Read lumasaaba Umuleekeli 9 Bible Online

Umuleekeli 9 - lumasaaba bible

Umuleekeli 9

¹Ise nambaasa khu biindu bino byoosi, naatsya nga imbimenielesa, naabona nga biikholwa bye bakhosefu ni babaali ni kamakhula, bili mu makhono ka Wele. Ikhaba nga bakana bashaabwe, namwe nga bababiiyila. Mbaawo umanya bibiitsya khukholikha mu moni ta.

²Khulwekhuuba boosi bakhaawaambe kumukhoosi nikwo mutweela kwonyene. Oba bali bakhosefu namwe baboonaki, babaakhola biilayi ni babaakhola biibi, abo babaali bapyeluuse ni babaakhali bapyeluuse ta, abo babawaanayo tsisaayilo ni nabo babaakhawaanayo ta. Umuundu umulayi n'umwoonaki boosi bakhaabe shitweela busa. Ikhaba uyo uwiitsuba ari akhaakhole biilayi, akhaabe busa shitweela ni n'oyo ukheetsuba ta.

³Shili shishiindu shiibi naabi khuubona uri, baalayi ni baabi boosi bakhaawaambe kumukhoosi nikwo mutweela kwonyene. Nga babaandu bashiili baalamu, kimyooyo kyaabwe kyaayitsula bubwoonaki ni busilu, ne lwanyuma lwayo baafwa.

⁴Ne uyo yeesi ushiiliwo umulamu mu shibala muno, alikho ni khukhwiyikina; khulwekhuuba imbwa iinamu ifuura italanyi iimalile khaale khuufwa.

⁵Khulwekhuuba abo babashiili baalamu bamanya bari bakhaafwe, ne babaamala khaale khuufwa, mbaawo sheesi bamanya ta. Mbaawo sheesi banyala bashebulila ta, naluundi sibashiiliyo ni kumukheemba kweesi beyikina ta.

⁶Khuukana ni bubiyile ni liibuba byeesi baaba ni nabyo, byoosi biba byawawo khaale. Sibaliilamo luundi bewaambile mu biindu bibiikholikha mu shibala muno ta.

⁷Ba umusangaafu wikanile mu bye khuunywa ni bye khuulya! Wele waamala khaale khuukhalawo sheesi iwe uli ni khuukhola.

⁸Nashiryo busheele kwaara buulayi, uŋoone litsuune lyoowo, ubonekhe buulayi.

⁹Buulamu bw'omuundu buli bubwiimbi, naluundi uli ni khuukana umukhasi woowo isi wayila, nashiryo yiikhoyela atweela ni naye. Shino nisho sheesi uli ni khuukhola nga n'utitikhana khuubira mu buulamu bwe khu shibala khuno.

¹⁰Mu buli sheesi iwe ukhola, raamba ni kamaani. Khulwekhuuba imakoombe we baafu isi iwe ulikho utsya, imbaayo buraambi, namwe khukhwaambaasa, namwe khuumanya, namwe kamakhula ta.

¹¹Iliwo shishiindu shishiindi sheesi ise namala khaale khuubona khu shibala shino. Umuundu utima luukali s'aali niye busheele ufuura tsiindimo ta. Naluundi sibali banyindaalifu nibo busheele babafuura mu busoolo ta. Babaandu bakesi busheele sibafuna bibiindu biibayeeta mu buulamu bwaabwe ta; babaali ni kamakhula sibali nibo babaafuura khuuba ni buyiindifu ta; ne akhali indi buli mutweela ali ni bisilaani byeewe.

¹²Mbaawo umuundu umanya lweesi imbuka yeewe ilyoolela ta. Khulwekhuuba boosi bali busa nga inyeeni n'ikwa mu mureko kwe khatiimba khakhawaamba tsinyeeni, namwe nga khanywiinywi ni khakwa khu lukha. Nashiryo babaandu nafwe khuli busa khuryo. Shisiilaani shikhukwakho mu mbuka abe isi ukhashambaasilakho ta.

¹³Iliwo shishiindu shishiindi she khubonelakho she kamakhula sheesi ise nabona khu shibala khuno, nambaasa indi shili she angaaki naabi.

¹⁴Yabawo shiriimba shikeekhe shiri nga shilimo babaandu bakeekhe bari. Umuyiinga uwe liiye lye kamaani waashiibwakala, waashiibotokhelela nga akana atikulule litikiiyi ashiwaambe.

¹⁵Ne mu shiriimba umwo mwabamo umusaani mutweela umutaambi, ne nga ali ni kamakhula, waakila waawonesa shiriimba isho. Ne she khabi mbi, mbaawo umuundu uwashebulila umusaani umutaambi uyo ta.

¹⁶Ne ise inoma indi khuuba ni kamakhula shiminyisa khuuba ni kamaani. Ikhaba kamakhula k'omuundu umutaambi bakalekelesa, naluundi mbaawo uwinaanayo khu byeesi aloma ta.

¹⁷Umuundu warekeeresa biilomo bye kamakhula mu mbola busa,, shiminyisa umuwuli n'akhookhela abo babaali baasilu.

¹⁸Kamakhula kakhola bibiindu biilayi khuuminyisa bye busoolo, ne umwoonaki ikhaba mutweela yeenyene anyala woonakisa bibiindu biilayi biikali naabi.