Read lumasaaba Isaaya 17 Bible Online

Isaaya 17 - lumasaaba bible

Isaaya 17

¹Buurume bubuwaamba khu Damasiko buloma buri; “Bona ari shiriimba sha Damasiko shitsya khuwawo! Shikhoonakisibwe shikyele busa kamawuumbu.

²Biriimba bya Aroeri bikhaarame busa nga mbaamo umuundu yeesi ta. Bibyaayo bikhaayile mu nguudo tsabyo, lwanyuma bikone aasi nga mbaawo shishiindu shoosi shishibitaambisa ta. Sikhaabewo umuundu yeesi ukhaabisame bitsye ta.

³Biriimba bya Isiraeli bibiilikho tsiimako nabyo bikhoonakisibwe biwewo, ni buyiinga bwa Damasiko nabwo bukhaakame. Bibiiramawo bye mu Asiriya bikhaalekhaane ni shiiriifwa she babaandu ba Isiraeli.” Isho Umukasya umweene niye ushiloma aryo.

⁴“Shiifukhu isho nga sheetsile khwoola, shiiriifwa sha Yakobo shikhaaweetsekhelele, ni kumunero kwe kumubili kweewe kukhaawewo.

⁵Shiibala shoosi shikhaafwaane busa nga kumukuunda kwe ŋaano kweesi bamalile khuukyesamwo iŋaano baamalilamwo ilala. Shikhaaramewo busa, shifwaane nga kimikuunda kye mu Litila lya Refayimu, kikiramilemo tsisaambu busa.

⁶Ne bakyeekhe bari bakhaaramewo, bafwaane nga kuusaala ku olivu kweesi bamalile khuubutakho kamatuunda kaakhwo, ne khwaaramakho kamatuunda kabili namwe kataru khu sakya tse murwe ibweene. Namwe kataru oba kane nga kabonekhakila mu soonda tse kuusaala tsitsikhali ndweela ta.” Bino byoosi Umukasya Wele wa Isiraeli niye ubikanikha.

⁷Khu shifukhu isho, babaandu balishuukha bakoboleyo isi Umubuumbi waabwe, bashuuse tsimoni tsaabwe batsiwunguuse khu Mukhosefu wa Isiraeli.

⁸Sibakheeleyo luundi khukhwisaayila khu byeeso bye bifwaani, byeesi baakhola ni kamakhono kaabwe ta. Sibakhenamile luundi ba wele Ashera, namwe khukhwiinama isi bibyeeso bye bubaane byeesi babeene baakholela ta.

⁹Shifukhu isho nga sheetsile khwoola, biriimba byaabwe bye kamaani bikhaafwaane busa nga biifwo byeesi babaandu batitukhilemwo, baalekha awo busa, bifwaane nga shiibala she ba Hivi ni ba Amori ni shalekhebwa awo busa, khu mbuka isi ba Isiraeli boolela. Biifwo byaabwe ibyo bikhaalekhebwe awo nga biŋaara busa.

¹⁰Baandu ba Isiraeli, shino shiba shiryo lwekhuuba inywe mwaarure khu Wele unyala waabawonesa inywe. Inywe mweebiliile Lulwaanda lwe bubwilukhilo bweenywe. Nashiryo abe mwaakhalibyaala biilime bibiifuura buulayi, ni biilime byeesi mufuna khukhwaama ibulafu,

¹¹abe biilime ibyo byaakhaalitsowela khu shifukhu khweene khweesi mubibyaalila, abe byaakhalirusa biimuli khu shiifukhu khweene nga mubibyaalile kumutikhinyi, simulibutakho abe yakhaba ni lituunda na litweela ta. Likyesa ilyo likhaabe busa ingunyi ni butsiina bubukhawona ta.

¹²E e e! Kamaye ke kamanaambo kawoolela nga khuuwoolela khwe kuyaantsa. Wulila, khuuwoolela khwe kamaye ke kamaani khufwaana nga khukhwiilyebula khwe kameetsi khwe kamaani!

¹³Ne abe kamanaambo ako kakheetsa kawoolela naabi karyo, nga n'ubona khukhwiilyebula khwe kameetsi khu ndulo khwe nyaantsa, Wele atsya khubakhookhela abasilise, ni nabo batitukhe bakoraanewo. Baryo bakhaatsye ni luufurerere, nga n'ubona likhuutsi ni litamuusibwa ni mbewo, bakhafwaane nga shishafuusi she mbewo mu khuungu ingali.

¹⁴Khu mbuka iye angoloobe, ibawo khuurya khuukali, ne isi kumutikhinyi kutsya khwoolela, nga bafwiile baweelewo! Kuno kuli kumukabo kwaabo babeetsa khuukhunuula ifwe; niyo intsakamo iyaakhila isi abo babeetsa khuukhuhesa ifwe.