Read lumasaaba Tsinikha 30 Bible Online

Tsinikha 30 - lumasaaba bible

Tsinikha 30

¹Biilomo bino bili biilomo bya Aguri umusooleli wa Yake, nga bilimo buurume buno: “Ise naaluwile, O Wele; Ise naaluwile![3] Ise inyala ndyeena naabawo imbuka indeeyi?”

²Ise niye ufuura buusilu mu baandu boosi; Ise siindikho ni kamakyesi ke busaalikhana ta.

³Ishiili khukhwiyika buulayi kamakhula ta, naluundi ise ishiili khuumanya buulayi bibiwaamba khu Mukhosefu ta.

⁴Naanu niye uwaniinakho mwikulu waamala waakobola khu shibala? Naanu uwabuusanisakho imbewo mu bikalabo byeewe? Naanu niye uwatsya nga afunyaka kameetsi nga shiikwaaro? Naanu uwabuumba ibwakamilo we shiibala? Lisiina ly'omweene niye bari naanu, naluundi lisiina ly'omusooleli weewe bari naanu? Ilala ise naakhumanyakho ta!

⁵Buli ilomo ya Wele yoosi ili iyaŋali; niye ali ingabo iya buli muundu yeesi uutsya khuufuna bubwilukhilo mu niye.

⁶Ukhakhakakho khuulooselakho khu bilomo byeewe ta, lwekhuuba akhureewula, lwanyuma waakhwookesanisa iwe nga n'uli umuwombesi.

⁷O Wele, ikhuloomba ukholeleyo bibiindu bibili byonyene; Injeete imbifune nga ishiili khufwa ta.

⁸N'unjeete ise imbe umwiyikinwa, indekhe khuba umuwombesi na khakyeekhe khari ta; naluundi ukhaakhola naaba umutaambi naabi namwe naaba umuyiindifu naabi ta. Ikhuloomba indi umbe biilyo bibiimala busa.

⁹Ise nga naabeele ni bye buyiindifu biikali naabi, inyala naakhwiibilila, namwe nga naabeele na bikyeekhe biri, inyala naatsya neeba byabeene, noonakisa lisiina lyoowo.

¹⁰Ukhatsya waakhupa umwakaanisi liyino isi umukhulu weewe ta, umuundu uyo naye anyala waakhutsuba iwe, waafuna biwaangafu.

¹¹Iliyo babaandu babaatsuba ba paapa baabwe, baalekha khuwa ni ba maayi baabwe lukoosi ta.

¹²Iliyo babaandu babeene babebona nga sibalikho ni shiibi shoosi ta, ate nga balikho ni buumoyaani bweesi bashiili khukhwisiinga ta.

¹³Iliyo babaandu babaandi babebona nga bali be angaaki naabi mu moni tsaabwe babeene, ilala beyambaasakho nga bali be angaaki naabi.

¹⁴Iliyo abo babaali ni kameeno kakaali busa nga tsiindima, kameeno kaayokiya nga kimibano; bamalawo babaandu baataambi khu shibala, ni naabo babaakhenyala ta khuubarusawo babamalewo.

¹⁵Inyiinya ili ni bakhaana baayo babili babekhala nga buli mutweela elootsa ari, “Imbe ise, Imbe ise.” Iliyo bibiindu bitaru bibikhekura ta; iliyo bine bibikhaloma biri, “Isho shimala ta!”

¹⁶Imakoombe, umukhasi umukuumba, liloba lilyoomu, ni kumulilo kukuutindiima sikuloma kuri “Nokhile shishiimala ta.”

¹⁷Siinga umuundu alekelesa paapa namwe waaminyaalila maayi, binywiinywi kikhoolo bikheetse bisomolake tsimoni tseewe, ni namuturu kiitse kilye kumubili kweewe kukuramile.

¹⁸Iliyo bibiindu bitaru bibintsiyaangisa ise, iliyo bine byeesi ikhamanya ta:

¹⁹isaambo isi kunywiinywi waasu kwiwuta mu ngaaki, isaambo isi indemu ireremukhila khu lwaanda, isaambo isi imeeri iselengelela khu meetsi mu nyaantsa, ni isaambo isi umusaani awooyamo umukhasi.

²⁰Iyino niyo isaambo isi mukhasi malaaya ebirisamo: uri waamala khuulya, wekhuyaka imunwa, lwanyuma waaloma ari, “Mbaawo shiibi sheesi ikholile ta.”

²¹Iliwo bibiindu bitaru bibiikila shibala shaanikina, iliwo bine byeesi shikhanyala shekhaliilikha ta:

²²umukulwa uwikyela umuyiinga, umuundu umusilu ufuna buli sheesi akana shoosi,

²³umukhasi umubiyiile ufuna umusaani wakhwaalikha, umukhasi umwakaanisi uyila shiifwo sh'omukhasi umweene ango.

²⁴Iliwo bibiindu bine khu shibala bibiili biikyeekhe naabi, ne nga byaakyesiya luukali:

²⁵namakye bili bibuumbe bibiikhali bye kamaani ta, ne ate nga bibuungila biilyo khuumala imbuka yoosi iye buukhafu;

²⁶Buusolo bubuumenya mu fwa tse lulwaanda, nibwo sibuli bwe kamaani, ne ate bwiyombekhela tsintsu tsabwo mu lwaanda;

²⁷Tsisike nitso sitsili n'umuyiinga ta, ne tsikhuumbila atweela nga liiye khuusintsiila mu bukhulu bwatso;

²⁸Imbakilya isi unyala waanyoola waahaamba busa, ne ukinyoola mu bifwo nga lubili lw'omuyiinga.

²⁹Iliwo bibiindu bitaru bibikyeenda nga biiwulila lwe bukhulu bwayo; bili bine bibikyeendela angaaki:

³⁰italanyi iili nga niyo ikhulila bisolo byoosi, ikhanyala yeshebukha inyuma lwe khuurya shishiindu shoosi ta,

³¹Itwaaya ikyeenda nga yiwulila, imbusi indurume, n'umuyiinga nga alikho akyeendela iburaangisi we liiye lyeewe.

³²Iwe n'uba nga ubeele umuundu umusilu ukyeenda nga eyiingayiinga, namwe nga ubeele ukholela baashoowo tsimbomelo, ambakho imunwa woowo ushaakamise.

³³Khuukulula naabi kamabeele kabowa, khuumiiina naabi kamoolu, karuramo kamafuki, ni khukhwinyusa lirima nakhwo khureera biisayuumba.