Read lumasaaba Umuleekeli 12 Bible Online

Umuleekeli 12 - lumasaaba bible

Umuleekeli 12

¹Nashiryo nga ushiili umuhele, uli ni khuushebulila Wele umubuumbi woowo. Kane uri kimiiko kitsya kiiloosela, ni bihangafu uri biiloosela, ulome uri, “Biifukhu bino buulamu sibushiilimo kumwikhoyo ta.”

²Awo niwo isi ubonela uri buwaanga bwe inyaanga, ni kumweesi, ni tsinieniesi, bulikho buwetsekhelela. Kamafuumbi kakaareera ifula sikakhururawo isi uli kesheenda ta.

³Kamaani katsye nga kawetsekhelela mwibili mwoowo, kameeno kakwe kawe mu khanwa, ni tsiimoni tsilekhe khubona aleeyi ta.

⁴Kamaru koowo kalekhe khuwulila bibiikholikha ibulafu ta. Ulekhe khunyalisa khuwulila ikhaba shishuuma nga ni shisya ta, namwe nga beemba kimyeenya. Ikhaba khanywiinywi khonyene ni khakhupa liyoombo, usisimukhe.

⁵Khuuniina lukiingi lukhuriisake, naluundi khuukeenda khukhaabe khwe bukosi. Litsuune lyoowo likhose, lifwaane nga fwaamba. Khuukeenda wikhweese busa, nga liteete, ube nga s'uulimo ni kamaani ta. Khulwekhuuba umuundu afwa waatsya mu shifwo sheewe she khuwolelamo, ne walekha inyuma nga babaandu bakhupa luwuungu.

⁶Kumunyololo kwe ifeetsa kukhaakhalikhe, n'ipwakhuli iye zaabu yiikhupe aasi yaatikhe. Kumukosi kweesi bakhwesela kameetsi kukhaakhalikhe, n'isoongwe iye kameetsi yiikhupe aasi, yaatikhile aasi isi isebele ili.

⁷Kimibili kyeefwe kikhaakoboleyo mu lifukhuulu, ne kumwooyo kwiileyo isi Wele, uwakukhuwa ifwe.

⁸Umuleekeli aloma ari byoosi imbaamo kumukaso ta.

⁹Umuleekeli s'aaba busa umukesi ta, ne aleekela babaandu kamakhula. Naluundi wabuusaasa tsiindikha nga waamalile khuutsiimenielesa, lwanyuma waatsibiikha buulayi.

¹⁰Lwanyuma lwayo umuleekeli waheentsa biilomo bibisangaasa, waarona bibiindu bino ni bwaŋali.

¹¹Tsiindikha tsili nga lusaala, lweesi umwaayi araambisa khuuwusila bibyaayo. Naluundi tsiindikha tsino tsili busa nga kimisumaali kyeesi bakhwiikha kyewaamba buulayi bubweene, khulwekhuuba tsyaweebwa n'Umwaayi mutweela yenyene, niye Wele.

¹²Mwaana wase, iliwo shishiindu shishiindi sheesi iwe uli ni khukhwitsiiliilisa. Khuurona biitabo sikhwakama ta, ni khuusoma naabi khukhuumalamo kamaani.

¹³Ikhumaliilisa, iwe waawuliile bibiindu byoosi. Ne shikhulu shili indi, uli ni khukhwisaaya Wele, uwaambe kamakaambila keewe. Khulwekhuuba isho nisho shishakila Wele waakhubuumba ifwe.

¹⁴Wele akhaakhale kumusaango kukuwaamba khu buli shishiindu shoosi sheesi ifwe khukhola, oba shili shiibi, namwe shili shiilayi. Ikhaba ibyo bibiikholikha mu shimoonyo.