Read lumasaaba Kimyeenya 7 Bible Online

Kimyeenya 7 - lumasaaba bible

Kimyeenya 7

¹Iwe nga uli umukhaana umulayi naabi! Biikele byoowo nga bili mu bilaalo, nga bibonekha buulayi! Kamaraango koowo kabonekha buulayi naabi, kali keesi babuumba buulayi.

²Ikhofu yoowo ili busa nga shikopo shishitsuule iviini khukhwoolisa n'isalasala. Kumubili kwoowo kwoosi kubonekha buulayi nga iŋaano, isi biimuli biibotokheleele.

³Kamafuungu koowo kali busa nga bisolo bikhwaana bibiili, nga tsikhisi tsibili.

⁴Likosi lyoowo lili limiliwu nga kusiindi kwe kamasaanga ke tsintsofu. Tsiimoni tsyoowo tsili tsindayi nga kamatibo kakaali aambi ni shilibwa she mu shiriimba Heshiboni. Kamoolu koowo kali kamamiliwu nga kusiindi kwe mu Lebanoni, kukuloleleele shiriimba she mu Damasiko.

⁵Kumurwe kwoowo kwayitungelesa buulayi nga lukiingi Karumeli. Iwe waabowa litsuune lyoowo libonekha buulayi naabi, ikhaba n'umuyiinga naye alikoomba.

⁶Nga ubonekha buulayi, naluundi uli umumiliwu! Khuukana khwoowo khuli khukhwiisamo kamaani!

⁷Uli umunyelele, naluundi waleeha buulayi nga kuusaala kuzeyituuni, naluundi kamafuungu koowo kali kamalayi naabi.

⁸Ise kane iniine khu kuusaala ukwo, intsye imbutekho bibyaamo byakwo. Kamafuungu koowo kaayiwuumba atweela buulayi nga biikala bye kimizabibu. Ni kumuuya kweesi iwe uheela kuwunya buulayi naabi.

⁹Nga iwe wakhoombile ise imunwa, ifwaana busa nga ulikho unywa iviini ifuurisa buulayi niyiikha imumilo.

¹⁰Ise ndi uw'omukanwa wase, naamanya nga antsikoomba naabi.

¹¹Mukanwa wase, ni wiitse khutsye mwiirome, khutsye khukonele mu byaalo by'eeyo.

¹²Khayo khutsye kumutishinyi naabi khuloleelele kimizabibu, khubone oba nga kyaarakikhile khuutsowa, khubone oba kyaarakikhile khusisina, khubone nga kyaarakikhile khuurakho biimuli. Nga khuli ibweene iyo kane ise ikhwookesanise iwe khuukana khuukali.

¹³Kusaala kukureera khuukana kulikho kuwunya, naluundi bibyaamo byoosi bili aambi ni kumulyaango kweefwe. Umukanwa wase, ise naakhubikhila iwe bibyaamo biinulu bya buli shikuuka.