Read lumasaaba Umuleekeli 10 Bible Online

Umuleekeli 10 - lumasaaba bible

Umuleekeli 10

¹Ikhaba tsiisame ingekhe tsiri nga tsyakwiile mu bye khukhwihakha bibiiwunya buulayi, tsikila byaawunya buubi. Nashiryo, ikhaba she busilu shikeekhe shiri, shikila shoonakisa bukesi ni shiriifwa.

²Busheele kumwoyo kw'omuundu umukesi, kwikoomba khuukhola bibiindu biilayi; ne kw'omusilu kwikoomba khuukhola bibiindu biibi.

³Nga umusilu alikho akeenda khu ntsila, okesanisa ari s'aalimo kamakesi ta. Khulwekhuuba ikhaba beesi akaanana khu ntsila kane bamanye bari ali umusilu.

⁴Nga umuraangirisi woowo waakhalaale, iwe ukhakhakakho waantsukha buuraambi bwoowo ta. Ikhaba nga iliwo bibiindu bye kamaani byeesi iwe woonakisile, ne iwe weesa aasi kumurwe, anyala waakhwiyakhila.

⁵Iliwo shishiindu sheesi ise nabona khu shibala khuno shishiikhali shiilayi ta, sheesi baawuli bakhola.

⁶Bawaamba babaandu baasilu baabawa buunyali mu bifwo bye angaaki, ne baalekha khukhwiinaanayo kh'uubo be kamakhula ta.

⁷Bawaamba be biriifwa bakeendela khu bikele, ne baakulwa beekhala khu ŋwaaŋwa.

⁸N'ulima lilowo, wamweene ulikwamo; n'uwatuna mu lumako, indemu inyala yaakhulumilamo.

⁹N'uraamba kwe khuukhupa kamabaale, kanyala kaakhubaaraka. Ni wasaaka bisaala binyala byaakhubaaraka.

¹⁰Nga iyaywa yaafuwa, ne waalekha khukiwakala ta, ikhuluyisa naabi mu khuukiraambisa. Ne shiba shilayi umuundu waaraambisa kamakhula mu khwoolelesa sheesi akana khuukhola.

¹¹Nga uli ni kamakesi ke khuuwaamba tsiindemu, ne waalekha indemu yaanyoowa yaakhuluma, iba kamakyesi koowo ako sikashikhulikho kumukaso ta.

¹²Bibiindu byeesi umuundu uwe kamakhula aloma, bimureerera lukoosi. Ne byeesi umusilu aloma, bimwoonakisa umweene.

¹³Khulwekhuuba umusilu arakikha inganikha yeewe ni bye busilu, waakamisayo ni bye bubwoonaki.

¹⁴Umusilu akanikha busa akhali khukhwakamisa ta. Imbaawo umuundu umanya bibiitsya khukhwiilakkho ta, naluundi imbaawo unyala waamanya bibikhaabewo nga khwaafwiile khwaarurirewo ta.

¹⁵Khuutitiikhana khw'omusilu khumumalamo kamaani, waalekha ni khuumanya intsila imuyila ingo weewe ta.

¹⁶Shiibala shishiilimo umuyiinga ukhola bye bubwaana, naluundi nga baraangirisi baasho bali mu khulya khwoonyene, shili mu mutaambo kumukali.

¹⁷Ne shiibala shishiilimo umuyiinga uutekeela, naluundi nga baraangirisi baasho bakhola bibiindu nga ni byakhiile khuuba, nga beliinda babeene buulayi, shibala isho shiba shili n'iikhabi.

¹⁸Nga uli umukara namwe umutoro khuuŋoona shiilama she ntsu yoowo, kane shisulule khukhwoolisa ni shibwaama mukari.

¹⁹Khuulya ni khuunywa bikila umuundu waaba umusangaafu mu bulamu, nashiryo byaakila niye waatsekha. Ne s'uunyala waabifuna akhali kamapeesa ta.

²⁰Ikhaba mu byambaaso byoowo, ukhambaasa khu she khuulekelesa umuyiinga ta. Ni babaali bayiinda, ukhabalekelesa ikhaba nga uli wenyene ta. Khulwekhuuba khanywiinywi khanyala khaawulila byeesi ulikho uloma, khaatsya khaababoolela.