Read lumasaaba Kimyeenya 8 Bible Online

Kimyeenya 8 - lumasaaba bible

Kimyeenya 8

¹Ise nikoomba indi abe uri iwe ukhaba wandaayase, isi maayi wase aasaala, waanuunisa. Khali buli lweesi ise ikhwakaananila iwe, khali ise ikhukwa iwe mu shifuba akhali khuurya ta.

²Khali ise ikhuyilile iwe muuntsu iya maayi wase, nio ibweene iyo iwe undeekela ise khuukana nga ni khuli. Khali ise ikhuweele iwe iviini inulu naabi, khali ise ikhuweele iwe she khuunywa shiilayi naabi.

³Ise niikoomba indi khali iwe undikiyile ise kumukhono kwoowo kumunyeletsi imurwe wase!

⁴Baakhasi be mu Yerusalemu, inywe ni musuubise ise muri singane mukhutaambise ifwe mu busaale bweefwe ta.

⁵Naanu uyo uuli khukhwiitsa khukhwaama mu mubiimbi, nga weyikamiliile khu shifuba sh'omukhasi isi akana? Ise nakhusisimusa iwe nga khuli aasi e kuusaala kwe bibyaamo biinulu, nga khuli mu shifwo sheesi maayi woowo akhusaalilamo iwe.

⁶Khayo imbe ise senyene niye uli mu mwooyo kwoowo; ukhakanakho umuundu ukuundi ta, akhali ise senyene. Khulwekhuuba khuukana khuli busa khwe kamaani nga khuufwa ni khuli; khukhwikoomba umuundu sishilikho kumwinyawo ta. Shili busa she kumulilo, shili busa nga kumulilo kwe buuyi ni kulyeebukha.

⁷Ikhaba kameetsi kakoola karyeena, sikanyala kaasimisa kumulilo ukwo ta; ikhaba khuusalasala khwe kameetsi sikhunyala ta. Abe umuundu akhawaanayo buyiindifu bweesi ali nabwo bwoosi ari nio bamukane, babutsekhelela busa.

⁸Ifwe khuli n'umukooko ushiili umukyeekhe naabi, ni kamafuungu keewe kashiili mafwiiti. Umuundu ni kane eetse khu museelela ari amuyile, ifwe kane khukhole khuryeena?

⁹Aba uuli kuutikiiyi, khali khumwombakhiile kusiindi kw'efeetsa; namwe aba lulwiitsi, khali khulukholile khukhwaama mu mbaawo tsye kuusaala ku kedali.

¹⁰Ise ndi litikiiyi, naluundi kamafuungu kaase kali nga kimisiindi. Umukanwa wase waashimanya ari nga indi ni naye, ise niiwulila buulayi naabi naluundi imba ni lukoosi.

¹¹Solomoni ali ni kumukuunda kwe bibyaamo mu shiifwo shishiilaangibwa bari Bali Hamoni. Iliwo babaapaangisa kimikuunda ikyo isi baalimi; buli ubira asasula tsifeetsa shiikana shitweela (1,000).

¹²Solomoni abe akhayila ifeetsa yoosi iryo, ni babaalimamo baayila bisiintsa bitoondo bibili kumukabo kwaabwe, ne ise kumukuunda kwase kuli kukwase seenyene!

¹³Mukanwa wase, khayo ise imbulile liikono lyoowo khukhwaama mu mukuunda; khulwekhuuba bashaase baaliindile khuuwulila liikono lyoowo.

¹⁴Umukanwa wase, ni wiitse waangu isi ise ndi! Tima khaangu khuuminyisakho ikhisi, namwe imoosi indoro nga yitikitila khu bikiingi khukhuulikho bibiiwunya buulayi, wiitse.