Read lumasaaba Umuleekeli 11 Bible Online

Umuleekeli 11 - lumasaaba bible

Umuleekeli 11

¹Bukula kamapeesa koowo ukare mu bye busuubusi, lutweela ukhaafunemo kamafuurisa.

²Byeesi uli ni nabyo kabanana ni babaandu musaafu, namwe shinaane, khulwekhuuba s'umanya nawe lweesi kumutaambo kulikhukwiilakho ta.

³Nga kamafuumbi ketsuule ifula, kakilakasa khu shibala. Ne nga kuusaala kwaakwiile aasi kwaalolile ingaaki namwe imwaalo, kurama ni abweene awo.

⁴Uyo uliinda ari antsye abe alayi nio abyaale biilyo, s'abyaala ta, ni nashiryo mbaawo sheesi akesa ta.

⁵Nga n'ukhanyala waamanya musaambo isi buulamu burakikhamo mu mwaana uuli muunda ya maayi weewe ta, ni nashiryo s'uunyala waamanya bibiindu bya Wele ubuumba bibiindu byoosi ta.

⁶Tsya mu mukuunda kwoowo kumutikhinyi umiitse biilyo, urame nga uraamba khukhwoolisa angoloobe. S'uumanya ta! Byeesi umiitsile binyala byaama buulayi, yaabawo ni sheesi ufunamo.

⁷Buwaanga buli shishiindu shilayi naabi, naluundi shili she kumwiikhoyo khuubona inyaanga.

⁸Umuundu nga waamenyele khu shibala imbuka ingali, ni ekhoyele mu miiko ikyo kyoosi. Ne umuundu uyo ali ni khuushebulila ari, nga waafwiile kilibawo kimiiko kimikali. Ibyo byoosi byokesanisa biri imbaamo kumukaso ta.

⁹Babaandu babashiili bahele, ni mwikanile mu buhele bweenywe. Ni mube basangaafu nga mushiili bahele. Ni mukhole buli sheesi mukana, mutsiile khu sheesi kimyooyo kyeenywe kikana. Ne shebulila muri Wele akhaabakhalile inywe kumusaango khulwe bibiindu ibyo byoosi byeesi mukhola.

¹⁰Ukhamalila imbuka yoowo mu khwiyembelela ni khu biindu bikhutsiinisa iwe mu buulamu bwoowo ta. Khulwekhuuba s'uuli khuutsya khuba umuhele khuumala imbuka indeeyi ta.