Read lumasaaba Isaaya 18 Bible Online

Isaaya 18 - lumasaaba bible

Isaaya 18

¹Nga kumutaambo kwanyoolile shiibala sha Esiyopiya, nga nisho shiibala shisheetsulamwo bikuuku biikali khu ntsitsi tse kameetsi ke Misiri.

²Shiibala isho shirumana baarume baasho nga baatsiila khu maato keesi baakhola khukhwaama mu makhalaamba khu luutsi Nayilo. Ari nimutsye, inywe baarume babaakhekayaasa ta! Mutsye muyile buurume isi babaandu babaali baleeyi, be shihaafu she kumubili shiiholu, luundi nga nibo bali babaandu beesi baakali barya naabi, lwekhuuba nga bebwakalile shisiintsa bashihesela ilala. Babeene abo shiibala shaabwe shayawukhanisibwamo ni tsintsitsi tse kameetsi.

³Inywe babaandu mweesi babaamenya khu shibala, luundi inywe mweesi babaashiikhalakho, ise niimba nga nenyusile ibendela yase iye busoolo khu lukiingi khu ngaaki, mulola buulayi! Niimba nga naafuurire ikhoombi, murekeeresa buulayi!

⁴Lwekhuuba Umukasya sheesi ambooleele ise nisho shino; “Kane indoleleele buulayi bubweene nga naasilile busa, nga nemikhile mu shifwo shase mweesi imenya; ifwaane busa nga bukhafu bubwinyukha khu shifukhu she kumuumu kumukali. Namwe ifwaane busa nga namufweeli uwe liime mu bukhafu bwe likyesa.

⁵Nga likyesa lishiili khukhwoola ta, nga biimuli byaakwiile, ni kimisabibu nga kyaarakikhile khuuroba, Umukasya atsya khukhalaka tsisakya tsitsiruruna nga araambisa makaasi ukhala. Akhaafuniaakakekho tsisakya tsitsabalaaha tsoosi atsituume aasi.

⁶Kiryo kimilaambo kye baselikhale baabwe kikhaasalanile busa iyo mwirome, nio kiminywiinywi namuturu kye mu njiinji, ni tsisolo tse mwirome biikhoyelekho. Kinamuturu kikhaalye kimilaambo mu biseela bye bukhafu, ni tsisolo tse mwirome natso tsikhoyelekho mu biseela bye bunyifu.”

⁷Khu shifukhu isho, biwaanwa bikhaareerebwe isi Umukasya uwe Kamahe, Umunyali wa byoosi, khukhwaama isi babaandu baaleeyi abo, luundi be shikhoba shiwolu, luundi nga nibo babaandu beesi baakali barya naabi, lwekhuuba buli isi bebwakala, bahesela ilala. Babeene abo nibo be shiibala shishawukhanisibwamwo ni tsintsitsi tse kameetsi. Nibo babaakhaareere biwaanwa khu lukiingi Sayuuni, khweesi Umukasya uwe Kamahe, Umunyali wa byoosi, amenya.