Read lumasaaba Tsinikha 9 Bible Online

Tsinikha 9 - lumasaaba bible

Tsinikha 9

¹Kamakhula koombekhile intsu yako, kaakireeremo tsintseko musaafu.

²Kaaŋoonaŋoonile tsinyama lwe kamayiiya, kaareekekhilewo ni she khuunywa she viini. Kaalile imeetsa yako buulayi bubweene.

³Kaarumanisile babaakaanisi baako bakhaana, khuutsya beemikhe mu shifwo shishesutakho angaaki mu shiriimba, balaangilile bari:

⁴“Buli muundu yeesi ushiili khuumanya ta, ni eetse enjile muno!” Ni isi buli mutweela yeesi ukhali ni kamakyesi ta, kekhuunga kari,

⁵“Yiitsa mulyekho biilyo byase, munywekho ni viini yase isi imalile khuureekekha.

⁶Ni mulekhe khuukyeendela atweela ni babaandu babaakhali ni khuumanya ta, nio mube baalamu. Ni mukyeendele khu mukhoosi kwe kamakyesi.”

⁷Umuundu yeesi ukhakakho khuukolomosa uyo uwiyiingayiinga, ereerera busa buukhomo. Ni nooyo ukhakakho khukhwikiitsa umuundu umwoonaki, ereerera busa khuutsiinisibwa.

⁸Ukhakhakakho khuukolomosa umuundu uwiyiingayiinga ta, kane shimureerere busa khuukhubiyiila iwe, ne niwikiitsakho umuundu ulimwo kamakhula, kane eloosele khuukhukana naabi.

⁹Siinga ubakho ni she khuuboolelela isi umuundu ulimwo kamakhula, naye kane eloosele khuuba ni kamakhula kamakali. N'ubakho ni sheesi uleekela isi umuundu umukwalaafu, naye kane alooselekho khuuba ni kamakyesi.

¹⁰Mu khurya Umukasya, nimwo mumwaama kamakhula, ni khuumanya Wele Umukhosefu nikhwo khuuba ni kamakyesi.

¹¹Khuuba nga uli ni kamakhula, umenyawo imbuka indeeyi iye buulamu bwoowo, ni kimiiko mikali kane kikhwilooselekho.

¹²Iwe siinga uba ni kamakhula, kane kakhuyeete iwe wamweene, ne siinga ukalekelesa, iwe wamweene niye ukane abonabone.

¹³Umukhasi uuli umusilu ali ni kumunwa, s'ewula ta, naluundi s'ali ni kamakyesi ta.

¹⁴Arura ibulafu wekhala aambi ni kumulyaango kwe ntsu yeewe, namwe mu shifwo shishesuta angaaki she mu shiriimba,

¹⁵waalaangilila isi babaandu babaabirawo, nga batsya khukhwikholela bibyaabwe, nga abalomela ari:

¹⁶“Inywe mweesi babaakhalimwo ni kamakhula ta, ni mwiitse mwinjile mu mwase muno!” Lwanyuma waalomela abo babaali baasilu ari,

¹⁷“Kameetsi keesi beebile busa nga kaatokota! Ni kumukaati kweesi baliila mu shiibiso nga kuŋaaha!”

¹⁸Ne umuundu uutsyayo isi umukhasi uyo aba s'amanya ari babaandu babenjila iweewe bali baafu ta, bakyeni beewe baba baatsya khaale mu shibala she makoombe.