Read lumasaaba Umuleekeli 2 Bible Online

Umuleekeli 2 - lumasaaba bible

Umuleekeli 2

¹Ise naakhalawo neelomela samweene indi, “Yinyayila mu biindu biilayi; wamweene wisangaase.” Ne neenyoola indi, ikhaba ibyo imbaamo kumukaso ta.

²Ise nashifumbula indi khutsakha ni khuuba ni biilayi, bili busa nga khuukwa kamalalu. Sibilimo kumukaso ta.

³Naakhakakho khuufuumbula shinaanu shishinyala shanderera ise kumwikhoyo mu buulamu bwase bubuuli bubwiimbi buno. Nashiryo nakhalawo khuunywa iviini ni khutsiila khu bisangaasa, nga ingana kumwikhoyo. Ise naakana imanye khuuba umusilu nisho shiina, nga ise samweene sengana nekela umusilu ta.

⁴Ise naakhola bibiindu bye kamaani; noombakha tsiintsu, naluundi nebyaalila kimikuunda kye kimizabibu.

⁵Nebyaalila kimikuunda kye biimuli, ni kimisaala kye khulyakho bibyaamo.

⁶Naalima kamatibo mweesi naamisa kameetsi khutsukhiilila bisaala ibyo byoosi.

⁷Naaba ni baakulwa be seetsa ni beekhasi, atweela ni babaana beesi basaala nga bali muntsu mwase. Naaba ni bibiindu biikali, ni bibyaayo biikali, khuuminyisa umuundu yeesi uwabawo mu Yerusalemu, nga ise ishiili khubawo ta.

⁸Bayiinga be kamanaambo kakaandi baandeerera ise ifeetsa, izaabu, ni bye buyiindifu bibiindi. Aabawo basaani ni bakhasi khukhuuntsimbila ise kimyeenya, naluundi ise naaba ni bakhasi b'ebulafu baakali.

⁹Nashiryo ise naaba uwe angaaki naabi khuuminyisa abo boosi babaabawo mu Yerusalemu nga ise ishiili khubawo ta. Naba ni kamakhula kamakali.

¹⁰Abe buli sheesi ise ingana, ishifuna. Natsiila khu bisangaasa, khulwekhuuba abe kumwoyo kwase kubikana naabi. Abe buli sheesi ise ikhola shintsiila buulayi, nashiryo nase nekanila mu byeene ibyo.

¹¹Nio lwanyuma ise nambaasa khu biindu byoosi byeesi abe ise nakhola, ni khuukhalabana khweesi nabiramo. Nashifumbula nga byoosi imbaamo kumukaso ta. Byoosi bili busa nga umuundu n'aatimisa imbewo ari akiwaambe. Khu shibala khuno mbaawo shishiindu shishiilimo kumukaso ta.

¹²Nashiryo, lwanyuma ise nemenieelesa kamakhula ni busilu, ni khuukwa kamalalu. Umuyiinga uwaama lwanyuma anyala waakhola shiina sheesi uyo uwanyoowa khuubawo, akhaakhola ta? Mbaawo shishiindu shiyaakha sheesi anyala waakhola ta.

¹³Nashiryo ise naabona nga kamakhula kaminyisila busilu aleeyi naabi, nga buwaanga ni buminyisila shishilima aleeyi.

¹⁴Umuundu umukesi abona isi ali khuutsya, ne umusilu akeendela awo busa mu shiilima. Ne shitweela busa, boombi intsakamo yaabwe ili niyo ndweela yonyene.

¹⁵Kila ise inoma ndi, intsakamo yase n'iyomusilu, ili shitweela busa. Mukaso shiina kweesi ise imbeleele ni kamakhula ako koosi? Naabona nga bino nabyo imbaamo kumukaso ta.

¹⁶Khulwekhuuba, oba uli umukesi namwe uli umusilu, mbaawo umuundu ukhushebulila ta. Imbuka ikhoole, fweesi bakhwibilile. Uwe kamakhula n'umusilu, imbuka yoola boosi baafwa.

¹⁷Nashiryo ise naabona indi bulamu imbaamo kumukaso ta. Khulwekhuuba byeesi khukhola khu shibala khuno, bireera busa kumutaambo. Bino byoosi imbaamo kumukaso ta; bili busa nga umuundu n'atimisa imbewo ari akiwaambe.

¹⁸Ise naabona indi ibyo byeesi ise naakhalabanila khu shibala khuno, imbaamo kumukaso ta. Khulwekhuuba byoosi khubilekhela babaandu babaandi.

¹⁹Umanyila shiina beesi khubilekhela oba bali be kamakhula, namwe bali basilu? Ne shitweela busa uyo aba wayilile naluundi weelile khu biindu byeesi iwe wakhalaabanila khu shibala, nga uraambisa kamakhula koowo. Ibyo nabyo imbaamo kumukaso ta.

²⁰Nashiryo, ise nambaasa khu buraambi bwase bwe kamaani khu shibala khuno, nawetsekhelela kamaani.

²¹Khulwekhuuba, lukanile umuundu ukhalaabanile nga araambisa kamakhula, khuumanya, ni kamakhono keewe, ali ni khuulekhela umuundu ukuundi bibiindu ibyo, ikhaba nga umuundu uyo siwabiraambirira ta. Shino nasho sishilimo kumukaso ta, naluundi sishili shilayi ta.

²²Ilala, ilala, mu khuukhalabana khwoosi khweesi khukhalabana mu shibala muno, ifwe khwaamisamo shiina?

²³Khulwekhuuba buulamu bweefwe bwaayitsulamo kumutaambo kwonyene, ni buraambi bweesi khukhola buli busa khukhwitsiinisa. Ikhaba mu shilo khuba ni bibyambaaso bibikhutaambisa. Bino byoosi imbaamo kumukaso ta.

²⁴Shishifuurisa, shili ndi umuundu akhiile khuulya naluundi, nga umweene ekanila mu khukhalaabana khweewe. Ne shitweela busa, ikhaba ibyo byoosi byaama isi Wele.

²⁵Khulwekhuuba akhali Wele, naanu unyala waalya namwe waaba ni bye khuumusangaasa?

²⁶Khulwekhuuba umuundu usangaasa Wele, Wele amuwa kamakhula, khuumanya, ni kumwikhoyo. Ne baboonaki Wele akila baabira mu biwaangafu nga baraamba, baafunamo, bebiikhisa babeene, nio akile byeesi nibo bafuna babiwe abo babasangaasa Wele. Bino nabyo imbaamo kumukaso ta. Bili busa nga umuundu utimisa imbewo ari akiwaambe.