Read lumasaaba Isaaya 16 Bible Online

Isaaya 16 - lumasaaba bible

Isaaya 16

¹Ni murumanise kamasheese kamaana, nga biwaanwa isi umuwuli we shiibala, khukhwaama i Sela, khuubirira khu mukhoosi kwe kumubiimbi, khuutsya khwoola khu lukiingi Sayuuni.

²Nga n'ubona binywiinywi byeesi bawoonile khukhwaama mu biswi byabyo, ni bakhasi be mu Mowaabu nabo bafwaanile baryo khu ndulo khwe luluutsi Arinoni.

³Babeene bano baalilila babaandu ba Yuda nga baloma bari, “Ni mukhuyeete mube be shiisa isi khuli, nga mukhukhiinga isi baasiku beefwe. Ni mukhubiimbekho mube nga shishiniini isi kumuumu kwe kumuusi kukwibaanduule. Ni mubise babaandu baamuli, mukhalyamo luwomelo babaandu babaatitukhile baawona ta.

⁴Ni mulekhe baamuli be mu Mowaabu bamenye akari musiinywe. Inywe ni mube bubwilukhilo bwaabwe isi baasiku babaali khukhwiitsa khuubahesa, khukhwoolesa niikane bawewo.” Baryo baasiku babaabamiinilisa bakhoole khu ntsakamo yaabwe, ni khuuhela khweesi babahesa ukhwo khukhaawewo, n'umusiku ubamiinikhilisa uyo akhaakoraanewo.

⁵Nio lwanyuma Wele ekhase mutweela khu betsukhulu ba Dawudi khu shitsoloŋo sheewe, awule nga umuyiinga. Umweene yuno akhaawule babaandu beewe, nga ali ni bubwilama ni bwaŋali. Niye akhaakholatsake bye bwaŋali naluundi nga mwirekefu ilala khuukhola bye bukwalaafu.

⁶Babaandu be mu Yuda baaloma bari, “Khwaamala khaale khuuwulila khu khwiyiingayiinga khwa Mowaabu, khukhwiiniinisa khwaabwe, ni shiikili atweela ni bunywaanywa. Ne khukhwiyiingayiinga khuno sikhulimwo na khafwiiti ta.”

⁷Nashiryo babaandu ba Mowaabu batsya khwantsuwa. Boosi batsya khulilila atweela lwe linaambo lyaabwe. Batsya khulila lwe bukeeki bwa resini khukhwaama i Kirihareseti. Shikhaabe shiryo lwekhuuba bukhaabe nga bwaweeleelewo ilala.

⁸Tsinimilo tse mu Heshiboni baatsilekhile awo busa, ni kimikuunda kikiili i Sibuma baakyantsukhile. Baawuli be kamanaambo baafuniaakakile tsisakya tsamwo tsoosi, abe tsitsabalaaha tsaatsya tsoola mu shiriimba she Yazeri, ni tsitsiindi khuukhwoola iyo mu mubiimbi. Ni tsisakya tsitsiindi tsabalaaha tsaatsya khukhwoola i bukwanyaanga, ni khuukhalisa kuyaantsa.

⁹Nashiryo ari indikhuulilila Yazeri nga nindilila kimikuunda kya Sibuma. Kamasika kaase keroora lwa Heshiboni ni Eleyale. Mbaawo luundi liyoombo lye kumwikhoyo kwe kamatuunda ke bubwiile bwe bukhafu atweela ni likyesa ta.

¹⁰Kumwikhoyo ni sangaalo iye likyesa byaaweeleelewo ilala. Sikhaabewo luundi khukhwiimba kimyeenya mu mikuunda ta, silibawo luundi liyoombo lye kumwikhoyo ta, namwe khuusuura khwe viini mu masuuriro ta. Ari Wele waabasilisiile ilala boosi.

¹¹Khuulila khwe mu mwoyo kwase lwa Mowaabu khwafwaanile kumweenya kwe kumutaambo khu lituungu. Netsuule ingunyi khu lwa Kirihareseti.

¹²Babaandu be mu Mowaabu beluwisa busa ni batsya khukhwisaaya bawele babaandi khu ngoongo, ate nga singene shibayeete ta. Bakhaatsye balilile mu byeeso bye khukhwisaaya ibyo, ne sikhaabewo na mutweela ukhaabayeete ta.

¹³Buno nibwo buurume bweesi Umukasya aamala khaale khuuwa, bubuuwaamba khu Mowaabu

¹⁴Ne ari ndi Umukasya aloma ari, “Mu mbuka iye kimiiko kitaru, nga ubala shiifukhu khu shifukhu nga umuraambi we kumukheemba, shiriifwa sha Mowaabu shitsya khuwawo. Abe yakhaba nga mulimwo babaandu baakali naabi, abo babaakhaaramewo nga baalamu, bakhaabe bakyeekhe bari luundi nga batoro busa.”