Read lumasaaba Umuleekeli 8 Bible Online

Umuleekeli 8 - lumasaaba bible

Umuleekeli 8

¹Naanu unyala welekhaasa umweene khu muundu umukesi? Namwe naanu unyala waamanya bibiindu byoosi? Kamakhula keesi umuundu ali ni nako kakila wamuunamuuna, naluundi umuundu uyo waaba ni kumwikhoyo.

²Nga abe wasuubisa Wele uri ukhaawulilatsake byeesi umuyiinga aloma, ise ikhuwa khu makesi ndi n'uukhole sheesi waloma.

³Ukhakaalakaalila isi umuyiinga ali, waamukhaabisa nga niye waamalile khaale khuukhalawo ta. Khulwekhuuba niye akhola sheesi ekaniile shoosi.

⁴Khulwekhuuba sheesi umuyiinga aloma shiba she bunyala. Mbaawo unyala waamureeba ari, “Shiina kila ukhola shishiindu nga isho”, ta.

⁵Uyo uloondelela biilakilo by'omuyiinga s'aafuna buwaangafu bwoosi ta. Umuundu uli ni kamakhula ali ni khuumanya imbuka iye khuukholelamo shishiindu, n'isaambo iye khuushikholamo.

⁶Khulwekhuuba, ikhaba nga buulamu buli buwaangafu, ne buli shiindu shili n'imbuka yasho, n'isaambo iye khuushikholamo.

⁷Khulwekhuuba mbaawo umuundu unyala khuumanya bibiikhaatsye khukholikha mu moni ta, naluundi mbaawo unyala waarumbura nga ni bikhaabe ta.

⁸Mbaawo umuundu unyala waakhalawo ari s'akhaafwe ta, namwe waakhalawo inyaanga isi alifwiilakho ta. Mbaawo unyala waawona busoolo ta, namwe waaloma ari bubwoonaki bweewe kane bumuyeete ta.

⁹Ise nabona ibyo byoosi bibiikholikha khu shibala naluundi nabyambaasakho, nga mbona babaandu bamiinikhilisa babaandu bashaabwe.

¹⁰Ise nabona baboonaki nga basiikhibwa. Babeene bano abe nibo babaatsyatsaka mu shifwo shikhosefu, naluundi nga babaandu babaruuya nibo mu shiriimba khulwe bibiindu byeesi baakhola. Ishino nasho imbaamo kumukaso ta.

¹¹Kimyoyo kye babaandu kikana naabi khuukhola bibyoonako, khulwekhuuba abo babaakhola bibyoonako sibaweebwa bitaambiso mu khaangu ta.

¹²Ikhaba nga abo babaali baboonaki bakhola bibyoonako biikali naabi, naluundi baamenya khu shibala imbuka indeeyi, ne shitweela busa ise naamanya indi abo babesaaya Wele bakhaabe buulayi khuuminyisa baboonaki. Khulwekhuuba nibo besaaya Wele.

¹³Ne baboonaki bulamu singane bubatsiile buulayi ta. Buulamu bwabwe buli busa nga shishiniini, naluundi bakhaafwe nga bashiili baahele, khulwekhuuba sibesaaya Wele ta.

¹⁴Iliwo shishiindu shishiindi shishiikhalimo kumukaso ta, shishiikholikha khu shibala. Iliwo babaandu babaali baakhosefu babaabirisibwa buubi khulwe bikholwa bye baboonaki. Naluundi iliwo baboonaki babaabirisibwa buulayi khulwe bikholwa bye baakhosefu. Ishino nasho sishilimo kumukaso ta.

¹⁵Ni nashiryo, shaandibeele shiilayi umuundu khukhwikanila mu bulamu, khulwekhuuba shishiindu shiilayi shonyene shishiili khu shibala khuno shili she khuunywa ni khuulya. Umuundu ali ni khuukhola ibyo nga n'akhalaabana khu shibala shino, nga n'aabira mu bihangafu bye buulamu bweesi Wele amala khaale khuumuwa khuumenya khu shibala khuno.

¹⁶Ise ni nakhakakho khukhwikela uwe kamakhula, indi niiyike bibiindu byoosi bibiikholikha khu shibala, ise naashifumbula indi umuundu anyala wekhala meeso kumuusi ni mu shilo khulwe isho shonyene.

¹⁷Ise ni nabona byeesi Wele aakhola, nashifumbula ndi umuundu s'anyala waamanya bibiindu byoosi byeesi Wele aakhola khu shibala ta. Abe umuundu akhakhalaabana aryeena, s'anyala waabimanya ta. Abe umuundu uwe kamakhula aakhaloma ari niye anyala waashifumbula, ne s'aanyala waashifumbula ta.