Read lumasaaba Isaaya 10 Bible Online

Isaaya 10 - lumasaaba bible

Isaaya 10

¹Nga kumutaambo kwaabanyoolile baakayi babaakhala kimisaango kikikhali kya ŋali ta, atweela ni naabo babaarusa kamakaambila kakaakhali ka ŋali ta!

²Musaambo iyo niyo isi babirisila babaandu bataambi buubi, baalekha khufukiilisa abo babaali buubi khuufuna buyeeti mu makayilo ta. Baryo nio baanuula khu banamulekhwa bibiindu byaabwe, naluundi baryo baayilaka bye baafuubi.

³Ari inywe mulikhola muryeena khu shifukhu khweesi mulifunila shiitaambiso, nga biibala bye aleeyi byeetsile khuubebwakala? Inywe mulishuukha mutimake waheena khuufuna buyeeti? Bye buyiindifu byeenywe mulibibiikha waheena isi bikhaaliindibwile buulayi?

⁴Ari mulititukha muryeena nio mulekhe khuwaambibwa khuuba baabowe ta, namwe nio mulekhe khukhwiiribwa ta? Ni khukhwoolesa ari lirima ly'Omukasya lishiili liikali naabi. Ni naari niye ashiinyusa kumukhono kweewe mu ngaaki, akana khubalibula luundi.

⁵Umukasya waaloma ari, “Nga she kumutaambo naabi isi Asiriya! Asiriya mweene yuno niye isi indiraambisa nga iluungu yase khukhwookesanisa lirima lyase.

⁶Ise indumana Asiriya khuutsya khukhaandakilila kamanaambo kakaakharya Wele ta. Imurumana khuutsya isi kamanaambo keesi ikhalaliile naabi. Nio lwanyuma baatsya bayaaya bibiindu, ni khuukhaandakilila babaandu nga babaakhaandaakilila kamaandu busa aasi e bikyele byaabwe.

⁷Ne shino umuyiinga wa Asiriya s'ashikhola nga waatsiililiile ta, s'ashambaasakho na khakyeekhe khoosi ari ise niye uuli khuumuraambisa ta. Niye sheesi atsya khuukhola nikhwo khuuhesa, ni khukhwoonakisa kamanaambo kakaakhali makyeekhe ta.

⁸Umuyiinga wa Asiriya aloma busa ari, ‘Buli mutweela khu bakhulu baase be kamahe ali umuyiinga!

⁹Ifwe khwatsya khwahesa Kaluno nga ni khwakhola Karikyemishi. Hamasi nasho shonakisibwa nga Arupadi. Samariya nasho shakwa nga Damasiko nasho ni shakwa.

¹⁰Ise natsanuusa kumukhono kwase kwe kamaani, naminiaangulaka buyiinga bubwaba ni bifwaani bibyakholebwa ni kamakhono, nga bifuura bye mu Yerusalemu ni mu Samariya bukhulu.

¹¹Nashiryo intsya khuhesa Yerusalemu atweela ni bifwaani byasho, nga ni nakhola Samariya ni bibuumbe byasho byeene.’ ”

¹²Lwanyuma lwa byoosi nga Umukasya waamalile khuuraambisa umuyiinga wa Asiriya khukhwoolelesa byeesi akana khu Lukiingi Sayuuni ni mu Yerusalemu, akhaamushuukhekho amuwe naye shiitaambiso, lwekhuuba naye ali ni shiikili ni bunywaanywa.

¹³Lwekhuuba umuyiinga wa Asiriya elomela umweene ari, “Lwe kamaani kaase samweene, nanyalisa khuukhola bino byoosi. Naraambisa kamakhula kaase samweene khukhwoolelesa byeesi narekekha khuukhola. Bona ari naamalile khaale khuufuniaakaka kamatikiiyi ke khukhiinga ke kamanaambo, naluundi bona nayaaya bye buyiindifu byaabwe byoosi. Ise natsya netsuule kamaani nga iwuunwa natomelaka bayiinga boosi atweela ni biitsoloŋo byaabwe byeene.

¹⁴Indyo natsya nanuulaka biiswi byaabwe bye buyiindifu, naabuusanisa buyiinga bwoosi bwe mu shibala nga babaandu ni babuusanisa kamaki keesi balekhile awo busa. Mbaawo na mutweela uwenyusa lutaaha ari akhupe ingalekhe ta, namwe umuundu yeesi khukhwinyusa kumunwa kweewe khuulomakho ilomo yoosi ta.”

¹⁵Ne Umukasya aloma ari, “Manya iyaywa inyala yaafuura uyo ukiraambisa kamaani? Manya kumusumeeno kunyala kwaafuura uyo ukukhalisa? Wambaasa imiimbo inyala yaakhupa uyo uuli khuukiraambisa khuukhupa, namwe manya iluungu inyala yesuta inyene yaakyeenda?”

¹⁶Nashiryo Umukasya Uwe Kamahe, Umunyali wa byoosi, atsya khusiindikha buulwaale buubi naabi mu basoolani ba Asiriya be kamaani abo, ni mu mubili kyaabwe mutsya khwookhelela nga kumulilo kukukhasima ta, shiriifwa shaabwe shiweelewo ilala.

¹⁷Umukasya, nga niye uuli Buwaanga bwa Isiraeli, akhekyele kumulilo kumweene, Umukhosefu uyo atsya khwikyela kumulilo kukuutindiima. Kumweene ukwo kukhooshe kamawa ni bitsakha, nga kubyookhela mu shifukhu shitweela shonyene.

¹⁸Biryo bisaali bye lisuno bya Asiriya, ni liiswa liilayi naabi ilyo, bitsya khuhelela ilala. Bikhaafwaane busa nga umuundu uteela wenyiliitikha waawawo lwe buulwaale.

¹⁹Khu misaala kyeewe, kikhaaramewo mikyeekhe kiri, shinyalise yakhaba n'umwaana umukyeekhe busa khuukibala.

²⁰Shifukhu isho nga sheetsile khwoola, babaandu ba Isiraeli babaakharamewo nga baalamu, nga nibo bawoolayo khu betsukhulu ba Yakobo, sibakheeleyo luundi khukhwiyikina liinaambo lilyeetsa lyaabahesa ta. Ne khulwaabwe bakhaabe babeyikinwa isi Umukasya, Umukhosefu wa Isiraeli.

²¹Babaandu bakyeekhe bari babaakharamewo nga baalamu bakhaakobole, boosi babaakharamewo nga baalamu bakyeekhe abo, bakheeleyo isi Wele Umunyali wa byoosi.

²²Ne abe yakhaba nga babaandu ba Isiraeli bayiimba luukali khuulekhaana nga kumuyeekhe khu ndulo khwe nyaantsa, babaakharamewo bakyeekhe bari nga baalamu, nibo babaakhakobole. Umukasya waakhaliilewo ilala mu bukwalaafu bweewe khuuhesa babaandu abo nga nishibaakhila.

²³Ilala Umukasya Uwe Kamahe, Umunyali wa Byoosi, waakhaliilewo ilala khuubamalawo, khukhwaama khu shibala shoosi.

²⁴Nashiryo sheesi Umukasya uwe Kamahe, Umunyali wa Byoosi aloma nisho shino ndi: “Inywe babaandu baase mweesi babaamenya mu Sayuuni, mukheelayo luundi mweyembelela lwe ba Asiriya abo, babeetsa baabakhupa ni miimbo atweela ni luungu nga ba Misiri ni babaakhola khaale akho ta.

²⁵Mu mbuka ikhali iye aleeyi ta, lirima lyeesi nabawaambila inywe litsya khwakama, lwanyuma imbashuukhile nibo imbahese.

²⁶Umukasya uwe Kamahe, Umunyali wa Byoosi, atsya khubatwaanga ni miimbo, abafwaanise nga n'akhupa babaandu ba Midiyani aambi ni lulwaanda lwa Orebu; naluundi imiimbo yeewe ikhaabenyukhile, afwaane nga ni aakinyusila khu nyaantsa, waawa ba Misiri shitaambiso.

²⁷Khu shifukhu isho, Umukasya atsya khwaakamisa buusiro bweesi aara khu baandu beewe. Atsya khufuniaakaka shisutwa shisiro she buukulwa, ashibarusekho khukhwaama khu mabeka kaabwe, byoosi bibatsiile buulayi.”

²⁸Liiye ly'omusiku lyeetsile lyoolile i Ayiyati. Ari balikho belooselayo khuutsya khuubirira i Miguroni, nga khu mbuka yino balikho babuunga bibiindu byaabwe i Mikimashi.

²⁹Balikho bakhalisa mu bubiriro bweeyo, ari batsya khukhwibuusila i Geba, khuumalakho shiilo shibuufu. Buuri bwawaambile babaandu be mu shiriimba Rama. Ni babaandu be Gibeya, nga nisho shiriimba sha Saulo, balikho batitukha, nga belukha lwe buulamu bwaabwe.

³⁰Inywe babaandu be mu Galimu, ni mwaantsuwe lwe khuurya khuukali! Rekeeresa buulayi, iwe Laisha. Iwe nawe Anasosi, uuli umutaambi.

³¹Babaandu be Madimena balikho bekhuuna tsiindimo baatitukha. Abo babaamenya i Gebimu, balikho bakhakakho khukhwibisaka.

³²Khu shifukhu isho baasiku batsya khuwolelakho i Nobu. Baafunya bifuusi byaabwe baabiwuutsa nga babiloselela i lukiingi lumiliwu lwa Sayuuni, nga nilwo lukiingi lwa Yerusalemu.

³³Ne ari bona! Umukasya uwe Kamahe, Umunyali wa Byoosi, atsya khuraambisa kamaani keewe khuurema kuusaala kwe kamaani kwa Asiriya kukwe aasi! Atsya khurema akwiise aasi abo boosi babeyiinga. Kuusaala kwe kamaani kukwakulukha angaaki, kutsya khukhwiisibwa aasi abweene.

³⁴Umukasya atsya khurema bisaala byoosi bye mu shisaali abikwiise aasi nga araambisa iyaywa. Lebanoni ni kimisaala kyamwo kye kamaani kitsya khuweela aasi o Umunyali wa Byoosi.