Read lumasaaba Isaaya 20 Bible Online

Isaaya 20 - lumasaaba bible

Isaaya 20

¹Mu mwiiko kweesi Umuyiinga Sarigoni uwa Asiriya aarumanila umukhulu we kamahe keewe khuutsya khuwaamba shiiriimba sha Ashidodi,

²Umukasya waalomela Isaaya, umusooleli wa Amozi ari, “Yifuula isaawu iye makoongwe abe isi wakwaara, wiiyabulemo biilaalo bibiili mu bikyele byoowo.” Isaaya waakhola nga ni baamulomela, waatsya nga akyeenda bukhuna, nga s'ali ni biilaalo mu bikyele byeewe ta.

³Lwanyuma Umukasya waaloma ari, “Umuŋoosi wase Isaaya abeele nga akyeenda bukhuna, naluundi nga akhaandaka aasi busa, khuumala kimiiko kitaru kimibuufu. Khano khali khaabonelo, shili she khuubonelakho she biikosi biikali bibikheetse khu Misiri ni Esiyopiya.

⁴Aryo umuyiinga wa Asiriya akhebwakale Misiri ni Esiyopiya, abayile nga bali baabowe. Akhaabawaambake, abayile nga bali bukhuna luundi nga bakhaandaka aasi busa, babaana baafwiiti ni baakhulu beene, nga kameekhalilo kaabwe kaabonekhile ibulafu, khukhwookesanisa khuuswaala khwa Misiri.

⁵Lwanyuma abo abe babeyikina Esiyopiya, ni naabo abe babebuyila khu lwa Misiri, bakhaayungukhane busa luundi baswaale.

⁶Nga imbuka iyo yeetsile khwoola, babaandu babaamenya khu ndulo khwe kuyaantsa bakhaalome bari, ‘Isi shino shikholikhiile khuubo, abe isi khwiyikina, luundi khwaatitukhilayo lwe buyeeti bwe khuuwonesebwa khukhwaama isi umuyiinga wa Asiriya, ari khunatitukha khuwonele waheena?’”