Read lumasaaba Kimyeenya 6 Bible Online

Kimyeenya 6 - lumasaaba bible

Kimyeenya 6

¹Iwe uli niye ufuura bumiliwu mu bakhasi boosi; umukanwa woowo watsiile wahena? Khuboolele ifwe isi umukanwa woowo atsiile, nio khukhuyeetekho iwe khuumuweentsa.

²Umukanwa wase weekhile khuutsya mu mukuunda kweewe, waatsiile mu mukuunda kweewe kukuulimo bibiiwunya buulayi. Watsiile iyo khukhwaayisa kamasheese keewe, ni khuubusaasa biimuli.

³Ise ndi uweewe yenyene, n'umukanwa wase naye ali uwase seenyene; ayisa kamasheese keewe mu bimuli.

⁴Mukanwa wase, iwe uli umumiliwu nga shiriimba Tiruza, uli umumiliwu nga Yerusalemu, uli ni kamaani nga liiye liliili khuutsya mu busoolo.

⁵Iwe ukhaandoleelela ise ta, khulwekhuuba tsiimoni tsyoowo tsikila kumwooyo kwase kwakhupa ni kamaani. Litsuune lyoowo lili limiliwu naabi, lishina busa nga lituuli lye tsiimbusi, nga ni tsitima khukhwiikha kimiikha kye mu Gileyadi.

⁶Kameeno koowo kali kamawaanga buulayi, kaakhosa busa nga tsinyaange. Koosi kaaruungikha khutweela busa, naluundi kaalekhaana buulayi.

⁷Tsiisaya tsyoowo tsili tsiimiliwu naabi.

⁸Baakyelama b'omuyiinga boola kamakhumi kaseesaba, baakhasi b'ebulafu boola kamakhumi shinaane, ne babashiili be shikhaana sibabalikha ta.

⁹Ne umukanwa wase yeenyene, niye yeenyene uuli umumiliwu naabi. Ali niye yenyene umwaana umukhaana muunda iya maayi weewe, umwaana umukanwa naabi uwa maayi weewe. Baakhasi boosi bamuloleelela baamuruuya; ikhaba baakhasi b'omuyiinga ni b'ebulafu, nabo bamuruuya.

¹⁰“Naanu uyo uwiitsa waabonekha buulayi nga kamamilimili, ubonekha buulayi nga kumweesi, naluundi umulikha nga inyaanga, uli umurafu nga liiye liliili khuutsya mu busoolo?”

¹¹Ise nakeenda neekha mu mukuunda kwe biilimwa, khuutsya khuloleelela biimuli bibiili mu litila. Natsya khuubona nga kimizabibu kyasisinile, khuubona nga pomeguranetisi bwareerekho biimuli.

¹²Ne khaangu akho nga indi mu byambaaso, nashebulila nekhaale mu likaari lye shiriifwa.

¹³Mukhaana uwaama i Shuluma, n'ukobole, kobola, khulikho khwikoomba khukhuloleelekho, n'ukobole. Ifwe khukana khukhuloleelele iwe nga n'uushina. Lwashiina mukana muloleelele umukhaana khukhwaama i Shuluma, nga ashinila mu moni tsye kamatuuli ke babaandu kabili?