Read lumasaaba Umuleekeli 7 Bible Online

Umuleekeli 7 - lumasaaba bible

Umuleekeli 7

¹Umuundu khuuba ni lisina liilayi mu baandu, shifuura khukhwihakha kamafura kakaawunya buulayi; ni shifukhu sheesi umuundu afwiilakho, shiminyisa isho sheesi asaalikhilakho.

²Umuundu waatsya ango isi bali mu masika, shiminyisa n'aatsya ango aliwo kamayiiya, khulwekhuuba babaandu bali ni khuushimanya bari, boosi bakhaafwe barurewo.

³Ingunyi iminyisa tsintsekho, khulwekhuuba ikhaba nga ireera khuukhalala, ne niyo ikila kumwooyo kwambaasa biikali.

⁴Kumwoyo kw'omuundu umukesi kwibaasa khu mbuka iye khuufwa, ne kw'omusilu busheele kwambaasa khu bye kumwikhoyo.

⁵Iwe waarekeeresa umuundu uwe kamakhula, nga waakhwikiitsile iwe mu byeesi ukwiile, shiminyisa n'urekeeresa baasilu nga bakhuruuya.

⁶Khutsekha khwe basilu khuli busa nga kamawa ni karundukhaka nga kali mu mulilo. Isho sishilimo kumukaso ta.

⁷Umuundu umukesi n'amiinikhilisa ukuundi, aba naye wekelile umusilu, ni khuulya iwoongo yoonakisa intsibaasa iy'omuundu.

⁸Shishiindu sheesi bamaliilisile khuukhola, shiminyisa isho sheesi ne baama khunanikha. Khuuba ni khukhwikhaliilikha, shiminyisa khukhwiyiinga.

⁹Babaatima khukhwikhalalisa, naluundi babaaba ni likoko, abo baba baasilu.

¹⁰Ukhereeba uri, “Shiina kila biindu leelo bikhali biilayi nga ni byaba khaale ta?” Ukhwo sikhuba khukhwookesanisa buukesi ta.

¹¹Umuundu ufuna she busikha, shaakha naye waabakho ni kamakhula.

¹²Khulwekhuuba kamakhula kalimo kumukaso nga kwe kamapeesa; ni shiilayi she kamakhula shili indi katseeta buulamu bw'ooyo uli ni nako.

¹³Yambaasa khu biindu byeesi Wele aamala khaale khuukhola. Naanu unyala watsalaasa isho sheesi Wele akhola nga shaayifuumba?

¹⁴Nga bibiindu bilikho bikhutsiila bulaayi, uli ni khuuba ni kumwikhoyo; ne nga kumutaambo kwaakwiilewo, uli ni khuushebulila uri, Wele niye uwabuumba bibiindu ibyo byoombi. Shino nio shikile umuundu alekhe khumanya shiina shishikhaabewo nga niye waafwiile ta.

¹⁵Mu buulamu bwase buno bubuukhalimo kumukaso ta, ise naaboone bibiindu byoosi. Iliwo umuundu umukhosefu ufwiila mu bukhosefu bweewe, ne yaabawo umwoonaki umenyawo kimiiko kimikali mu bwoonaki bweewe.

¹⁶Ni nashiryo ukhabiriirisa mu khuba umulayi naabi, namwe mu khuba uwe kamakhula ta; uba umala busa imbuka yoowo!

¹⁷Ukhaba umwoonaki naabi ta, namwe ukhaba umusilu naabi ta; kane ufwe nga bushiili.

¹⁸Shiba shiilayi waaba akari busa a byoombi. Khulwekhuuba n'uuba ni khuurya Wele, kane ufune buli sheesi ukana.

¹⁹Kamakhula kakhuwa iwe kamaani khuuminyisa baawuli likhumi be kamaani, ni babaaba mu shiriimba shitweela.

²⁰Ilala, mbaawo umuundu khu shibala khuno ukhola biilayi byonyene, waalekha khubakho ni bibyoonako ta.

²¹Ukharekeeresa bibiindu byoosi byeesi babaandu baloma ta, khulwekhuuba unyala waawulila ikhaba umuraambi woowo umweene nga alikho akhutsuba iwe.

²²Kumwoyo kwoowo kwaamanya kuri, kimiluundi kimikali, iwe wamweene utsuubatsaka babaandu babaandi.

²³Ise naraambisa kamakhula kaase khuutsema khu biindu bino byoosi. Naakhalawo indi kane ise imbe umukesi. Ne ise naalekha khunyalisa ta.

²⁴Byaŋali bili aleeyi naabi, khukhwaama isi ifwe khuli. Naanu unyala khuubimanya?

²⁵Kila ikhakakho khuumanya bibiindu byoosi byeesi inyala khuumanya, nga ingana imbe umukesi, imanye sheesi bulamu bumanyisa. Mu mbuka niyo indweela, ise nashifumbula ndi, khuuba uli umwoonaki uba uli umusilu. Naluundi nga uli umusilu, uba busa nga uwe kamalalu.

²⁶Ise naashifumbula indi iliwo shishifuurisakho buubi khuuminyisa khuufwa: nga nisho umukhasi uuli umubi. Ali busa nga kumureko, khulwekhuuba araambisa kumwoyo ni kumubili kweewe khuukhuwaambilisa iwe. Ne siinga uwulila bya Wele, unyala waawona kumureko ukwo. Ne n'uulekha khuuwulila bya Wele, uba waahaambikhile.

²⁷Umuleekeli aloma ari, bona ise naraambisa kamakhula kaase, khuubuusaasa bibiindu byoosi atweela, nga ingana imanye bwaŋali bwabyo.

²⁸Ise naakhola shino tsifuunda tsingali, ne sinanyalisa khuunyoola ta. Mu baandu shikana shitweela (1,000), ise nanyalisa khuunyoolamo umusaani umulayi mutweela, ne mu bakhasi ishiili khunyoolamo umulayi na mutweela ta.

²⁹Bona, ise nafumbula shishiindu shitweela ndi, Wele aabuumba babaandu nga bali baalayi, ne babeene baayonakisa bibyambaaso byaabwe.