Read lumasaaba Tsinikha 6 Bible Online

Tsinikha 6 - lumasaaba bible

Tsinikha 6

¹Mwaana wase, iwe siinga wiimilila umwesanwa woowo lwe likobi, nga wewaanileyo khuusasula umuundu ukuundi,

²lwanyuma weenyoola nga weboyile ni biilomo byoowo bibyeene, nga weboyile lwe bisuubiso byeesi wamweene wakholile ni kumunwa kwoowo,

³wenyoola nga uli mu bunyala bw'omuundu ukuundi, uli ni khuukhola shino nio wiwonese: Yuubakho utsye wiwose mu moni tseewe, wikoontselele umuundu uyo khuukhulekhuula.

⁴Ukhafukiililakho liilo lyaakhuwaamba, namwe wekhalakho aasi khuuwolakho ta.

⁵Khakakho wiikaangulule khaangu, nga n'ubona ikhisi ilekhuulibwa khukhwaama mu mureko kw'omuyiifwi, namwe khanywiinywi khukhwaama mu mureko kwooyo urekile.

⁶Iwe umuundu uuli umutoro, tsya ubonele khu namakye nga n'araamba, wiiyikilekho, ube ni kamakhula.

⁷Namakye niye s'alikho n'umuraangilisi, namwe umukhulu umuloolelela ta,

⁸ne niko kebiikhila bye khuulya mu mbuka ye bukhafu, nga keerekekhela imbuka iye bunyifu.

⁹Iwe umuundu umutoro, kane wolese eena khukhwiyalisa aasi nga waakonele mu bulili? Imbuka shiina isi utsya khwaakamisila khuukona liilo winyukhe aasi?

¹⁰Ukana khuukonakho khakyeekhe khari. Ukana khuwungukhilakho khakyeekhe khari. Ufunye kamakhono koowo uwolekho khakyeekhe khari.

¹¹Ne nga n'ukona uryo, butaambi butsya khukhwibwakala nga n'ubona umunuuli ni ebwakala, kumweekho kukhukwiile nga n'ubona umunuuli uwiitsa nga ali ni bye busoolo.

¹²Umuundu ukhalimwo kumukaso, uuli umwooni, akyeendaana busa nga akyeesaasa kamatsi.

¹³Akyeenda aminamina tsimoni, nga akuunyaka bikyele byeewe aasi, ari nio awombese babaandi.

¹⁴Ne nga n'akhola aryo, aba ali khukhwaambaasa khuukhola buubi bwonyene mu mwoyo kweewe, nga asokosana buukosi buli aandu oosi.

¹⁵Ni lwe lomo yino, buwaangafu butsya khumukwiila khaangu kharyo, aminiaangukhakile aasi, abe nga s'alikho ni kumwiyikino kwoosi ta.

¹⁶Iliwo bibiindu bisesaba byeesi Umukasya aabiyilila ilala, namwe bili musaafu byeesi Umukasya akhakanilakho ilala ta:

¹⁷babaandu babeyiinga, lulimi lulukanikha bye bubeeyi, ni kamakhono kakaatsukha kamafuki ke babaandu babaakhalikho kumusaango ta,

¹⁸umuundu ukhola tsimbomelo tsiimbi, namwe uyo uyubakilisa khuutsya khuukhola buubi,

¹⁹umuundu ukanikha bye bubeeyi mwikayilo, namwe umuundu usalanisa bye khukhwawukhanisa mu bebulebe muungo.

²⁰Mwaana wase, reekeeresa ukhole sheesi paapa woowo akhukaambila, ukhakhakakho webilila ibyo byeesi maayi woowo akhuleekela ta.

²¹Biilomo ibyo bibiikhe buulayi mu mwoyo kwoowo, biliinde buulayi ukheetsa waabiibilila ta.

²²Byeesi bakhuleekela bino kane bikhuraangilile nga ukyeenda, kane bikhuliinde nga waakonile aasi mu shilo, nga uli meeso kane bikhuboolelele.

²³Biilakilo bino bili nga itaala, ni khuuleekela khuli nga itaala iyaburukha khuukhuwa iwe buwaanga, ni khuukolomosa khweesi bakhuwa khuli nga khukhwiliinda, khu mukhoosi kwe buulamu bwoowo.

²⁴Biilakilo ibyo kane bikhukhiinge isi umukhasi umuyaayu, kane bikhuliinde khukhwaama isi biilomo bya malaaya bibikhongelesa.

²⁵Ukhakhongelesebwa lwe bumiliwu bweewe mu mwoyo kwoowo ta, namwe ukhayilibwa lwe khuumokamoka khwe tsimoni tseewe ta.

²⁶Umukhasi uwikulisa anyala waayilibwa lwe kumukaati mutweela kwonyene, ne khuukwaana n'umukhasi umuyeyani khunyala khwaayila bibiindu by'omuundu byoosi.

²⁷Manya iliwo umusaani uunyala waasutila kumulilo mu shitsoboobo sheewe, kwaalekha khwoosha bikwaaro byeewe ta?

²⁸Ne manya iliwo umuundu unyala wasaambaka khu maanda ke kumulilo, kaalekha khwoosha bikhaandakilo byeewe ta?

²⁹Isho nisho shitweela busa n'umuundu utsya waakona n'umukhasi w'omuundu ukuundi. Buli muundu yeesi ushikhola afuna shitaambiso.

³⁰Babaandu sibalekelesa umwiifwi uutsya khukhwiiba biilyo lwekhuuba intsala ili khuumulya ta.

³¹Ne nga baamuwaambile, ali ni khuuliyila umweene wabyo kimiluundi musaafu khuutuumisawo, abe yakhaba nga isho shimuyilakho bibiindu byoosi byeesi ali nabyo.

³²Ne umuundu yeesi ukhola bye buyeyani aba s'ali ni kamakyesi ta. Umuundu uyo isho ashikhola khukhwiiyira busa umweene.

³³Kane afwaane nga isi bakhupile, amalibwemu shiriifwa, aryo kane aswaale imbuka yoosi.

³⁴Lwekhuuba libuba likila lirima lyaaniina umuseetsa, nga waakhalilewo ari eliyaase, s'abakho ni shiisa shoosi ta.

³⁵Umuseetsa uyo s'afukiilisa ari bamuliyile ta, s'anyala waafukiilisa ta, abe yakhaba bibiindu biikali birye!