Read lumasaaba Tsinikha 7 Bible Online

Tsinikha 7 - lumasaaba bible

Tsinikha 7

¹Mwaana wase, shebulilatsaka biilomo byase byeesi ikhuboolela, ubiikhe biilakilo byase mu mwoyo kwoowo mukari.

²Yiliindatsaka biilakilo byase byeesi ikhuboolela, ni nawe kane ube umulamu. Yiitsiliilisa khuuliinda biilomo byase nga n'uliinda imoni yoowo.

³Biliinde buulayi ubyoomise nga intsiyi niyomela khu lwaala. Biilomo bino birone khu mwoyo kwoowo mukari.

⁴Lekha kamakhula kabe nga umukooko woowo, ni khuumanya khwe mukari khufwaane nga umusaale woowo umweene.

⁵Nibyo kane bikhuliinde iwe isi umukhasi umuyeyani, kane bikhuliinde isi khuwoombelesebwa khw'omukhasi umuyaayu.

⁶Ise lutweela naba nga ndi mwitilisa lye ntsu yase, nekulawo nesheenga,

⁷naabona babaandu baasooleli baakali, babashili khuumanya buulayi ta, ne noofwaasamwo mutweela uwaba umusilu.

⁸Umweene yuno aaba nga alikho akyeenda khu luguudo, nga abirira aambi ni ntsu y'omukhasi mutweela, waaba akyeenda nga atsya khu mukhoosi kukuulola lwe buuntsu nyene.

⁹Antsye bwaba bwilabula angoloobe, nga alikho amaliyaka.

¹⁰Lwanyuma umukhasi mutweela weetsa khuumwakaanana, nga waakwaarire nga umukhasi malaaya, nga ali ni shitsilililwa shiibi.

¹¹Umukhasi uyu aaba nga waabalakala busa, nga s'alikho ni kamaŋaanyu koosi ta, nga s'ekhalakho ingo weewe nakhafwiiti ta.

¹²Nga akyeenda khukhwaama khu luguudo lutweela lwe mu shiriimba khuutsya khu luundi, nga aliindilila khuuwaambilisayo umusaani yeesi.

¹³Aryo waakwa mu shifuba sh'omusaani umusooleli uyo, waamunuuna imunwa, waamwoofwaasa buulayi mu moni, waamulomela ari,

¹⁴“Nawaanileyo biwaanwa biikali naabi ingo wase, shaleelo shino indiyo ni tsinyama tsingali busa,

¹⁵ni nashiryo, ari neetsile khuukhwaakaanila iwe. Imbeele naakhukanile naabi, ari bona naakhunyoolile!

¹⁶Naalile bulili bwase ni tsisuukha tsiimiliwu naabi, tse tsiraangi tsitsibonekha buulayi khukhwaama mu shibala she Misiri.

¹⁷Naafuyiliile bulili bwase ni bibiwunya buulayi bibyaama mu bubaane, ni kimisaala kikiwunya buulayi.

¹⁸Ari yiitsa khutsye! Khakhutsye khukone fweembi, khwikhoye nga khwaakonile atweela.

¹⁹Lwekhuuba shaleelo shino, umuseetsa wase s'aliyo ingo ta, waatsiile lukyeendo lwe aleeyi naabi.

²⁰Niye aasutile tsinusu ngali naabi waatsya ni natso, nashiryo niye singene akobole khaangu kharyo ta, khuurusakho nga abirirewo tsisabiti nga tsibili.”

²¹Umukhasi uyo waamukhongelesa naabi nga araambisa biilomo biilayi biryo bye khuuwoombesa.

²²Khaangukho, umusaani uyo waamuloondakho, waafwaana nga ikhaafu isi batsya khusala, nga ikhisi iili khuutsya khukwa mwilowo,

²³nio bufumo bukiwunakile ilala. Waatsya nga waafwaanile khanywiinywi khakhaali khuutsya khukwa mu mureko, nga waakhumanya ari buulamu bweewe buli mu shihaangafu ta.

²⁴Ni naari baana baase, ni mundekeerese buulayi. Muwuliilise buulayi biilomo byeesi ise inoma.

²⁵Mukhafukiilila umukhasi ufwaana nga oyu waabakosaasa intsambaasa yeenywe ta, mukhaborokha mwaatsya mu ntsila tseewe tsiimbi ta.

²⁶Lwekhuuba umukhasi uyu waayila basaani baakali mu khuhela, ilala waayila babaandu baakali swa busa mu khukoraana.

²⁷Intsu yeewe ili kumukhoosi kukuutsya i makoombe, kuli kumukhoosi kukuutsya mu shibala she baafu.