Read lumasaaba Isaaya 14 Bible Online

Isaaya 14 - lumasaaba bible

Isaaya 14

¹Umukasya akhaawaambile babetsukhulu ba Yakobo shiisa. Luundi ndi akhaarobore babaandu ba Isiraeli abekyelise babaandu ba buraawa. Aryo akhaabakobose beeliilise liiswa lyaabwe khuuba lilyaabwe lilyeene. Isho shikile babaandu khukhwaama mu manaambo kakaandi nabo beetse, betubaase ni nabo mubweenemwo, bamenye atweela ni babaandu ba Isiraeli.

²Babaandu be kamanaambo kakaandi baliyeeta babaandu ba Wele, babayile mu shifwo shishaabwe shisheene. Ni naabo babaalikhalawo khuurama ni nabo mu shibala isho, babaandu ba Isiraeli balibekyelisa khuuba baakulwa baabwe. Babaandu babaawaambaka babaandu ba Isiraeli baabakhola khuuba baabowe, balishuukha bekyele baabowe babeene, nio ba Isiraeli tsana babe baawuli baabo abe babaabamiinikhilisa.

³Nga shifukhu isho sheetsile khwoola, khweesi Umukasya alikholelakho babaandu beewe khuuba buulayi, akhali kumutaambo namwe buuri bwe buukulwa ni kiminyololo ta,

⁴inywe mulitsekhelela busa umuyiinga wa Babulooni. Mulimulomela muri, “Bona umusaani uwaba uwe kamaani naabi waakwiile! Ni naari ari s'anyala waakhubonabonisa luundi ta.

⁵Umukasya waafuniaakakile imiimbo yoowo iye kamaani kamabi, ni buwuli bwoowo bwe bubwoonaki wabwakamisile.

⁶Iwe wamiinikhilisa babaandu buubi bubweene nga ubafwooraka, naluundi iwe siwaakamisakho na khakyeekhe khoosi khuukubyeenga babaandu be kamanaambo kakaandi ni buurafu bwe shinyiisi ta.

⁷Ne ari bona, biibala byoosi bye khu shibala bili mu lukoosi, ni babaandu baamwo boosi balikho basangaala, nga beemba kimyeenya ni kumwikhoyo.

⁸Abe yakhaba ni kimisaala kya sayipuraasi, ni kimi kedali kye mu Lebanooni kilikho kyeemba kimyeenya ni kumwikhoyo kiri, ‘Nga iwe wamweene niwamalile khuuremebwa waakwa aasi, mbaawo ari umuundu ukuundi yeesi ukane eetse akhureme ifwe ta!’

⁹“Ari mu shibala she makoombe, iliyo kumwikhoyo, lwekhuuba balikho batsya khuukhwakaanila iwe ibweene iyo. Kimisimu kye babaandu babaaba baakhulu mu shibala babaafwa khaale, kilikho kiitsa khukhwakaanila iwe. Khukhwiitsa khwoowo ibweene iyo, khukila nikyo kyenyukha khu ngaaki khuukhukheesakho.

¹⁰Kyoositsana kilomela atweela ni likono litweela kiri, ‘Ni nawe ari bona wekyelelile umutoro nga nafwe. Ilala wekyelile shitweela busa nga nafwe!

¹¹Buunyala bwoowo, ni kamaani koowo byasiikhibwila atweela ni nawe, weetsa ano imakoombe. Liikono lye kamatuungu koowo lilyawulilikhanatsaka mu lubili lwoowo lyayakama. Ari tsinyeende tsayikyela tsisuukha tsoowo, tsinyeende tseene nibwo bulili bwoowo.’ ”

¹²Shiitsile shirye, iwe umuyiinga wa Babulooni! Iwe Inieniesi Sulya iye kumutikhinyi, khuuwanukha waakwa aasi khukhwaama mwikulu! Ari bona baakhuwanuule, bakhukwiisile aasi khu shibala, ate nga iwe niye uwoonakisatsaka kamanaambo ke khu shibala koosi.

¹³Iwe wamweene welomela mu mwoyo kwoowo uri, kane uniine mu ngaaki mwikulu, urekekheyo shitsoloŋo shoowo shiisutekho angaakikho khuufuurisa tsinieniesi tsa Wele. Nio ibweene iyo wikhale nga iwe niye uwula khu lukiingi lwe ngaaki isi ba wele babuusanila.

¹⁴Waloma uri kane uniine mu ngaaki naabikho, utuumisekho namufweeli. Nio ibweene iyo wikhole wamweene ufwaane nga Uyo Uuli angaaki Lukali.

¹⁵Ne ari mu shifwo sheesho khuukholekha, bona ari wekhisibwile aasi imakoombe, aasi ibweene imakoombe wanaleme.

¹⁶Buli muundu yeesi ukhaakhubonekho, aliyaanga busa, nga ereeba ari, “Ilala oyu niye umusaani uwatengaasa shiibala, waakila buyiinga bubuukhali butweela ta khuunikina?

¹⁷Oyu niye uwoonakisa shiibala shoosi, waashikyelisa kumubiimbi busa? Oyu niye umuyiinga uwasoolanisa luundi woonakisaka biiriimba bibiifuura buboofu mu shibala, waalekha khubakho ni shiisa shoosi isi abo babaayilibwa nga baabowe ta?”

¹⁸Baayiinga babaaramile be kamanaambo, buli mutweela waasiikhibwa mu lukoosi lweewe, mu ŋani yeewe iye kamaani.

¹⁹Ne bona iwe s'ulikho ni ŋani ta, bona kumulaambo kwoowo kwatuumibwa ibulafu busa kubolela iyo. Kumulaambo kwoowo kuliiyo bakusambakilila busa, nga babasambakilila kamasibaayi ke kuusaala. Ufwaana busa nga mutweela khuubo babeeribwila mu busoolo, lwanyuma kimilaambo kyaabwe kyatuumibwa mu lilowo lileeyi naabi aasi lye mu lwaanda.

²⁰Iwe singene usiikhibwile atweela ni bayiinga babaandi ta, lwekhuuba iwe wamweene woonakisa linaambo lyoowo, wakhoonyaka babaandu boowo. Lisaaye lye babaandu bamoyaani nga iwe, sibanyala baalishebulila na khafwiiti khoosi ta.

²¹Ari ni mwirekekhe khuukhoonyaka babaana b'omuundu ufwaana aryo! Lekha bahele lwe bubwoonaki bwa paapa waabwe. Nga shaakhuba shiryo ta, banyala benyukha, baatsya beliilisa shiibala, beyombekhela biriimba buli aandu oosi mu shibala.

²²Umukasya Umunyali wa byoosi aloma ari, “Ise samweene kane ninyukhe intsye nibwakale Babulooni. Mbaawo n'umuundu na mutweela isi kane indekhewo nga mulamu ta, mbaawo uuliramawo nga mulamu, abe yakhaba babaana beene, khukhwiisawo lisaaye ta.” Shino Umukasya umweene niye ushiloma.

²³“Indyo ikhekyelise Babulooni khuuba bumenyo bwe kiminywiinywi tsikhiikhi, nga mwayitsulamo kameetsi, luundi mutsowemo kamakhalaamba. Ikheeye Babulooni nga inaambisa tsintseyo tse khubahesa boosi. Ise samweene Umukasya uwe Kamahe, Umunyali wa Byoosi, niye ubikanikhile!”

²⁴Umukasya uwe Kamahe, Umunyali wa byoosi, weetsubile na khwitsuba nga aloma ari, “Byeesi ise narekekha byoosi, bitsya khwoolelela nga ni narekekha. Nga ni naŋoonaŋoona, byoosi bitsya khurama biryo.

²⁵Intsya khuminiaangulaka ba Asiriya nga bashiili mu shibala sha Isiraeli. Intsya khubakhaandakilila nga bali khu njiinji tsase. Musaambo iyo, indekhuule babaandu baase babe balekhuule nga sibashiili baakulwa luundi ta, balekhe khukhwiilayo luundi khuumeema biisutwa bisiro ta.

²⁶Yino niyo iŋoonaŋoona yase isi ikholile isi shiibala shoosi; ni musaambo yino niyo isi ndi khuutsya khutsaanuusila kumukhono khu manaambo koosi.

²⁷Lwekhuuba Umukasya uwe Kamahe, Umunyali wa Byoosi, umweene niye ubiŋoonaŋoonile; naanu unyala waabishuusamwo? Nga weenyusile kumukhono kweewe mu ngaaki, naanu unyala waamukhaangabisa?”

²⁸Buno nibwo buurume bubweetsa khukhwaama isi Umukasya, mu mwiiko kweesi umuyiinga Ahazi aafwiilakho:

²⁹Inywe ba Firisitiya mweesi, mukhekhoya nga mwambaasa muri imiimbo iyabakhupa yaamenyukha ta. Lwekhuuba indemu iye buutsiba ndweela nga yaafwiile iryo, ikiindi itsya khusaalikha, ni khukhwaama mu maki kaayo mukhaamemo indafu ikifuurisakho niyo khuutindiima ni butsiba.

³⁰Ise samweene ikhaayilise abo babaali bataambi mu baandu baase, ni babaakhenyala ta, bakhaakone buulayi mu lukoosi. Ne inywe, ikhaabatamuuse imbamalewo nga inaambisa intsala namaani, naluundi ikhaakhoonyake na buli mutweela yeesi ukhaaramewo nga mulamu.

³¹Nimwantsuwe naabi, inywe bilibwa! Toloola luukali, iwe shiriimba! Tyemuukha lwe khuurya khuukali, inywe ba Firisitiya mweesi! Lwekhuuba iliyo liiye lye kamaani liliili khukhwaamila kwe ngaaki, lifwaana nga lisuusi. Buli muselikhale yeesi uwaamayo, eetsa ni kamaani nga ali mwirekefu, mbaamwo umuri ta.

³²Ari shiina shisheene sheesi khunyala khukhwiilamwo isi baarume be linaambo lilyaama aleeyi ilyo? Baboolele muri, “Umukasya wombakhile Sayuuni; ni kamatikiiyi ke shiriimba shino, niko kakaatsya khuba bubwilukhilo isi babaandu beewe babaamiinilisibwa.”