Read lumasaaba Umuleekeli 3 Bible Online

Umuleekeli 3 - lumasaaba bible

Umuleekeli 3

¹Buli shishiindu khu shibala khuno, shikholikha mu mbuka yasho.

²Iliwo imbuka iye khuusaalikha, yaabawo ni mbuka iye khuufwa; Iliwo imbuka iye khuubyaala, yaabawo ni mbuka iye khuukesa byeesi babyaala.

³Iliwo imbuka iye khukhwiira, yaabawo ni mbuka iye khukhwiyakhila; Iliwo imbuka iye khukhwombakha, yaabawo ni mbuka iye khuutikulula.

⁴Iliwo imbuka iye kumutaambo, yaabawo ni mbuka iye khuutsekha; Iliwo imbuka iye khuulila baafu, yaabawo ni mbuka iye khuushina.

⁵Iliwo imbuka iye khuusalanisa kamabaale, yaabawo ni mbuka iye khuukabuusa atweela; Iliwo imbuka iye khuukwa babaandi mu bifuba, yaabawo imbuka iye khukhwawukhana.

⁶Iliwo imbuka iye khuunyoola bibiindu, yaabawo ni mbuka iye khuutibisa bibiindu; Iliwo imbuka iye khukhwibiikhisa bibiindu, yaabawo ni mbuka iye khuubisalanisa byaawawo.

⁷Iliwo imbuka iye khutyenuula bibiindu, yaabawo ni mbuka iye khuubinabila atweela; Iliwo imbuka iye khuusila busa, yaabawo ni mbuka iye khuukanikha.

⁸Iliwo imbuka iye khuukana, yaabawo ni mbuka iye khuubiyila; Iliwo imbuka iye busoolo, yaabawo ni mbuka iye lukoosi.

⁹Umuundu n'akhalaabana, afunamo shiina?

¹⁰Ise naaboone nga iliwo bibiindu bisiro byeesi Wele aamala khaale khuura khu baandu.

¹¹Wele waakhalawo ari buli shishiindu shikholikha mu mbuka yasho inyene. Niye waakhukhola ifwe khukhwikoomba khuumanya bibiikhaakholikhe nyaanga, ne siwakhufukiilila ifwe khuumanya mu bwiitsufu byeesi niye akhola ta.

¹²Ise naashifumbula ndi shishiminyisa buulayi, shili ndi umuundu nga ali umulamu, ali ni khuuba umusangaafu, naluundi ekanile mu bulamu.

¹³Naluundi shiwaanwa khukhwaama isi Wele shili ndi, buli mutweela ali ni khuulya, anywe, abe nga ekanila mu lukesi lwe khuukhalaabana khweewe.

¹⁴Ise naamanya ndi buli sheesi Wele arawo, shibawo biilo ni biilo. Mbaawo sheesi unyala waashuusakho ta. Wele waakhola shino, ari nio ifwe khumwisaaye niye.

¹⁵Buli shiindu shishibawo ari, shanyoowa khubawo khaale; isho shishiitsya khubawo, shanyoowa khubawo khaale. Wele niye ukila bibiindu bibyabawo khaale, byaabawo luundi.

¹⁶Ise naamala khaale khuubona ndi mu shibala muno, mu shifwo she bwaŋali, iliwo khuumiinikhilisa, mu shifwo she bukhosefu, iliwo bubwoonaki.

¹⁷Nashiryo ise naashifumbula ndi, Wele waarawo imbuka ni shiifwo sha buli shiindu. Akhaakhalile buli mutweela kumusaango, baalayi ni baboonaki beene.

¹⁸Ise naashifumbula indi, bibiwaamba khu baandu, Wele alikho abakhakilisa busa, khukhwookesanisa ari boosi bali busa bibuumbe nga bisolo.

¹⁹Khulwekhuuba intsakamo ye babaandu, n'iye bisolo tsili shitweela busa; Bisolo bifwa, babaandu nabo baafwa. Byoosi biheela nga biraambisa kumuukha, nashiryo mbaawo sheesi umuundu afuurira biisolo ta. Byoosi mbaamo kumukaso ta.

²⁰Byoosi bifwa byaatsya mu shifwo nisho shitweela; Byoosi byaama mu liloba, naluundi byoosi biilayo mu liloba.

²¹Umanyila shiina oba kumwooyo kw'omuundu kuniina mu ngaaki, ne kwe bisolo kweekha aasi mu liloba?

²²Nashiryo ise naashifumbula ndi, shaandibeele shilayi umuundu ekanile mu buraambi bweewe, khulwekhuuba isho nisho sheesi akhiile khuukhola. Mbaawo isaambo isi ifwe khunyala khwaamanyamo bibiindu bibikhaakholikhe nyaanga ta.