo nga mbaawo umuundu uuli khuumutimisa ta, ne bakwalaafu baba baanyindaalifu nga italanyi.

²Nga linaambo lyetsuulemo buubi buukali, libamo ni baaraangilisi baakali, oyu arurawo, oyu elawo. Ne umuundu uuli ni kamakhula ni khuumanya areerawo lukoosi lweloosela.

³Umuraangilisi umutaambi umiinikhilisa babaandu, afwaana nga ifula ikhupa yoonakisa biilime.

⁴Babaandu babaakhakana kamakaambila khuuraamba ta, baruuya abo babaali baabi, ne abo babaaloondelela kamakaambila, basoolanisa baabi abo.

⁵Babaandu baabi sibamanya isaambo iye khuubirisamwo babaandu babaandi buulayi ta, ne abo babaaloondelela Umukasya baabumanyila ilala buulayi.

⁶Shifuura buulayi khuuba umutaambi ne nga uli umwiilama, khuufuurisa khuuba umuyiindifu ne nga umumoyaani.

⁷Umusooleli uloondelela kamakaambila aba ali ni kamakhula, ne uyo ukyeendela atweela ni basaale be kumuluungo awaambisa paapa weewe kamaŋaanyu.

⁸Umuundu uyiinga buukusi bwe bibiindu byeewe nga akana kamafuurisa kamakali, ibwakaamilo kamafuurisa ako katsya mu wootswa iy'omuundu utsiinikhanila abo babaali bataambi.

⁹Umuundu ukhakana khuuwuliilisa byeesi kamakaambila kaloma ta, ni khuuloomba khweewe khuba khwe mbikho isi Umukasya.

¹⁰Umuundu uyila umukwalaafu khuutsya mu ntsila iye khukhwooneka, aba atsya khukwa mu mureko kweewe umweene, ne abo babaali babeelama, batsya khusikhila bibiindu biilayi.

¹¹Babaandu bayiindifu beebona babeene nga bali bakyesi, ne umuundu umutaambi uuli ni khuumanya abamanya tsisaambo tsaabwe tsoosi.

¹²Nga babaandu bakwalaafu baaniinaniinile angaaki, ibawo kumwikhoyo kwe shiriifwa, ne abo babaali baabi nga baafunile buwuli, babaandu batima baatsya beebisaka.

¹³Umuundu utsisatsisa bibyoonako byeewe saatsya khuba buulayi ta, ne siinga wibiiyisa lwanyuma waabilekha, bakhuwaambila shiisa.

¹⁴Ali ni tsikhabi umuundu uurya Umukasya buli mbuka, ne uyo uuli ni shikili wahangasa kumwoyo kweewe, atsya khufuna buwaangafu.

¹⁵Nga n'ubona italanyi ibuutsa, namwe shibulukhu shishiweentsa she khuulya, n'umuwuli umumoyaani naye afwaana aryo isi babaandu babaakhenyala ta.

¹⁶Umuwuli ukhali ni khuumanya ta amiinikhilisa babaandu buubi naabi, ne uyo ukhakana kamafuurisa kakaakhalimwo ta, alooselakho buulamu bweewe.

¹⁷Umuundu umwiiri ataambisibwa mu byambaaso byeewe ni kamafuki k'omuundu isi eera, khayo abe aryo khukhwoolesa mu khufwa, ikhabawo umuundu umuyeeta ta.

¹⁸Umuundu uuli umwiilama aliwonesebwa khukhwaama mu bubi, ne uyo uwaborokha atsya khuhelela mwilowo.

¹⁹Umuundu uraamba ni kamaani waakhabala liiswa lyeewe, atsya khuba ni biilyo biikali naabi, ne uyo uwikhala khuumala busa imbuka afuna bikosi biikali bye butaambi.

²⁰Umuundu umwiyikinwa alifuna shiwaanwa she buyiindifu, ne uyo ukana khuufuna buyiindifu bwa khaangu akwa mu bikosi.

²¹Khukhwikhupila luwaande lutweela sishili shiilayi ta, ne ate nga iliwo babaandu babaandi babaakhola biibi lwekhuuba bakana khuufuna shibaakyo she kumukaati.

²²Umuundu uwe kumuluungo akhakakho naabi khuukana khuuba umuyiindifu, ne ate nga s'amanya ari atsya khukwa mu butaambi ta.

²³Umuundu uwikiitsa ukuundi khuumukolomosa, lwanyuma lwayo bamusiima, khuufuurisa uyo uwimiliisa busa khu ngaaki.

²⁴Umuundu uwiiba khu paapa namwe khu maayi weewe, lwanyuma waaloma ari, “Mbaawo shiibi shoosi ta,” umweene uyo aba ali mutweela khu muundu uwoonakisa.

²⁵Umuundu uwe kumuluungo areera bikosi, ne uyo uwiyikina Umukasya alifuna biilayi.

²⁶Umuundu uwiyikina khuumanya khweewe yenyene aba ali umusilu, ne uyo ukyeendela mu makhula aba buulayi.

²⁷Umuundu ukabila bataambi singene abekho ni sheesi ekoomba ta, ne uyo ufunyikhilisa tsimoni tseewe akhaafune shitsubo.

²⁸Babaandu baabi nga bekyelile baawuli, babaandu batitukha baatsya mu khwibisa, ne isi bafunila biikosi baawawo, bakwalaafu babalaaha.