Read lumasaaba Isaaya 11 Bible Online

Isaaya 11 - lumasaaba bible

Isaaya 11

¹Khukhwaama khu shisina she kuusaala kwe luruungo lwe muungo mwa Dawudi, khulitsowakho kuusaala kukuundi; khukhwaama khu shisina isho khulimelakho Lusakya lushaakha mu betsukhulu ba Dawudi.

²Umwoyo w'Omukasya aliikha ekhale khu niye, nga niye Umwoyo we kamakhula naluundi uwe khuumanya, Umwoyo uwe khuuboolelela naluundi Umwoyo uwe Kamaani, Umwoyo uwe kamakyesi luundi Umwoyo uwe khuurya Umukasya.

³Kumwikhoyo kweewe kumukali kukhaabe mu khukhola byeesi Umukasya akana. Niye s'alikhala kumusaango nga asintsiila khu mbonekha iye khu ngaaki busa ta, namwe s'alibakho ni sheesi akhalawo lwekhuuba iliwo sheesi awuliile busa ta.

⁴Ne niye alikhalila babaandu bataambi kumusaango kwa ŋali mu bukwalaafu, naluundi khuukhalawo khweewe khuliba khwe khuyeeta abo beesi bamiinilisa. Shibala shoosi shilinikina lwe kamaani ke biilomo byeewe, ni kumuukha kweesi aheela khukhwaama mukhanwa mweewe kukhaahese abo babaali baboonaki.

⁵Niye akhebowe bukwalaafu nga umuundu ni ebowa kumusipi, ni bwaŋali bukhaabe kumukhandaala mu shikuute mweewe.

⁶Kimisolo namuunyu kikhaamenye atweela ni kamasheese, ni ingwe ikhaakone atweela ni khameeme khe mbusi. Imoosi ni khaafu imasoti bikhaakyeendele atweela ni talanyi, ni babaana bakyeekhe nibo babaakhaabe nga babyaayisila atweela.

⁷Ikhaafu ikhaayile buunyaasi atweela ni shibulukhu. Imoosi ni nyana iye shibulukhu bikhaakone atweela. Ni talanyi ikhaaye buunyaasi nga n'ubona ikhaafu n'ikhola.

⁸Umwaana umukyeekhe akhenyayile aambi ni lilowo mweesi indemu ikhilakhima ikona. Ilala umwaana umukyeekhe alingisa kumukhono kweewe mu bukono mweesi tsindemu tse buutwa tsimenya, ilekhe khubawo khuutsiinisibwa khwoosi ta.

⁹Shiilibawo khuutsiinisibwa, namwe khuutsiinisa khwoosi khukhuulikholekhela khu lukiingi lwase lukhosefu ta. Nga n'ubona kameetsi ni ketsusa inyaantsa, shiryo shiibala nasho shilitsulamwo babaandu babaamanyile, luundi babaarya Wele.

¹⁰Shifukhu isho nga sheetsile khwoola, mutweela khu betsukhulu ba Yese, uwe muunda ya Dawudi, alimikha abe nga khaabonelo khe khukhwiitsa atweela khe babaandu boosi. Babaandu bano boosi bakheetse nga bamuweentsa niye, ni shiifwo she bumenyo bweewe shiliba she shiriifwa naabi.

¹¹Khu shifukhu sheene isho, Umukasya alitsanuusa kumukhono kweewe kumuluundi kukuukhola khabili, akobose shisiintsa she babaandu beewe babaashiili baalamu, abo boosi babaaramawo khukhwaama mu Asiriya, ni mu Misiri, ni mu Pasirosi, ni mu Esiyopiya, mu Elamu, Shinari, Hamasi, ni bisiintsa byoosi bibiili khu ndulo khwe nyaantsa.

¹²Umweene alinyusa ibendela yeewe angaaki akari mu manaambo, lwanyuma abuusanise baamuli ba Isiraeli boosi. Alibuusanisa babaandu ba Yuda boosi babaasalanila mu soonda tsiine tse shiibala.

¹³Nio lwanyuma libuba lya Isiraeli liwewo, ni baasiku ba Yuda bakhaaweelewo ilala. Isiraeli s'aliilayo luundi khuuwaambila Yuda libuba ta, namwe Yuda khuuwaambila Isiraeli libuba ta.

¹⁴Khuurusakho ndi nibo nga Isiraeli ni Yuda bakhaatubaane atweela, batsye bebwakale ba Firisitiya babaali ibukwanyaanga. Lwanyuma baamewo batsye bebwakale kamanaambo kakaali ibwaamanyaanga. Bakhaatsye basoolanise luundi bawule ba Edomu ni ba Mowaabu, ni ba Amoni bakhaakwe aasi babeesemwo luukoosi.

¹⁵Umukasya umweene akhoomise lubeka lutweela lwe nyaantsa isi balaanga bari Imbesemu, iili aambi ni Misiri. Naluundi akhaawuutse kumukhono kweewe mu ngaaki, areere imbewo imbile naabi, yaawukhanisemo Luluutsi Efuraati, lwaamemo tsintsitsi tsitsiindi musaafu tseesi umuundu anyala waasaambamwo ni bikyele byeewe waakambukha.

¹⁶Akhaakhole intsila imbalaayi indayi iye babaandu babaakhaaramewo bakyeendelekho, nga bakobola khukhwaama mu Asiriya, nga ni aashikholela ba Isiraeli khaalekho, khu mbuka isi baabeela nga bakobola khukhwaama i Misiri.