Read lumasaaba Kimyeenya 1 Bible Online

Kimyeenya 1 - lumasaaba bible

Kimyeenya 1

¹Kuno kuli kumweenya kwa Solomoni kukufuura buulayi mu kyoosi.

²Ise nikoomba indi khali iwe unuunile ise imunwa! Khulwekhuuba khuukana khweesi iwe unganamo ise, khuli khuunulu naabi khuuminyisakho n'iviini.

³Iwe uwunya buulayi naabi lwe biifura bye khukhwihakha. Bakhaana boosi bakhufwa iwe wenyene, khulwekhuuba khuukanikha khu lisina lyoowo khwonyene, khuli busa nga ni basalaasile aasi biifuura bibiwunya buulayi.

⁴Iwe imaambe ise kumukhono khutime khutsye; iwe n'ube umuyiinga wase umbile ise mu shiseenge mweesi iwe ukona. Nga iwe ni nase khuli atweela kane khube basangaafu, kane khube basangaafu khulwe khuukanana khweefwe khukhuuminyisa ni khuunywa iviini. Khana kila bakhasi boosi bakhufwa iwe weenyene!

⁵Bakhasi be mu Yerusalemu, ise shiikhoba shase shili shimali, ne nga indi umumiliwu! Indi umumali nga tsiweema tsye mu Kedari, ne indi umumiliwu nga tsingubo tsye mu matirisa ke mu lubili lwa Solomoni.

⁶Mukhaambona ise khulwe shikhoba shase nga ni shifwaana mwandekelesa ta, khulwekhuuba kumuumu nikwo kukwantsosha. Bayaaya baase b'esaani baaba nga baakhalaliile ise kila baamaamba ise ni kamaani khuuraamba mu mizabibu. Ise naalekha khufuna imbuka iye khukhwikholakho samweene ta.

⁷Mukanwa wase, iwe n'umboolele ise! Shaleelo bibyaayo unabyaayisila waheena? Nga kumuumu kwe mwihangilwe kwaabilile, unawolelakho waahena? Shiina kila shintsikoombisa ise khuukhuweentsa iwe mu baandu babaandi babaali khukhwaayisa bibyaayo byaabwe?

⁸Iwe ufuura buumiliwu mu bakhasi boosi, iwe siwamanyayo ta? Tsya uloonde kumukhoosi kwe bibyaayo, uyile tsiimbusi khuutsyaayisa aambi ni kamasari ke babaayi.

⁹Mukaanwa wase, iwe uli busa umumiliwu nga tsiŋwaaŋwa tsikhasi tsitsiikhweesa kamakaali ka Faraawo.

¹⁰Byeesi iwe wisaaha byaamiliisa tsisaya tsyoowo, ni byeesi iwe ukwaara mu milo nabyo byaakhumiliisa iwe naabi.

¹¹Ifwe khukhaakhukholele iwe bye khukwaara mu milo nga bye izaabu, atweela ni bye ifeetsa.

¹²Nga abe umuyiinga wase waakonile khu bulili bweewe, kamafura kaase kamuwuunyila buulayi buli aandu oosiitsana.

¹³Mu buulamu bwase, umukanwa wase ali busa nga isaawu imbuufu iye bibiiwunya buulayi, iili akari e kamafuungu[1] kaase.

¹⁴Umukanwa wase ali busa nga biimuli bye mwiiswa, bibiimulikhila mu mikuunda kye Engedi.

¹⁵Mukanwa wase, nga uli umumiliwu; nga tsiimoni tsyoowo tsokesanisa khuukana!

¹⁶Mukanwa wase, nga uli umumiliwu; ilala, uli umumiliwu! Buunyaasi buubisi kane bube nibwo buulili bweefwe

¹⁷kimisaala kimikedaali kimileeyi kane kibe nikyo tsinguulo tsye ntsu yeefwe, ne kimisaala kimiimb'ikho kibe nikyo ingalama.