Read lumasaaba Isaaya 2 Bible Online

Isaaya 2 - lumasaaba bible

Isaaya 2

¹Khuno nikhwo khuubonekhelwa khweesi Isaaya umusooleli wa Amozi aabona, khuukhuwaamba khu Yuda ni khu Yerusalemu. Nga buloma buri:

²Imbuka ikhoole mu bifukhu biimaliilisi, lukiingi khweesi Lisaayilo ly'Omukasya Likhulu lyemikha, lulibeela luuleeyi khufuura tsoosi, naluundi nga nisho shiifwo shishifuura buukhulu mu shiibala shoosi. Lukiingi luno lukhenyusibwe angaaki khuufuurisa bikoongo bibiindi byoosi, ni babaandu khukhwaama mu buli shisiintsa mu shibala shoosi, bakhaakyeende beetse isi luli.

³Babaandu baakali khukhwaama mu manaambo baliitsa, lwanyuma balome bari, “Yiitsa khutsye khu lukiingi lw'Omukasya, khutsye mu ntsu ya Wele wa Yakobo. Nga khuli mu bweene imwo, alikhuleekela ifwe tsintsila tseewe, ni nafwe khuryo khulikyeendela mu mikhoosi kyeewe.” Lwekhuuba kamakaambila k'Omukasya kalirura khukhwaama mu Sayuuni, ni Lomo yeewe iliitsa khukhwaama mu Yerusalemu.

⁴Umukasya umweene niye ukhaakaye kamanaambo, akhaakhale kimisaango kye babaandu be mu manaambo kamakali. Awo nio bashuuse tsiindima tsaabwe batsibasemo tsimbako tsitsiilima, ni kamafumo kaabwe bakabasemo kimilobo. Mbaawo linaambo lilikhaatsye libwakale linaambo lyashe ta, namwe bari ibewo khukhwiyika bye busoolo luundi ta.

⁵Inywe babetsukhulu ba Yakobo, ni mwiitse khukyeendele mu buwaanga bw'Omukasya!

⁶Lwekhuuba Umukasya waantsukhile babaandu beewe, nga nibo babetsukhulu ba Yuda. Nga shishikila shili ndi baayitsusa mu shibala shaabwe tsisaambo tse bye khuulakula khukhwaama Ibwaamanyaanga, naluundi baayitsula bye buulosi nga ba Filisitiya ni bakhola. Naluundi baatsya nga bakhola tsikwangwaani ni babaandu banaambo.

⁷Shiibala shaabwe shoosi shaayitsulamwo izaabu ni feetsa; bye buyiindifu bwabwe sibyakama ta. Naluundi shiibala shaabwe shaayitsulamwo tsiŋwaaŋwa; ni kamakaali kaabwe sikabalikha ta.

⁸Shiibala shaabwe shaayitsulamwo biifwaani biikali naabi, babaandu baamwo bafukhama aasi besaaya bibiindu byeesi baakhola ni kamakhono kaabwe kameene.

⁹Aryo buli muundu akheesibwe aasi awaambisibwe tsisoni, babaandu boosi baswaale busa. Iwe ukhabeyakhila ta!

¹⁰Ari nimwalaamile aasi mutsye mwibise mu lwaanda. Tsya mwibise mwiloba aasi lwekhuuba lirima ly'Omukasya lili liikali, ni shiriifwa sheewe shili she kamaani naabi.

¹¹Awo nio babaandu be bunywaanywa bekhisibwe aasi, ni naabo babeyiingayiinga baswaale. Umukasya niye yenyene ukhaaweebwe shiriifwa she angaaki naabi khu shifukhu isho.

¹²Lwekhuuba Umukasya Uwe kamahe, niye uunyala byoosi, ali ni shifukhu sheesi aarobora, khweesi akhaakwiisile aasi abo boosi babeyiingayiinga, ni babaali ni kamaani. Boosi bakhaaswaale busa.

¹³Akhaareme kimisaala kimileeyi kimi kedali kye mu Lebanoni kikwe aasi, ni khuutubaasakho kimisaala oko kya Bashani.

¹⁴Niye akhaakwalaase tsinjiinji tsindeeyi tsoosi, atweela ni tsingoongo tseene.

¹⁵Akhaafuniaakake kiminaala kikyeyiinga mu ngaaki kyoosi, atweela ni kamatikiiyi ke kamaani keene.

¹⁶Akhaahese ni tsimeeri tsitsikhola bye busuubusi tse Tarushishi tsoosi, atweela ni kamakhoŋolo kakaabonekha buulayi koosi.

¹⁷Nashiryo khukhwiyiingayiinga khwe babaandu khukhaawewo, ni bunywaanywa bwaabwe bweene. Umukasya niye yenyene ukhaaweebwe shiriifwa she angaaki naabi khu shifukhu isho.

¹⁸Bibuumbe byoosi bikhaaweelewo ilala.

¹⁹Babaandu bakhaalaame busa batsye beebise mu lwaanda, ni mu malowo kakaali aasi mwiloba. Bakhaatsye beebise lwe khuurya buurafu bw'Omukasya, nilwe shiriifwa sheewe she kamaani, isi umweene akheenyukhile anikinise shiibala.

²⁰Khu shifukhu khweene ukhwo, babaandu bakhaatuumake bifwaani byaabwe bye zaabu ni bye feetsa byeesi babeene bekholela khuukhwisaaya. Bakhaabituumake isi tsimbeba ni kamawukuru.

²¹Bakhaalaame batsye beebise mu tsifwa tse mu lwaanda, ni mu mafuluma ke mu mabaale. Bakhaakhakekho naabi nga bakana khuutitukha shiiriisa sh'Omukasya, ni shiriifwa she kamaani keewe, lweesi akhenyukhile khuunikinisa shiibala.

²²Mukheelayo luundi khukhwiyikina umuundu buundu busa, uuli busa ni kumuukha kweesi aheelela mu moolu ta. Niye anyala waayeeta shiina?