Read lumasaaba Umuleekeli 4 Bible Online

Umuleekeli 4 - lumasaaba bible

Umuleekeli 4

¹Ise ni nemenielesa luundi, naafuumbula ikimiinikhilisi iili mu shibala. Naabona kamasika kaabo beesi bamiinikhilisa, nga mbaawo unyala waabawoleelesa ta! Nga mbaawo unyala waayeeta beesi bamiinikhilisa ta, khulwekhuuba abo babaabamiinikhilisa bali ni buunyala buukali naabi.

²Naaloma ndi, abo babaafwa bali buulayi ni khuuminyisa abo babaashiiliwo baalamu.

³Ne abo babaashiili khusaalikha ta, bali buulayi khuuminyisa abo babaali baalamu ni babaafwa. Khulwekhuuba babaashiili khusaalikha ta, bashiili khubona bikholwa biibi bibiikholikha khu shibala ta.

⁴Lwanyuma ise naashibona ndi ifwe khukhalabana naluundi khwookesanisa buumanyilifu mu buraambi, khulwe khuukana khufuure babaandu babaandi. Bino nabyo sibilimo kumukaso ta, naluundi shili busa nga umuundu utimisa imbewo ari akiwaambe.

⁵Abo babaali baasilu baala busa kamakhono kaabwe, baafwa khulwe ntsala.

⁶Umuundu waaba ni bye khuulya ikhaba nga bifwiiti, shifuurisa n'uuba ni biikali nga ukhalaabana ni kamaani koowo koosi ta, waaba busa nga utimisa imbewo uri ukiwaambe.

⁷Iliwo shishiindu shiindi sheesi ise nabona khu shibala khuno, shishikhalimo kumukaso ta.

⁸Umuundu uuli yenyene busa khu shibala khuno, nga mbaawo wandaaye namwe umwaana ta, akhalabana naluundi waatitiikhana, nga ekoomba aloosele busa khu buyiindifu bweesi ali ni nabwo. Ne s'ereeba ari, “Ne ise ndikho ikhalaabanila naanu, kila ikhali khuulya buulamu ta?” Bino nabyo imbaamo kumukaso ta, naluundi ubwo buli buulamu bwe kumutaambo.

⁹Shiba shiilayi umuundu waabakho n'umusaale, khuuminyisa khuuba yenyene busa. Khulwekhuuba muliila atweela bye mu lukesi lweenywe.

¹⁰Khulwekhuuba nga mutweela waakwiile aasi, uwashe amuyeeta. Ne uyo uuli yenyene nga waakwiile aasi, mbaawo umuyeeta ta.

¹¹Shishiindu shishiindi shili indi, nga mwaakonile babili khu bulili, buli mutweela akila uwashe waaba ni buukhafu; ne nga uli wenyene, buukhafu ubwaamisa waheena?

¹²Abe ikhaba nga umuundu anyala waakhupa umuundu uuli mutweela yenyene waamufuura, ne s'anyala waakhupa abo babaali babili ta. Kumukosi kweesi baawulukusilamo kitaru, sikukhalikha khaangu ta.

¹³Unyala waaba nga ushiili umuhele naluundi uli umutaambi. Ne n'uuba nga uli ni kamakhula, uba ufuura umuyiinga uuli umuundu umukhulu nenga umusilu, naluundi s'aarekeeresa kamakhula keesi bamuwa ta.

¹⁴Umuundu anyala wasaalikha nga umutaambi, namwe waaba nga abe ali umubowe, ne shitweela busa anyala wekela umuyiinga.

¹⁵Iliwo lweesi ise nabonela nga babaandu boosi khu shibala bamenya aasi e buwuli bw'omuyiinga ushiili umuhele, nga umuyiinga uwabawo yaba wafwiile.

¹⁶Abe babaandu abo bali baakali babeene, ne abe ali umuwuli waabwe. Ne babaakheetse lwanyuma, sibakhasiime ibyo byeesi niye akhola ta. Ilala, ikhaba shino seshilimo kumukaso ta, naluundi shili busa nga umuundu utimisa imbewo ari akiwaambe.