Read lumasaaba Tsinikha 8 Bible Online

Tsinikha 8 - lumasaaba bible

Tsinikha 8

¹Rekeeresa buulayi! Kamakhula kalikho kalaanga. Khuumanya khulikho khwikhuunga.

²Keemikhile khu bikoongo khu ngaaki bibiili aambi ni kumukhoosi, keemikhile isi kimikhoosi kyaakaananila.

³Keemikhile iburaangisi we bilibwa bye shiriimba, keemikhile isi benjilila, kalikho kekhuunga kari:

⁴Imbalaanga inywe babaandu mweesi; indi khukhwikhuunga babaandu boosi be khu shibala.

⁵Inywe babaashiili baakyeekhe, ni mwiyike mube baakyesi. Inywe babaali baasilu, ni murekeerese mube ni khuumanya.

⁶Ni murekeerese biilomo byase biikhulu; byeesi ise inganikha bili biilomo bibyaakha naluundi biilayi.

⁷Biilomo byeesi inganikha bili bya ŋali, ise biilomo bye bubeeyi simbikanakho ta.

⁸Biilomo byoosi bibirura mu khanwa mwase bili bikwalaafu, mbaawo shishikhali shiilayi namwe shishaborokha ta.

⁹Bili bye kamakyesi isi buli muundu yeesi umanya, naluundi bili bya ŋali isi abo babaali ni kamakyesi.

¹⁰Nimurobore khukhwiiyika mu shifwo she khuurobora ifeetsa; ni mukhalewo khuuyila kamakyesi mu shifwo she zaabu ifuura buulayi.

¹¹Lwekhuuba kamakhula kafuurira aleeyi mu buulayi bubuuma bwe buukusi bwe angaaki; mbaawo shishiindu shishiindi sheesi munyala mwewotooma shishinyala shafwaananakho ni nako ta.

¹²Iseese ndi niko kamakhula, imenya mu khumanya, ise ndi ni kamakyesi ni khuukhalawo khwe angaaki naabi.

¹³Isaambo iye khuuryamwo Umukasya nikhwo khuubiiyila shiibi; Ise naabiiyila khukhwiiyiingayiinga, ni khukhwiniinisaka angaaki, ni khuukanikha biilomo bye bubeeyi.

¹⁴Ise imbawa kamakyesi, luundi naabaleekela. Ise ndi ni khuumanya luundi indi ni buunyala.

¹⁵Khuubirira musiise, baayiinga banyalisa khuuwula, musiise baawuli barawo kamakaambila ka ŋali.

¹⁶Buli muraangilisi yeesi uwula buulayi awula khu lwase, baawuli be shibala boosi bafuna buyeeti khukhwaama isi ise.

¹⁷Ise ingana naabi abo babaangana ise, ni naabo babaakhakakho khukhuumeentsa ise baanyoola.

¹⁸Ise ndiyo ni buyiindifu ni shiriifwa, buyiindifu bwe angaaki ni khuuba buulayi.

¹⁹Byeesi ufuna khukhwaama isi ise bili biilayi naabi khufuurakho izaabu, ni izaabu iye lisuno, naluundi bili biilayi naabi khufuurakho ni ifeetsa iye angaaki naabi.

²⁰Ise injeendela khu ntsila iye bukwalaafu, intsiila khu mukhoosi kwe bwaŋali,

²¹nga ingabila buyiindifu isi abo babaangana ise, nga nitsusa birara byaabwe ni bibiindu bye lisuno.

²²Umukasya aamuumba ise khuunyoowa mu biindu byoosi, ise niye uwaba shibuumbe sheewe shishanyoowa khaalekho.

²³Ise nareebwawo mu miboolo kikyanyoowela ilala, mu khurakikha nga shibala shoosi shishiili khubuumbibwa ta.

²⁴Ise nasaalikha nga tsinyaantsa tsishiili khureebwawo ta, nga mbaawo ni tsisebele tse kameetsi na ndweela ta.

²⁵Ise nasaalikha nga mbaawo tsinjiinji na lutweela ta, nga ni tsingoongo tsishiili na khureebwawo ta,

²⁶nga Wele ashiili khurawo shibala ni tsinimilo tsamwo ta, namwe nga mbaawo lifukhuulu na likyeekhe liri ta.

²⁷Khu mbuka isi aakhwiikhila likulu, ise naba nga indiwo, nga n'abalaayisa libaanga khu ngaaki lyaatsya lyeetiila khu nyaantsa imboofu.

²⁸Ise naba nga ndiwo khu mbuka isi aareerawo namufweeli khu likulu, nga ni ekulakawo tsintsitsi tsitsitsukhiliila mu nyaantsa imboofu,

²⁹khu mbuka nyene isi aareerawo lulwaakha isi kameetsi ke mu nyaantsa kakhanyala kaakhalisa kaaniina khu lwoomu ta, ni khu mbuka isi aareerawo kumusiingi kukwiimisawo shibala.

³⁰Ise naba nga ndi aambi naabi ni naye, nga n'ubona umwombakhi umukhulu mukhwombekha. Ise naba nga umusangaasa khu buli shifukhu, nga nase nikhoyela naabi mu moni tseewe.

³¹Indyo nga nikhoyela mu shibala sheewe shoosi, nga nitsula isangaalo lwe babaandu beewe boosi.

³²Nashiryo ari baana baase, ni mundekeerese buulayi; siinga muloondelela byeesi imbaboolela, kane mube basangaafu.

³³Ni muwuliilise buulayi bubweene byeesi imbaleekela, nio mube ni kamakhula, mukhakalekelesa ta.

³⁴Ali ni tsikhabi umuundu yeesi urekeeresa byeesi ise inoma, umuundu uwikhala nga wofwaasile imulyaango wase busheele, nga waaliindiliile iburaangisi we kumulyaango kwase.

³⁵Lwekhuuba umuundu yeesi uwunyoola ise aba waanyoolile buulamu, naluundi aba Umukasya wamwaakaaniile niye.

³⁶Ne uyo yeesi ukhaanyoola ise ta, aba wetsiinisile umweene, umuundu yeesi ukhaangana ise ta, aba akana khuufwa.