Read lumasaaba Tsinikha 31 Bible Online

Tsinikha 31 - lumasaaba bible

Tsinikha 31

¹Bino bili biilomo bya Lemuweli, uwaba umuyiinga we Masa, byeesi maayi weewe aamuleekela.

²O, iwe mwaana wase Lemuweli, O mwaana we mu mala kaase, O mwaana wase, wuliilisa bibiitsubo byase.

³Ukhemalila kamaani koowo khu bakhasi ta, khukhwiiwaanayo isi abo babaahesa bayiinga ta.

⁴O Lemuweli, sishili shiilayi isi bayiinga, ilala sishili shiilayi bayiinga khuumilaka iviini ta. Bawuli sibali ni khukhwiwotooma busela namwe indali ta.

⁵Lwekhuuba siinga banywa bameela, banyala bebilila kamakaambila keesi baabirisa, baarakikha khuubirisaka buubi babaandu tsana babaakana buuyeeti.

⁶Indali iweebwa babaandu babaali khuufwa, ni iviini iweebwa abo babaali mu mutaambo.

⁷Ubalekha nibo baanywa nio bebilile butaambi bwaabwe, naluundi nio balekhe khushebulila kumutaambo kwaabwe ta.

⁸Uli ni khuukanikhilila abo babaakhanyala khukhwikanikhila babeene ta, ubone uri wiimikhawo khu lwaabo babaakhenyala ta.

⁹Uli ni khuubakanikhila, wiimilile abo babaali bataambi luundi babaakhenyala ta, bafune bibibaakhila.

¹⁰Naanu unyala khuunyoola umukyelama umwiilama? Ali uwe lisuno khuufuurakho ni kamabaale ke buukusi bwe angaaki naabi.

¹¹Umuseetsa weewe amwiyikina naabi, naluundi mbaawo sheesi umuseetsa weewe ekoomba ta.

¹²Byeesi amukholela biilayi byonyene mu buulamu bweewe bwoosi, mbaawo buukosi bweesi amureerera ta.

¹³Atsya waheentselesa bubwooya bwe kamasheese, ni bibikhola bibiindi, waaruungamo bikwaaro nga araambisa kamakhono keewe akhali khuuwaanyinyibwa ta.

¹⁴Niye ali busa nga imeeri iselengelela khu nyaantsa nga ikhola bye buukusi, atsya waamisa biilyo byeewe khukhwaama i aleeyi naabi.

¹⁵Enyukha nga antsye ashiili mamilimili naabi khuuŋoonaŋoonela be muungo mweewe she khuulya, naluundi waarekekhela bakhaana beewe baraambi kimilimo kye khuukhola mu shifukhu isho.

¹⁶Nga waambaasile khu mukuunda kwoosi atsya waakukula, nga araambisa tsinusu tseesi umweene ekholeele, atsya waabyaala mu mukuunda biilime.

¹⁷Umukhasi uyo ali umuraambi unyala naluundi ali uwe kamaani naabi.

¹⁸Waamanya mbuka shiina iili indayi iye khuukholelamo kamafuurisa, ni itaala yeewe yiikhala nga yaaburukha shiilo shoosi.

¹⁹Araambisa kamakhono keewe kameene khuuruunga, ni buwuutsi abukholamwo biikwaaro.

²⁰Ali umulayi ayeeta ni bataambi, weekulawo kimilyaango kyeewe isi abo naabo babaakhenyala ta.

²¹S'ekhala wehembelela lwe bubwiile bwe bunyifu nga bweetsile ta, lwekhuuba buli mutweela khu baandu be muungo mweewe ali ni she khukhwiibiimba.

²²Umweene ekholela tsisuukha tse khukhwibiimba khu bulili bweewe. Umweene akwaara tsingubo tsitsibonekha buulayi tsiinandaafu.

²³Umuseetsa weewe waamanyikhana naabi mu shiriimba, ekhala atweela ni baaraangilisi babaandi baakhulu mu shibala.

²⁴Ekholela biikwaaro bibireremukha atweela ni kimisipi, waabikulisa isi abo babaakhola bye buukusi.

²⁵Umweene ali ni kamaani luundi ali uwe bubwiilama, aryo s'ekhala weheembelela lwe mbuka iyiitsa iburaangisi ta.

²⁶Nga weenyusile kumunwa kweewe khuukanikha, biilomo byeewe bili bye kamakhula, naluundi aleekela nga ali ni shiisa shiikali.

²⁷Ni bubwitsiliilisi buukali, alolelela buulayi bibiindu bye muungo mweewe, s'ekhalakho aasi waaleendaala busa ta.

²⁸Babaana beewe bamwiisamo shiriifwa nga bamusiima, luundi n'umuseetsa weewe umweene amuruuya naabi ari:

²⁹“Iliwo bakhasi baakali naabi babaali ni kamakhula ke angaaki, ne iwe ubafuura boosi.”

³⁰Khuubonekha buulayi khuuwombesa busa, ni bumiliwu sibubawo imbuka indeeyi ta, ne umukhasi urya Wele bali ni khuumuruuya.

³¹Umuwa shiwaanwa lweebyo byeesi akholile ni kamakhono keewe. Lekha buuraambi bweewe bwa lubuula bwokesanise khuuruuyibwa khweewe.