Read lumasaaba Kimyeenya 3 Bible Online

Kimyeenya 3 - lumasaaba bible

Kimyeenya 3

¹Ise ni naba nga naakonile khu bulili bwase mu shilo, kumwooyo kwase kwekoomba umukanwa wase; ise naamuweentsa, ne naalekha khumunyoola ta. Ise naalaanga, ne niye waalekha khuukhwiilamo ta.

²Kila ise niilomela senyene busa indi, “Khayo niinyukhe intsye mu shiriimba imuweentse, intsye mu makaantso ni mu mikhoosi, imeentse umukanwa wase.” Ise namuweentsa, ne naalekha khumunyoola ta.

³Baasilikhale babaaliinda shiriimba baanyoola ise mu shilo. Kila imbareeba indi, “Mwaamboonelekho umukanwa wase?”

⁴Uri nio imbabirakho ndi, ise naanyoola umukanwa wase. Naamwoomelakho, nga singana naamulekha waatsya ta, khukhwoolisa nga ni namuyila ingo isi maayi uwusaala ise, naamwokesa intsu isi ise nasaalikhilamo.

⁵Inywe baakhasi be mu Yerusalemu, ni musuubise ise, nga mwitsuba mu lisina lye tsiikhisi, muri singane mukhutumbuuse ifwe mu busaale bweefwe ta; kane mukhulekhe khwikurire ilala.

⁶Naanu uyo isi imbona nga eetsa khukhwaama mu mubiimbi, uuli busa nga kusiindi kwe lisuusi? Shiina isho shishiili khuwunya buulayi nga bubaani bubuwunya buulayi, bweesi bakulisa khu khatale?

⁷Solomoni niye uuli khukhwiitsa, nga baamusutiile khu shitsoloŋo sheewe! Basilikhale be kamaani babafuurira ilala buulayi, khukhwaama mu Isiraeli nibo babaali baaliindi beewe.

⁸Buli mutweela khu nibo ali ni bumanyilifu mu khusoolana nga araambisa luurima; boosi bali ni bumanyilifu mu khusoolana. Buli mutweela waasutile luurima, nga erekekhela abo babebwakala mu shilo.

⁹Umuyiinga Solomoni bamusutila khu shitsoloŋo sheesi baakhootsa khukhwaama mu bisaala biilayi naabi, khukhwaama mu Lebanoni.

¹⁰Bisaala byasho baabiwakhakho ifeetsa; ni khu ngaaki khwasho baabiimbakho ingubo isi baatubaasamo izaabu. Kimisisinwe kyasho kilikho tsingubo tsimbesemu, tsyeesi baakhasi be mu Yerusalemu baarukha.

¹¹Bakhaana ba Sayuuni, ni murure antsye mubone umuyiinga Solomoni. Khu murwe khweewe wakwaarire ikuutwa isi maayi weewe aamala khaale khuumukwaarisa, khu shifukhu sheewe sheesi aayililakho umukelema; khu shifukhu sheesi kumwooyo kweewe kwabeelamo ni kumwiikhoyo kumukali.