Read lumasaaba Tsinikha 3 Bible Online

Tsinikha 3 - lumasaaba bible

Tsinikha 3

¹Mwaana wase, ukhebilila biilomo byase byeesi ikhuleekela iwe ta. Ne wiliindatsaka kamakaambila kaase mu mwoyo kwoowo.

²Lwekhuuba bibyeene bino kane bikhuliinde uwaangale kimiiko mikali, naluundi bikhuwe buulamu buulayi bubwikanisa.

³Ukhalekhuula khuukana khukhuukhawawo ni bubwiyikinwa byaakhururakho ta. Uli ni khuubibowa mu milo mwoowo, bibonekhelele nga bubuuma bwe mu milo; ubirone khu mwoyo kwoowo mukari.

⁴Musaambo iyo kane ufune bubweela ni lisiina liilayi mu moni tsa Wele, ni mu moni tse babaandu.

⁵N'uwiyikinatsake Umukasya ni kumwoyo kwoowo kwoosi, Ukheyikinatsaka byeesi iwe wambaasa uri waamanya ta.

⁶Uli ni khuushebulilatsaka Umukasya mu buli shiindu shoosi sheesi ukhola, ni naye kane akhutsalaasile kumukhoosi kwoowo buulayi khweesi kane ukyeendele.

⁷Ukheyambaasatsaka khuuba uuli ni kamakyesi kakaafuura ke babaandi ta, ne uli ni khuurya Umukasya wikaane khuukhola bye bubwoonaki.

⁸Nga waakholile uryo, kane bifwaane nga kamasuuswa mu mubili kwoowo, ni khukhwiwulila buulayi mu makuumba koowo.

⁹Yiisatsakamwo Umukasya shiriifwa, nga uwaanayo khu bye buyiindifu byoowo, ni khuuwaanatsakayo biilime bibinyoowa khukhwaama mu mukuunda kwoowo.

¹⁰Nga waakholile uryo, ukhaabuunge birara byoowo ni biilyo bikhupake biikali, ni kamasuuriro koowo kakheetsule iviini, utaambe isi ukibiikha.

¹¹ Mwaana wase, ukhalekelesa khuuboolelela khw'Omukasya ta, namwe waamuminyaalila nga akhureewula ta.

¹²Lwekhuuba Umukasya aleekela abo beesi akana, nga n'ubona paapa n'aleekela umwaana weewe isi akana naabi.

¹³Ali ni tsikhabi umuundu ufuna kamakhula, ni nooyo uuba ni khuumanya.

¹⁴Lwekhuuba kamakhula kali ke lisuno khufuurakho ifeetsa, naluundi niko ke lisuno naabi khuufuurakho izaabu.

¹⁵Kamakhula kali ke lisuno naabi khuufuura bubuuma bwe buukusi bwe angaaki, mbaawo shishiindu shoosi sheesi ukana shishinyala shafwaananakho ni nako ta.

¹⁶Kamakhula kakhuwa iwe buulamu bwe kimiiko kimikali, naluundi mu niko mulimo buyiindifu ni shiriifwa.

¹⁷Kamakhula kakhola buulamu bwoowo bwaaba bubwikhoyesa, naluundi kakhuraangilila khu mukhoosi kwe lukoosi.

¹⁸Kamakhula kali nga kuusaala kukureera buulamu isi abo babaakakaanila, naluundi abo babaakewaambakho, bali ni kumwikhoyo.

¹⁹Umukasya aaraambisa kamakhula keewe khuubuumba shibala, aaraambisa khuumanya waarawo likulu.

²⁰Kamakhula keewe niko kakaakila tsintsitsi tse kameetsi tsaarubukha, ni kamafuumbi khuulakasa liime.

²¹Mwaana wase, yiwaambila ilala khu makhula ni khuumanya. Ukhabilekhuula byaakhururakho ta.

²²Kamakhula ni khuumanya kane nibyo bibe bikhuyeeta khuuba umulamu, ni khuuba ni buulamu buulayi luundi bubwikhoyesa.

²³Lwanyuma nio iwe ukyeende mu ntsila yoowo ni lukoosi, ni shikyele shoowo shilekhe khukhwituya na khakyeekhe khoosi ta.

²⁴Nga waakonile aasi singene ubekho ni khuurya khwoosi ta, naluundi nga waakonile aasi mu bulili bwoowo, kane ukone liilo nameyirira lilyeene.

²⁵Ukharya lwe buukosi bubukwakawo khaangu ta, namwe lwe khuuhela khwe baboonaki khukhuuba khwaaboolilekho ta.

²⁶Umukasya umweene kane akhuliinde buulayi, singene afukiilile iwe ukwe mu mureko ta.

²⁷Khola buulayi isi babaandu boosi babaakana buyeeti, musaambo yoosi isi uba unyalisa khuushikhola.

²⁸Ukhaboolela umwesanwa woowo khuutsya aliindekho khukhwoolesa kumukaamba, ate nga unyalisa khuumuyeeta shaleelo shino ta.

²⁹Ukhambaasa khuukhola buubi khu mwesanwa woowo ta, niye amenya aambi ni nawe, nga akhwiyikina.

³⁰Ukhakhaabisana n'umuundu yeesi akhali ilomo yoosi ta, ate nga mbaawo shiibi shoosi sheesi umuundu uyo akhukholile ta.

³¹Libuba likhakhuwaambila umuundu uwe shituluungu ta, namwe waakhalawo khuuloondelela she khuubonelakho she buraambi buubi ibwo ta,

³²lwekhuuba Umukasya s'akana babaandu babaakhola buubi ta, ne babaakhola bye buukwalaafu, abakhola khuuba basaale beewe.

³³Umukasya ara bitsubo khu tsiingo tse babaandu babaakhola bye bubwoonaki, ne tsiingo tse bakwalaafu atsiwa tsikhabi.

³⁴Niye atsekhelela abo babaakanikha biilomo bye khuutsekhelela, ne okesanisa bubweela bweewe isi babaali baawolu.

³⁵Abo babaali ni kamakhula baliba baasikha be shiriifwa, ne abo babaali basilu bakhelooselekho khuuswaala.