Read lumasaaba Umuleekeli 5 Bible Online

Umuleekeli 5 - lumasaaba bible

Umuleekeli 5

¹Uli ni khukhwitsiiliilisa ni n'eebyo byeesi ukhola nga wengiile mu Lisaayilo lya Wele. Shiba shilayi khuutsyayo khuurekeeresa weyika, shafuurisa khuwaanayo tsisaayilo nga babaandu baasilu ni bakhola. Khulwekhuuba baasilu abo sibamanya sheesi balikho bakhola ta.

²Ukhakhaakhana busa khuukanikha namwe khuusuubisa shishiindu isi Wele, nga ushiili khunyoowa khushambaasakho bulayi ta. Wele ali mwikulu mu ngaaki, ne iwe uli aasi khu shibala. Nashiryo, ukhakanikha bibiindu biikali naabi ta.

³Khulwekhuuba sheesi iwe unyoowa wambaasakho, shamamo bibiindu biikali; ne umusilu akanikhaka busa, ne nga mbaawo byeesi akhola ta.

⁴Nga wetsubile uri kane ukholele Wele shishiindu, ukhakasyaama khuushoolelesa ta. Khulwekhuuba Wele s'akana baasilu ta. Yoolelesa waangu sheesi witsubile khuukhola.

⁵Waalekha khukhwitsuba uri kane ukhole shishiindu ta, shifuurisa ni witsuba uri kane ushikhole, ne waalekha khushikhola ta.

⁶Biilomo byeesi iwe uloma bikhakila iwe waakwa mu byoonako ta, naluundi ukhalomela umurume wa Wele uri siŋaliilemo khuushikhola ta. Shiina kila iwe ukila Wele waakhukhalalila? Shiina kila iwe ukila Wele woonakisa ibyo byeesi iwe wamala khaale khuuraambirira?

⁷Khulwekhuuba uri bibyambaaso biiloosela, biilomo bibikhalimo ta, nabyo byeloosela. Ne ukhwo sikhuba nikhwo khuurya Wele ta.

⁸Siinga ubona uri mu shisiintsa sheesi iwe umenyamo, balikho bamiinikhilisa bataambi, mbaawo bwaŋali ta, naluundi iliwo shisaayuumba, isho shikhakhwiyaangisa ta. Khulwekhuuba buli umuraangirisi alikho ni baraangirisi babaandi babaamulikho angaaki babaamufuurakho niye buukhulu.

⁹Ni khuuminyisila ilala, umuyiinga niye ali buulayi, khulwekhuuba afunamo khwibyo bibyaama mu likesa lye mu shibala sheewe.

¹⁰Umuundu ukana kamapeesa ni buyiindifu, abe akhaba ni bibyoola biryeena, s'eekura ta. Ishino nasho imbaamo kumukaso ta.

¹¹Uri buyiindifu bweesi umuundu ali ni nabwo bwiloosela, ni babaaburaambisa nabo beeloosela. Mbaawo sheesi ufunamo ta, akhali khuumanya busa uri uli ni buyiindifu.

¹²Umuraambi oba afuna bye khuulya bibiimumala namwe ta, ne mu shilo akona liilo liliimumala naye waaba umusangaafu.

¹³Iliwo shishiindu shishiindi shiibi naabi sheesi ise namala khaale khuubona khu shibala khuno: babaandu babiikha bye buyiindifu, ne isho imbaamo kumukaso ta.

¹⁴Buyiindifu ubwo babufwiilwa musaambo tsimooyani busa, alekha khubawo sheesi balekhela babaana baabwe nga she buusikha ta.

¹⁵Umuyiindifu asaalikha khukhwaama muunda ya maayi weewe nga s'aalikho ni shishiindu shoosi ta; ni musaambo niyo indweela, akhakhalaabana aryeena, akhaafwe eleyo busa, nga mbaawo sheesi atsya ni nasho mu makhono keewe ta.

¹⁶Isho nasho shili shishiindu she kumutaambo naabi. Khulwekhuuba atsya busa nga n'eetsa khu shibala. Mbaawo sheesi aamisa mu khukhalaabana khukhuuli nga khutimisa imbewo ta.

¹⁷Ifwe khumalila imbuka yeefwe nga khumenya mu shiilima ni mu mutaambo, mu khutaambisibwa, mu butsiina, ni liirima.

¹⁸Ise sheesi ifuumbule mu bulamu bubuumbi buno shili indi: shishiifuurisa buulayi shili indi umuundu akhiile khuulya ni khuunywa, naluundi ekhoyele mu biindu byeesi aba waaraambiriire, mu bulamu bubuumbi buno bweesi Wele akhuwa ifwe. Mbaawo shishiindu shishiindi sheesi khunyala khwaakhola ta.

¹⁹Buli mutweela isi Wele aba waaweele buyiindifu, ni bibiindu biikali, ni bunyala, ali ni khuubiikhoyelamo. Ali ni khuumenya buulamu bweewe nga ni buli, nio akile afune kumwikhoyo khulwe khuukhalaabana khweewe. Shino shili shiwaanwa khukhwaama isi Wele.

²⁰Khulwekhuuba Wele kane akhuliindile iwe mu sangaalo ingali, ulekhe khubakho n'imbuka iye khuuba ni khukhwiyembeelela buli shifukhu ta.