Read lumasaaba Kimyeenya 5 Bible Online

Kimyeenya 5 - lumasaaba bible

Kimyeenya 5

¹Umukanwa naluundi umweeha wase, ise neetsile mu mukuunda kwase, ise ndi khuubuusaasa bibiindu biilayi bibiilimo; ise indya bubuushi atweela ni kamasasari, naanywa iviini atweela ni kamabeele. Khukhwaama ni muli babaakanana, ni mulye, naluundi munywe, khukhwoolisa khuukana ni kane khubameese!

²Ise naba nga naakonile, ne nga indi mu marooro. Naroora ndi umukanwa wase alikho akhoonyaka khu lwiitsi. Nga alikho aloma ari, Mukanwa wase, naluundi umweeha wase, waandya mwoyo wase, naluundi umumiliwu wase, n'untsikulilewo lulwiitsi ise ningile muuntsu. Kumurwe kwase kwatorire khulwe buunyifu bwe mu shilo, ise luunyire lwamaambile mumurwe.

³Ne ise abe naamalile khaale khukhwiyabula tsiingubo, ari niilemo ingwaare luundi? Ise abe naamalile khaale khukhwisiinga biikele, ne ari niinyukhe isaambe aasi luundi?

⁴Kila umukanwa wase atsanuusa kumukhono kweewe khukhwikulawo lulwiitsi, kila ise kumwooyo muunda kusangaala naabi.

⁵Ise ni nenyukha khukhwikulilawo umukanwa wase, indi imaamba kumukhono kwe lulwiitsi niikulewo, khu makhono kaase khwaaba nga khwetsuulekho bibiiwunya buulayi, bibiwunya buulayi byaroonyaka khu ntsala tsyase.

⁶Ise neekulilawo umukanwa wase lulwiitsi, ne nenyoola indi umukanwa wase waakoraanilewo khaale. Ise nataamba ni she khuuloma. Imbo imuweentsa, naalekha khumunyoola ta; imbo inaanga, waalekha khufukila ta.

⁷Baaliindi be mu shilo ni baaba nga balikho balambuula shiriimba mu shilo, bantsakaanana ise. Baakhupaka, naafuna butsiina bukali naabi. Kila bonuulaka ni shikwaaro shase.

⁸Bakhasi be mu Yerusalemu, inywe ni musuubise ise muri, nga mwanyoolile umukanwa wase, kane mumuboolele muri indikho imwikoomba naabi.

⁹Iwe uli niye ufuurisa buumiliwu mu bakhasi boosi. Iwe wambaasa uri uyo isi iwe ukana, alikho shiina sheesi babaandi bataamba? Shiina sheesi niye afuurira babaandi, kila iwe uloma uri ifwe khukhusuubise iwe?

¹⁰Umukanwa wase ali umumiliwu naluundi ali ni kamaani, abe waakhaweentsa mu baandu kumukaanda mutweela (10,000), s'unyoolamo ukuundi uuli nga niye ta.

¹¹Kumurwe kweewe kuli busa nga izaabu, litsuune lyeewe lili liilayi naabi, limiliwu naluundi liimali.

¹²Tsimoni tsyeewe tsili tsitsiimulikha busa nga tsye liwuusi lilimalile khukhwisiingila mu luutsi.

¹³Muumoni mweewe mumulikha busa nga biimuli, bibiiwunya buulayi; biinwa byeewe bili busa nga biimuli bibiiroonya bibiindu bibiiwunya buulayi.

¹⁴Kamakhono keewe kali busa nga tsimbaanu tsye zaabu, tsyeesi baboyilekho bibiindu bye beeyi ngali; shiikhoba sheewe shaamiliya busa nga kamasaanga k'entsofu, keesi bawashilekho iraangi imbuusi imulikhamulikha.

¹⁵Biikele byeewe bili busa nga kimisiindi kye kamabaale kamamiliwu, kyeesi beemisile mu malowo k'ezaabu. Imbonekha yeewe ili indaayi nga lukiingi Lebanoni, nga lulikho kimisaala kimi kedali.

¹⁶Tsilomo tsyeesi niye akanikha tsili tsiinulu naabi, na buli shishimulikho shoosi, shikila ise namwikoomba naabi. Bakhasi be mu Yerusalemu, umukanwa wase naluundi uyo uuli niye umusaale wase, ali busa aryo.