Read lumasaaba Isaaya 13 Bible Online

Isaaya 13 - lumasaaba bible

Isaaya 13

¹Buno nibwo buurume bubuwaamba khu Babulooni, bweesi Isaaya umusooleli wa Amozi aafuna.

²Nga uli khu ngaaki khwe lukiingi lulukhalikho bisaala ta, yinyusa ibendela mu ngaaki. Lwanyuma wikhuunge nga urusa biilakilo isi bali. Uryo winyuse kumukhono kwoowo ukubawubile, shibe nga khaabonelo isi bali, nio benjile mu bilibwa bye babaandu be shiriifwa luundi be kamaani.

³Ise Umukasya samweene naalakiile basoolani baase, batsye bokesanise lirima lyase mu busoolo ubwo, ni nabo kane bekhoye naabi nga shiriifwa shangoboleele samweene.

⁴Ari ni muwulile liyoombo liikali liliili khukhwinyukhila khu njiinji! Lili liyoombo lye babaandu baakali naabi. Rekeeresa muwulile khuuyumbaala khukhuuli akari mu buyiinga, khuli nga luwuungu lwe kamanaambo kamakali. Umukasya uwe Kamahe, Umunyali wa byoosi, wenyusile liiye lyeewe lwe buusoolo.

⁵Balikho beetsa nga baama mu manaambo ke aleeyi. Umukasya alikho abaraambisa nibo nga she busoolo sheewe. Alikho araambisa liiye lino khuuhesa shiibala shoosi.

⁶Ari ni mwantsuwe lwe buuri buukali naabi, lwekhuuba shiifukhu sh'Omukasya shili aambi khukhwoola. Shili shiifukhu khweesi Umunyali uwa byoosi atsya khubaheselakho inywe.

⁷Lwa shino, kamakhono koosi katsya khulebaaleba busa, ni kumwoyo kwa buli muundu kutsya khumwisuta muunda.

⁸Babaandu boosi batsya khunikina busa. Batsya khuba ni butsiina ni kumutaambo kumukali, bafwaane nga umukhasi isi biisa bye khuusaala bilya. Batsya khulolana nga baasamiliile busa, nga mbaawo unyala ni khuuyeeta uwashe ta.

⁹Ari bona, shiifukhu sh'Omukasya shili khukhwiitsa. Shili shiifukhu she buurafu ni lirima lilitindiima busa. Isho shikile shiibala shoosi shipangalaale awo busa, ni baboonaki boosi babaashiilimwo batsya khuhela bawemo.

¹⁰Likulu lyoosi litsya khuba liimali busa tii, lwekhuuba tsinieniesi tsamwo tsilisima tsilekhe khwaburukha ta. Inyaanga iliba imali busa khukhwaama nga irura, ni kumweesi nakwo kumaliye busa nga mbaamwo buwaanga bwoosi ta.

¹¹Umukasya aloma ari, “Ise ndi khuutsya khureera shitaambiso shiikali khu shibala lwe bumoyaani ni bubwoonaki bwaabwe buukali. Indi khuutsya khumalilawo ilala khukhwiyiingayiinga khwe babaandu, abo babaali ni shikili she kamaani, bawotsolookhe busa.

¹²Ikhaakhole basaani babe she lisuno shishikhanyoolekhana khaangu ta, nga n'ubona izaabu iŋoonibwile buulayi iye Ofiri.

¹³Lwekhuuba indi khuutsya khunikinisa liikulu. Ni shiibala nasho shitsya khuyuukayuuka shirure mu shifwo shasho, nga Umukasya uwe Kamahe, Umunyali wa Byoosi waarusile buurafu bweewe, khu shifukhu she lirima lilitindiima.

¹⁴“Buli muundu mu Babulooni alitima atsye eyi ni neeyi, afwaane busa nga ikhisi isi balikho bayiima, namwe nga kamakheese kakaakhalikho n'umwaayi ta. Bakhaakhakekho naabi bari batime batsye banyoole baalebe baabwe, na buli muundu alitimaka atsye mu shibala she waabwe.

¹⁵Umuundu yeesi isi balinyoola bawaambe, bakhaamuwunake, na buli mutweela yeesi isi bakhaawaambe, balimuremaka ni lurima.

¹⁶Ni babaana baabwe bakyeekhe bakhaabakhupe aasi baatikhakemo, nga babeene babona. Tsiingo tsaabwe tsikhaanuulibwe, ni baakyelama baabwe bakhaabafwaakhile.”

¹⁷Umukasya aloma ari, “Bona ari indi khuutsya khusuuluusa ba Medi beetse bakwiile Babulooni. Nibo sibanyala beela khukhwikoomba ifeetsa namwe baayilibwa ni zaabu ta.

¹⁸Bakhaaraambise bufumo bwaabwe bwe mu buyiingo khuukhoonyaka baahele baayo. Sibakhaabekho ni shiisa shoosi khu baana baŋaalye, namwe khuuwaambila shiisa babaana boosi ta.

¹⁹Babulooni buli buyiinga bubufuura shiriifwa mu buyiinga bwoosi, naluundi nga ate nikwo kumwikhoyo kwe ba Kaludaaya, bukhoonakisibwe bufwaane nga Sodomu ni Gomora, nga Wele n'aabihesa.

²⁰Mbaawo umuundu na mutweela ulimenyakho luundi mu Babulooni ta. Shikhaarame busa awo shiryo. Mbaawo abe yakhaba n'umukyeendaani Umuwarabu uliitsya asimikhemwo lisari lyeewe ta, namwe abe bari yakhaba umwaayi yeesi khuuyilayo kamakheese keewe ta.

²¹Tsisolo tse mwirome nitso tsitsikhaamenyatsakemwo. Ni tsiintsu tsamwo tsoosi tsikhetsulemwo bibiindu bibikhali bitweela nga tsikhiikhi. Mu bweene imwo mukhaamenyatsakemwo ni kiminywiinywi kikiindi nga maaya, ni biisolo bibiindi bye mwiiswa bikhesutakilemwo.

²²Kimisolo namuunyu kikhaabe kimoloolela mu bweenemwo, ni tsishipwe tsikhaayabe kamalowo mu bifwo abe bibyaba lubili lwe angaaki naabi. Biifukhu bya Babulooni ari byembiyile, bili bikyeekhe biri; imbuka yaabwe iye khuuhela ili aambi khukhwoola.”