Read lumasaaba Tsinikha 29 Bible Online

Tsinikha 29 - lumasaaba bible

Tsinikha 29

¹Umuundu isi bekhala nga bareewula, ne waarama nga waaminyaalile, imbuka yoola waahela nga mbaawo buyeeti bubuundi ta.

²Nga baawuli bakwalaafu babeele mu buunyala, babaandu basangaala, ne siinga baabi baba nga nibo babaawula, babaandu baba ni kumutaambo.

³Umuundu ukana naabi khuuba ni kamakhula areerera paapa weewe kumwikhoyo, ne uyo ukana naabi khukhwikhala ni bamalaaya, onakisaka busa buyiindifu bweewe.

⁴Umuwuli umwiilama areerera linaambo lukoosi, ne uyo ukana naabi khuulya iwoongo, alyoonakisa.

⁵Umuundu ubuyila uwashe nga emiliisa busa khu ngaaki, aba werekeele kumureko bikyele byeewe.

⁶Umuundu umwoonaki ebowa umweene lwe buubi bweewe, ne uyo uuli umukwalaafu anyala khukhwiimba kumweenya luundi nga ali umusangaafu.

⁷Umuundu umukwalaafu enaanayo lwe buulayi bw'omutaambi, ne uyo uuli umwoonaki s'enaanayo na khafwiiti khari ta.

⁸Babaandu banywaanywa bayumbaasa shiriimba shoosi, ne abo babaali bakwalaafu bawosawosa lirima.

⁹Siinga umuundu uwe kamakhula ayila umuundu umusilu w'omukayi, mbaawo sheesi anyala waafunamwo ta, lwekhuuba umusilu uyo akhweenula busa ni khuukhupa liyoombo.

¹⁰Babaandu babaakana naabi khuukhoonya babaandi, babiiyila abo babaakhalikho ni kumusaango ta, ne abo babaali bakwalaafu baweentsa isaambo iye khuubawonesa.

¹¹Umuundu umusilu okesanisa lirima lyeewe lyoosi, ne uyo uuli umukyesi akhakakho naabi khukhwiwula mu mbola busa.

¹²Siinga umuwuli akhalawo khuuwuliilisa bye bubeeyi byonyene, baakhulu babaandi babaaba ni naye nabo baba babeeyi.

¹³Iliwo isi umutaambi ni nooyo umumiinikhilisa baakaananila; Umukasya niye ubanyalisa boombi khuubona.

¹⁴Siinga umuyiinga aba uwaŋali khuukaya abo babaali bataambi, buwuuli bweewe bubawo biilo ni biilo.

¹⁵Khuukwalaasa ni khuulatsakakho khukila umwaana waaba ni kamakhula, ne umwaana isi balekha waatsowaka busa aryo areerera maayi weewe kumutaambo.

¹⁶Babaandu baabi ni baba nga bali mu bunyala, buubi bwiloosela, ne babaandu babaarya Wele kane babewo baalamu bababone nga bakwa.

¹⁷Ulatsakakho umwaana woowo lwe tsisaambo, ni naye lwanyuma kane akhureerere lukoosi ni kumwikhoyo.

¹⁸Nga yataambilewo khuuraangililwa khwa Wele, babaandu sibaba mu lukoosi ta, ne bali ni tsikhabi abo babaloondelela kamakaambila.

¹⁹Khuuraambisa tsilomo tsonyene sitsinyala tsaakwalaasa umwakaanisi ta, lwekhuuba abe yakhaba nga waareekeresile waamanyile buulayi, anyala waalekha khutsitsiilakho ta.

²⁰Waamanyakho umuundu ukanikhaka naabi nga waakhunyoowa khukhwaambaasa ta? Umuundu umusilu aba ni kumwiyikino kumukali khuumufuurakho niye.

²¹Umuundu uwinaanayo khuukabila umwakaanisi weewe buli shiindu sheesi akana khukhwaama mu bwaana, luliba lutweela amuyilekho bibiindu byeewe byoosi.

²²Umuundu utiindiima ni lirima lya khaangu naabi areera khuulomana khuukali, naluundi akhola bibyoonako biikali.

²³Umuundu uuli ni khukhwiyiingayiinga khuukali khukyelawo khwaamuruura aasi, ne uyo uuli umuwolu akyelawo waafuna shiriifwa.

²⁴Umuundu uyeeta umwiifi aba etsiinisa busa umweene; umweene uyo aba waayitsuba khuukanikha byaŋali ne waasila busa tsu.

²⁵Umuundu uwikhala nga aryaryamukha lwe babaandu, akwa mu mureko kwa busa, ne uyo uwiyikina Umukasya aba buulayi.

²⁶Babaandu baakali baweentsa khuusiimibwa n'umuwuli, ne Umukasya niye ukhukhalilawo khufuura buulayi.

²⁷Babaandu bakwalaafu sibakanilakho ilala abo babaakhali bakwalaafu ta, ni baabi nabo balekelesa abo babaarya Wele.