Read lumasaaba Isaaya 19 Bible Online

Isaaya 19 - lumasaaba bible

Isaaya 19

¹Buno nibwo buurume bubweetsa nga buwaamba khu Misiri. Bona! Umukasya ali khukhwiitsa i Misiri, nga eetsila khu namufweeli nga s'ekayaasaka ta. Bifwaani bye Misiri byoosi bitsya khunikina lwe khukhwiitsa khweewe. Ni kimyoyo kye babaandu be Misiri boosi, kitsya khuryaryamukha lwe buuri buukali.

²“Indi khuutsya khusuluusa ba Misiri bashuukhanekho bonyene na bonyene basoolane, uwe buulebe mutweela ashuukhe khu we buulebe washeewe basoolane, umwesanwa mutweela ashuukhe khu mwesanwa weewe nabo basoolane, shiriimba shitweela shishuukhe khu shiriimba shishiindi, ni buyiinga butweela bushuukhe khu buundi.

³Indi khuutsya khufusaasa kimyoyo kye babaandu be Misiri kiweelemo ilala kamaani, ni tsiŋoonaŋoona tsaabwe tsifwe. Baryo bakhaatsye belootsele bifwaani byaabwe nga bakana khuufuna kamakhula, lwanyuma baamewo batsye khukhwireebakho isi baalyuuli baabwe, ni bamayuuya, ni isi balakusi babaakholakana ni kimisimu kye baafu.

⁴Indi khuutsya khuwaanayo Misiri isi umuwuli umurafu naabi, uutsya khubakholisaka shiisa, babonabone. Umuyiinga ukhalimwo shiisa ta, niye uutsya khubawula.” Bino byoosi Umukasya uwe Kamahe, Umunyali wa Byoosi niye ubiloma.

⁵Kameetsi ke mu luutsi Nayilo, katsya khwoomelela, kalekhe khukhwitsula luundi ta, ni aasi isi katimila abonekhe nga oomile busa.

⁶Kimifureki kye kameetsi kitsya khwooma busa, ni tsintsitsi tsitsitsukha mu luutsi Nayilo mu Misiri, natso tsitsya khwoomelela tsiweelewo ilala, nio kamakhalaamba ni tsikholo tsitsiili khuubola, byoole khuuwunya.

⁷Ni bisaala, atweela ni biilime byoosi bibitsowela khu ndulo khwe luluutsi Nayilo luno, bikhoome ilekhe khubawo ni shishiindu shoosi ta.

⁸Baryo baalobi be tsinyeeni bakhewunamile busa, nga sibali ni sheesi bakhola ta. Abo boosi babaraambisa kimilobo mu Nayilo, bakhaantsuwe busa, ni naabo babaatuuma butiimba bwaabwe mu meetsi kano, bakhaasamilile busa.

⁹Ni naabo babaakhola biikwaaro bibireremukha, sibakhaabe ni bibiraambisibwa ta, ni babaanaba tsingubo khukhwaama mu faamba, bakhaalendaalile awo busa.

¹⁰Abo boosi babaali tsintseko tse shiibala shaabwe, lwekhuuba bali baraambi, bakhetsule kumutaambo, ni naabo babaraamba khuufuna kumukheemba, bakhaabe ni ngunyi yonyene.

¹¹Nga baaraangilisi be shiriimba Zowaani bali baasilu naabi! Baawi be kamakyesi bawa Faraawo kamakhula kakaali ke buusilu. Kane nibo beyiinge baryeena nga baloma bari, “Ifwe khuli baakyesi naabi, ni luruungo lweefwe lutsya khukhwoola khu bakuuka be kamakhula bataayi ni bayiinga?”

¹²Iwe Faraawo, ari baawi boowo be kamakhula bali waheena? Lekha nibo bakhuboolele iwe tsiŋoonaŋoona tseesi Umukasya uwe Kamahe, Umunyali wa Byoosi akholeele Misiri.

¹³Baaraangilisi ba Zowaani bekyelile baasilu busa, ni baawuli ba Menfisi nabo bawombesibwile. Abo babaali baaraangilisi ba buli linaambo, baborosile Misiri.

¹⁴Umukasya waamoyaanisile bibyambaaso bye babaandu, ni kamakyesi keesi bawa koosi kali ke buusilu. Baryo baakilile shiibala sha Misiri shilikho shitaalataala busa nga n'ubona umumeesi uuli khushuukhaanila mu malusi keewe.

¹⁵Ari mbaawo shishiindu shoosi sheesi Misiri anyala khuukhola ta. Babaandu boosi baawetsekheleele busa, abo babaali baaraangilisi ni naabo beesi baraangilila; abo babaali be shiriifwa ni naabo babaali be aasi; mbaawo na mutweela unyala khuuyeeta ta.

¹⁶Shifukhu isho nga sheetsile khwoola, babaandu ba Misiri bakhaafwaane busa nga bakhasi. Bakhaaryaryamukhe ni buuri nga baaboone kumukhono kw'Omukasya, uwe Kamahe, Umunyali wa Byoosi, kwenyusibwile mu ngaaki khuubatengaasa.

¹⁷Babaandu ba Misiri bakhaarye naabi nga baawuliilekho busa lisiina Yuda. Buli muundu yeesi isi bakhaakanikhilekho lisiina ilyo, akhaarye naabi lweesho sheesi Umukasya uwe Kamahe, Umunyali wa Byoosi, atsya khuubakhola.

¹⁸Khu shifukhu isho, biraano khu biiriimba bye Misiri bikhaakanikhe luulimi lwe mu Kanaani, lu Heburaniya, naluundi nga betsuba, bakhetsube khuuloondelela Umukasya uwe Kamahe, Umunyali wa Byoosi. Shitweela khu biriimba bino, bakhaashilaange bari, “Shiriimba she Nyaanga.”

¹⁹Shifukhu isho nga sheetsile khwoola, ikhaabewo shisheeso sh'Omukasya akari mu shibala she Misiri mubweene, naluundi boombekhewo shisiindi khu lwaakha lwasho, khuushebulililakho Umukasya.

²⁰Isho shikhaabe nga khaabonelo ni she khukhwookesanisa shiri Umukasya uwe Kamahe, Umunyali wa Byoosi, esaayibwa mu Misiri. Baryo babaandu nga beetsile khwilootsa isi Umukasya lwaabo babaabamiinikhilisa, Umukasya akhaarumane umuwonesi ukheetse khuubayeeta nibo.

²¹Musaambo iyo Umukasya akheruumbule, emanyise umweene isi ba Misiri. Khu mbuka nyene iyo, ba Misiri beene bakhaamanye Umukasya buulayi, beetse bawaaneyo tsisaayilo ni biwaanwa isi ali. Ni abweene, bakhaakhole bibitsubo isi Umukasya luundi babyoolelese.

²²Umukasya akhaawe ba Misiri shiitaambiso, ne lwanyuma akyelewo eetse abawonese. Lwekhuuba bakhaashuukhe bakobole isi Umukasya, ni naye akhaawuliilise khukhwiilootsa khwaabwe abeelilemwo.

²³Khu shifukhu isho, ikhaabewo kumukhoosi kumubalaayi kukuutubaasa Misiri ni Asiriya. Baryo ba Asiriya bakyeende beetse i Misiri, ni ba Misiri nabo banyale khuukyeenda khuutsya i Asiriya, nga mbaawo shishibakhingilila ta. Boosi banyale khukhwiisaayila Wele atweela.

²⁴Khu mbuka iyo, Isiraeli naye akhaabe mutweela khu manaambo ako Misiri ni Asiriya. Shino shikhaabe she tsikhabi naabi isi shiibala shoosi.

²⁵Nio Umukasya uwe Kamahe, Umunyali wa Byoosi abawe tsikhabi nga aloma ari, “Baandu baase ba Misiri, ni mube ni tsikhabi, atweela ni shiibala sha Asiriya, sheesi nekholela ni kamakhono kaase. Ni nanywe ba Isiraeli, babaandu baase beesi ise neroborera.”