Read lumasaaba Tsinikha 5 Bible Online

Tsinikha 5 - lumasaaba bible

Tsinikha 5

¹Mwaana wase, rekeeresa buulayi kamakhula keesi ise ikhuwa, uwuliilise buulayi biilomo byase bye khuumanya.

²Nio lwanyuma umanye isaambo iye khuukhalawo shishifuura buukhulu, ni khuukanikha biilomo bye kamakyesi ni kiminwa kyoowo.

³Lwekhuuba kiminwa ky'omukhasi umuyeyani kinyala kyaaba kyaatokota nga bubuukhi bwe ntsukhi, ni biilomo byeesi akanikha bifwaana nga kamafura ke kuusaala ku olivu,

⁴ne lwanyuma lwayo biluluwa nga indurwe, bikyelawo byookiya byaawunaka nga lurima lulwamema tsimbeka tsoombi.

⁵Iwe n'umuloondelela, akhuraangilila waakhuyila imakoombe, kumukhoosi kweesi akyeendelakho kuli kumukhoosi kwe khuufwa.

⁶Niye s'enaanayo khu mukhoosi kukuutsya mu bulamu ta, lwekhuuba tsintsila tseewe tsaaborokha, ne nga waakhushimanyakho ta.

⁷Nashiryo baana baase, ni murekeerese buulayi byeesi ise inoma, mukhebilila biilomo byeesi imbaboolela ta.

⁸Mukhesyembelesa n'umukhasi ufwaana aryo ta! Mukhakhakakho mwaatsya aambi ni kumulyaango kwe ntsu yeewe ta!

⁹Lwekhuuba siinga mukhola muryo, shiriifwa sheesi mubeele ni nasho kane shiyilibwe ni babaandu babaandi, ni nanywe babaandu be shinyiisi kane babeere nga mushiili busa.

¹⁰Ilala babaandu babaakhali bamanye kane bayile bye buyiindifu bweenywe, ni neebyo byeesi muraambiliile, kane biyilibwe n'umuundu ukuundi busa.

¹¹Ni bumaliilisi, buulamu bwoowo kane bube mu butsiina buukali naabi, nga kumubili kwoowo kulikho kuliikha kuwawo.

¹²Nio lwanyuma utoloole kamasika nga uloma uri, “Lwashiina naloba khuurekeeresa byeesi baanomela? Lwashiina ikhaafukiilila bangolomosa?

¹³Ise naloba khuurekeeresa likono lye baleekeli baase. Nalobela ilala khuubawuliilisa.

¹⁴Ari bona natsya nenyoola nga naaweelelewo ilala, nga naaswaalile mu moni tse babaandu babaabusaane boosi!”

¹⁵Ari ba umwiyikinwa isi umukyelama woowo, shibe nga wuunywa kameetsi khukhwaama mu sebele yoowo yonyene, kakaarubukha khukhwaama mu luutsi lulwoowo wamweene.

¹⁶Babaana boowo bakhafwaana nga kameetsi kakaasalasala busa iyo mu nguudo ta, bakhafwaana busa nga kameetsi kakaasalasala mu bifwo bye babaandu baakali ta.

¹⁷Ari lekha isebele iye kameetsi iyo ibe iyoowo wenyene, ne ikhaba iye babaandu babaandi ta.

¹⁸Nashiryo iwe n'uwikhoye n'umukyelama woowo isi wayila, sangaala n'umukhasi uwe mu busooleli bwoowo.

¹⁹Niye abonekha buulayi luundi umwilama, nga n'ubona ikhisi. Khayo khuukana khweewe khukhumale iwe imbuka yoosi, naluundi iwe witsusibwatsake ni khuukana khweewe kwe mukari.

²⁰Lwashiina iwe uyilibwa ni khuukana khw'omukhasi ukuundi uuli malaaya? Lwashiina ukhabakhaba lwe mbonekha iy'omukhasi w'omuundu ukuundi?

²¹Lwekhuuba Umukasya abona buli shiindu shoosi sheesi ukhola. Naluundi buli isi utsya oosi, aba nga waakhuloleleele.

²²Bibyoonako by'omuundu umwoonaki bili nga kumureko isi ali. Umuundu ufwaana aryo atsya waabowekha ni bumoyaani bweewe bubweene.

²³Umuundu uyo ahela lwekhuuba waakhumanya khukhwiwula umweene ta. Naluundi lwe buusilu bweewe umweene, atsya waahelela ilala.