Read lumasaaba Isaaya 15 Bible Online

Isaaya 15 - lumasaaba bible

Isaaya 15

¹Buno nibwo buurume bubuwaamba khu Mowaabu: biriimba Ari ni Kiri byoonakisibwa mu bwiile bwe shiilo. Byoombi biriimba bya Mowaabu. Mowaabu shaaweelewo.

²Babaandu boosi be mu Diboni baaniinile mu lisaayilo lyaabwe ni biifwo byaabwe bibiindi bye khukhwisaaya khuutsya khulila. Batsya khulila khu lwa Nebo ni Medeba. Baryo baabekaka litsuune khu mirwe kyaabwe kyooma busa, naluundi babeka bunwaanwa bwaabwe lwe kumutaambo kumukali.

³Babaandu be mu nguudo bebowa tsisawu tse bukoongwe. Mu buli muungo na buli aandu oosi mu bifwo mweesi babuusanila, iliyo luwuungu lwe kimibala.

⁴Babaandu be Heshiboni ni Eleyale baantsuwa, ni kamakono ke luwuungu lwaabwe kawulilikha ni mu biifwo bye aleeyi bya Yahazi. Baselikhale ba Mowaabu boosi balila nga baariire luukali. Boosi kamaani kaabaweeleelemo ilala.

⁵Kumwoyo kwase kulikho kulila lwa Mowaabu. Babaandu baayo boosi balikho batitukhila i Zowari ni Egulasi-Shelishiya. Batsya baaniina khu luguudo lwa Luhisi nga baantsuwa. Luwuungu lwe khukhwaantsuwa khwaabwe luwulilikhila ni khu luguudo luluutsya i Horonayimu.

⁶Abe yakhaba ni kameetsi ke Nimurimu koomeleele! Ni bunyaasi bwoosi bwaniaalile. Biilime byoosi byaweelewo, ari mbaayo shishiindu shoosi shishirura khukhwaama mwiloba shishiiliyo shiilamu ta.

⁷Babaandu babuusaka bibiindu byoosi byeesi bali nabyo, nga batitukha baatsya baambukha Liitila lya Wiloosi.

⁸Luwuungu lwe kumutaambo lutsya luwulilikhila mu shibala sha Mowaabu shoosi, khukhwaamila i Egulayimu khuutsya khwoola i Beeri-Elimu.

⁹Luluutsi lwe kameetsi ke Diboni lwaayitsulamo kamafuki, ate nga biikali bishiili inyuma. Tsitalanyi tsitsya khuyiima babaandu ba Mowaabu babaaliba nga bashiili baalamu; abo babaaliba nga baatitukha, ni naabo babaaliramayo.