Read lumasaaba Kimyeenya 2 Bible Online

Kimyeenya 2 - lumasaaba bible

Kimyeenya 2

¹Ise ndi busa nga shiimuli shishiwunya buulayi she mu Sharoni, indi busa nga shiimuli shimiliwu she mu litila.

²Umukanwa wase nga ali mu lituuli lye bakhasi babaandi busa, ali busa nga shiimuli shimiliwu ni shiba akari mu mawa.

³Nga umukanwa wase ali mu lituuli lye basooleli babaandi busa, ali busa nga kuusaala kwe bibyaamo biilayi ni kuba akari mu shisaali. Ise ingana naabi niikhale mu shiniini she kuusaala ukwo, naluundi khus'iise bibyaamo bye kuusaala ukwo bili biinulu naabi.

⁴Amataayi, niye aambila ise muntsu yeewe iye kamayiiya kila antsokesanisa ise khuukana khuukali naabi.

⁵Iwe n'umbe ise bye khuulya bibiisamo kamaani, imbe ise bibyaamo biilayi naabi indye! Khulwekhuuba ise naamaliile kamaani kaase koosi mu khukana.

⁶Abe uri umukanwa wase akharawo kumukhono kweewe kumunyeletsi ise naakonakho, naluundi abe uri niye waakhisa ise ni kumukhono kweewe kumulayi!

⁷Inywe baakhasi be mu Yerusalemu, ni musuubise ise, nga mwitsuba mu lisina lye tsiikhisi, muri singane mukhutumbuuse mu busaale bweefwe ta.

⁸Ise naawuliile likono ly'omukanwa wase! Bona alikho eetsa, alikho akhalisa tsingoongo butima, naluundi aniina kimisiila nga atima.

⁹Mu khutima, umukanwa wase ali busa nga ikhisi, ali busa nga imoosi indoro. Bona uyoshiina, wemikhile imukoongo we lumako lw'entsu yeefwe. Alikho esheengela mu matilisa, alikho ekheetsela mu lufwa.

¹⁰Umukanwa wase anganikhayo nga aloma ari, Mukanwa wase yinyukha khutsye, iwe, umumiliwu wase, yiitsa khutsye ni nase.

¹¹Bona imbuka iye bunyifu yaaweelewo, naluundi ifula yaaheesile.

¹²Bona biimuli byaarakikhile khuurura, imbuka iye khukhwiimba kimyeenya yoolile, bona buli aandu kamawuusi kalikho keemba kimyeenya.

¹³Bona kimisaala kimifiki kyaarobire, ni kimizabibu kyaamulisile, biimuli byakyo bilikho biwunya buulayi. Mukanwa wase, iwe ni wiitse, ni wiitse khutsye ni nase.

¹⁴Mukanwa wase, iwe uli busa nga liwuusi liliibisa mu lufwa lwe libaale. Khayo ise ikhulole iwe mu moni, imbulile likono lyoowo. Khulwekhuuba liikono lyoowo lili liilayi naabi, naluundi iwe ubonekha buulayi naabi.

¹⁵Khuwaambile ifwe tsikhipwe itsyo, tsiikhipwe tsifwiiti itsyo, nga tsishiili khukhwoonakisa kimikuunda kikiilimo biimuli ta.

¹⁶Umukanwa wase ali uwase senyene, ni nase ndi uweewe, bibyaayo byeewe abyaayisila mu bimuli biilayi naabi,

¹⁷khukhwoolisa nga khaabewo khe kumutikhinyi ni khawuutsa, naluundi khukhwoolisa nga shishiilima shaaweelewo. Mukanwa wase, n'ukobole isi ise ndi, n'ukobole utima nga ikhisi, namwe nga imoosi indoro niyitikitila khu bikoongo.