Read lumasaaba Tsinikha 4 Bible Online

Tsinikha 4 - lumasaaba bible

Tsinikha 4

¹Baananywe, ni murekeerese buulayi byeesi paapa weenywe abaleekela. Rekeeresa buulayi nio mufune khuumanya.

²Lwekhuuba ise byeesi imbaleekela bili biikhulu naabi, nashiryo mukharura khu khuleekela khwase ta.

³Ise ni naba nga ishiili mwaana busa mu ntsu ya paapa wase, nga ndi mukyeekhe busa naluundi nga ndi umwaana senyene isi maayi wase,

⁴paapa wase abe andeekela. Abe amboolela ari, “Ushebulilatsaka biilomo byase, ukhabiibililatsaka ta. Waakha khuuwaambila ilala biilakilo byase, ni nawe kane ube mulamu.

⁵Funa kamakhula, luundi ufune khuumanya, ukhebililakho na khakyeekhe, waalekha byeesi ikhuleekela iwe ta.

⁶Ukhalekha kamakhula ta, lwekhuuba niko kane kakhukhiinge iwe, n'ukakane naabi, ni nako kane kakhuliinde buulayi.

⁷Kamakhula kali shishiindu shikhulu naabi; nashiryo funa kamakhula. Mu buli shiindu shoosi sheesi ukhakakho khuufuna, funa khuumanya.

⁸Yila kamakhula nga shishiindu she angaaki naabi, ni nako kane kakhuniinise angaaki. N'ukawaambe ukomiisile ilala, nako kane kakhureerere shiriifwa.

⁹Niko kane kakhukwaarise khu murwe kwoowo lihabi lye shiriifwa, kane kakhurekho lihabi lye lukoosi.”

¹⁰Rekeeresa buulayi mwaana wase, ufukiilile biilomo byase byeesi ikhuleekela iwe. Ulwo manya nio uwaangale kimiiko kimikali kye buulamu bwoowo.

¹¹Ise nakhwookesa kumukhoosi kwe kamakhula, nakhuraangilila khu ntsila intsalaafu.

¹²Buli isi kane ukyeendele khu mukhoosi kwoowo, mbaawo shishikane shikhushinjilile ta, na buli isi kane utimile, singene wituye na khakyeekhe khoosi ta.

¹³Iwe uli ni khuushebulilatsaka byeesi wiiyikile, ukhabilekha byaakhururakho ta. Aamba buulayi byeesi usomile, lwekhuuba nibyo buulamu bwoowo.

¹⁴Ukhetubaasatsaka atweela ni babaandu baabi ta, ukhaloondelelatsaka she khuubonelakho she babaandu baboonaki ta.

¹⁵Isho ukhakhakakho waashikhola ta. Ukhatsya khu mukhoosi kwaabwe ta! Nuwikaanile ilala, uwaambe kumukhoosi kukwoowo.

¹⁶Babaandu baabi sibanyala baakona liilo ta, khuurusakho nga baamalile khuukhola she bubwoonaki. Baakona meeso khukhwoolesa nga baamalile khukhola buubi khu muundu ukhalikho ni shiibi shoosi ta.

¹⁷Lwekhuuba nibo biilyo byaabwe nibwo bubwoonaki, ni she khuunywa shaabwe shili bituluungu.

¹⁸Ne kumukhoosi kwe bakwalaafu kuli nga buwaanga bwe nyaanga itsasa kumutikhinyi, bubuutsya nga bwiloosela khuukhosa khukhwoolesa kumuumu ni kwibaandulila ilala.

¹⁹Ne kumukhoosi kwe baboonaki nikwo kuli busa nga shishiilima namukoto, ni nabo babeene sibanyala baamanya shiina sheesi batsya khukhwituyakho ta.

²⁰Iwe mwaana wase, rekeeresa byeesi ise ikhuboolela, uwuliliise buulayi biilomo byase.

²¹Ukhalekha ilomo na ndweela yaakhururakho ta. Waakha khuubishebulilatsaka, ubibiikhe mu mwoyo kwoowo mukari.

²²Lwekhuuba biilomo bino bili busa nga buulamu isi umuundu ubyakaanila, biwonesa buulamu.

²³Waakha witsiliilise byeesi kumwoyo kwoowo kwambaasa, lwekhuuba mu byambaaso byoowo nimwo mumuulimo buulamu.

²⁴Ukhakanikhatsaka biilomo bibikhalimwo ta. Ukhabakho ni ilomo yoosi iye bubeeyi, namwe imbi irura mu khanwa mwoowo ta.

²⁵Yinyusa tsimoni tsoowo uwunguuse ibweeni, lolelela iburaangisi isi uli khuutsya.

²⁶Manya buulayi isi uli khuutsya, nio isi bikyele byoowo bisaamba abe nga amanyikhile buulayi.

²⁷Ukhanyukanyuka waarura khu mukhoosi, weela khu lubeka lwe kumukhono kumulayi namwe khu lubeka lwe kumunyeletsi ta, bikyele byoowo bikhakhuyila mu khwoonaka ta.