Read lumasaaba Umuleekeli 6 Bible Online

Umuleekeli 6 - lumasaaba bible

Umuleekeli 6

¹Iliwo shishiindu shishiindi she kumutaambo sheesi ise imboone khu shibala khuno, naluundi shitaambisa buli mutweela.

²Iliwo umuundu isi Wele awa buyiindifu, ni bibiindu biikali, ni khuuba ni shiriifwa, waalekha khubakho ni sheesi ekoomba ta. Ne indi Wele waalekha khumuwa imbuka iye khukhwikhoyela mu biindu byeewe ta, akhali indi abawo umuundu ukuundi busa niye ubiyila. Shino nasho imbaamo kumukaso ta; shili busa she kumutaambo.

³Umuundu anyala wasaala ikhaba babaana shitoondo shitweela, waamenyawo kimiiko kimikali kimyeene khukhwoolisa wahangala mu miiko. Ne siinga alekha khusangaalila mu biindu biilayi bye mu shibala shino ta, naluundi waalekha khufuna babaamusiikha mu lukoosi ta, abe yakhaba n'umwaana isi basaala waarura nga umufu, amufuura.

⁴Khulwekhuuba umwaana uyo s'aaba ni buulamu waaba uwe kumukaso ta, naluundi atsya mu shibala she babaafwa khaale. Ne aba wanyoolile khuwola khuulayi khuuminyisa khw'omuundu uyo uwe bibiindu biikali.

⁵Umwaana uyo aba siwaaboonekho inyaanga, namwe waamanyile shishiindu shoosi ta; ne aba waanyoolile khuuwola khuulayi khuuminyisa umuundu uyo.

⁶Abe umuundu akhaamenyawo kimiiko bikana bibili (2,000), ne nga siwamenyile buulamu bwe khukhwikanila mu biindu byeewe ta, shitweela busa boosi batsya mu shifwo nisho shitweela shoonyene.

⁷Khuukhalaabana khweesi umuundu abakho, khuli indi afune she khuulya, ne shitweela busa, mbaawo ufuna bibimumala ta.

⁸Utsi umuundu umukesi afuurira shiina umuundu umusilu? Umuundu umutaambi n'amenya buulamu buulayi, afunamo shiina?

⁹Bino nabyo imbaamo kumukaso ta; khulwekhuuba bili busa nga khuutimisa imbewo uri ukiwaambe. Shiba shiilayi umuundu khukhwikhoyela mu biindu byeesi ali ni nabyo, khuuminyisa khuuba nga busheele alikho ekoomba bibiindu bibiindi.

¹⁰Buli shiindu shishikholikha anariha, baamala khaale khuukhalawo bari shikhaabe shiryo. Shamanyikhana khaale nga umuundu n'aali; khulwekhuuba s'anyala waakhabisana ni n'oyo umuminya kamaani ta.

¹¹Abe umuundu akhakanikha tsilomo tsiinga, mbaawo sheesi aamisamo ta. Nashiryo shiyeeta shiina?

¹²Khulwekhuuba buulamu buli bubuumbi buri, naluundi bukoraanawo busa nga shishiniini. Naanu unyala waamanya shishiindu shishikhwaakhila ifwe? Naanu unyala waamanya shishiikhaakholikhe nga ifwe khwaarurirewo khu shibala khwaatsiile?