Read lumasaaba Kimyeenya 4 Bible Online

Kimyeenya 4 - lumasaaba bible

Kimyeenya 4

¹Umukanwa wase, nga uli umumiliwu; umukanwa wase, nga uli umumiliwu! Uli ni tsiimoni tsiimiliwu naabi, tsitsiibonekhela khukhwaama mu ngubo isi iwe ureere khu murwe kwoowo. Litsuune lyoowo lili limiliwu, lishina busa nga lituuli lye tsiimbusi, nga ni tsitima khukhwiikha kimiikha kye mu Gileyadi.

²Kameeno koowo kali kamawaanga, kaakhosa busa nga tsinyaange. Koosi kaayiruunga khutweela busa, naluundi kaalekhaana buulayi.

³Kiminwa kyoowo kyaamiliha naabi; naluundi imunwa woowo ibonekha buulayi. Tsiisaya tsyoowo tsili tsiimiliwu naabi.

⁴Liikosi lyoowo lili liimiliwu naluundi libonekha buulayi nga kimisiindi kye mu shiriimba Yerusalemu. Bubuuma bweesi iwe ukwaara mu milo bibyoola biikana ni biikana, bili mwikosi mwoowo.

⁵Kamafuungu koowo kali kamalayi naabi, kali busa nga tsikhisi tsikhwaana tsitsiili mu keewa.

⁶Kane ise intsye waangu khu bikoongo ibyo, bibiitsuule bibiindu bibiiwunya buulayi, imbe ibweene iyo khukhwoolisa inyaanga n'iirura.

⁷Umukanwa wase, iwe nga uli umumiliwu; uli umulayi mu buli saambo yoosi!

⁸Umweeha wase, yiitsa khurure mu Lebanoni khutsye, yiitsa khurure mu Lebanoni! Khwiikhe khukhwaama khu lukiingi Amana, ni Seniri, ni Herumoni, iyo isi tsitalanyi ni tsiingwe bimenya.

⁹Umukanwa naluundi umweeha wase, tsiimoni tsyoowo ni byeesi iwe ukwaara mu milo, byandiile ise kumwooyo naabi!

¹⁰Umukanwa wase, khuukana khwoowo nga khuli khwe kamaani! Khuli khuunulu naabi ni khuuminyisa iviini! Imbaawo shishiindu shishiindi shishiiwunya buulayi shaakhwoolela iwe ta.

¹¹Mukanwa wase, kiminwa kyoowo kyaanula busa nga kikiilikho bubuukhi bwe ntsukhi! Luulimi lwoowo luli busa nga luluulikho kamabeele ni bubuukhi. Biikwaaro byoowo biwunya buulayi nga kimisaali kedali kye mu Lebanoni.

¹²Mukanwa wase, iwe uli busa nga kumukuunda namwe isebele isi bakhafukiilisa umuundu ukuundi waakhalisayo ta.

¹³Kamakhono koowo kali nga kumukuunda kwe kamatuunda pomeguranetisi, kikyaama bibyaamo biilayi naabi, nga nimwo mumuuli hena, ni naridi

¹⁴naridi, safuroni, kalamusi, ni sinamoni. Nga mulimo kimisaala kikikhali mitweela ta, kikiilikho bubaani, ni bye khukhwiiyakha bibiiwunya buulayi.

¹⁵Iwe uli busa nga isebele ili mu mukuunda, iyaamamo kameetsi kakawosawosa buulesa! Uli busa nga tsiintsitsi tsitsiikha khukhwaama mu lukiingi Lebanoni.

¹⁶Khayo iimbewo khukhwaama ingaaki, ni khukhwaama imwaalo, iwuutse! Khayo iwuutse itsye aleeyi, isalanise khuwunya khwase khuulayi, nio akile umukanwa wase eetse mu mukuunda kwase, alye khu bilimwa bibiilimo bibiifuurisa buulayi ibyo.